‏ Psalms 118

א Алээп

1Замынь түгэс, Эзэнэй һургаал заабари сахин ябаашад
хэды ехэ юрөөлтэйб!
2Зарлигынь хадагалан дүүргэжэ,
үнэнхэ зүрхэ сэдьхэлһээ
Тэрэниие хүндэлжэ байгаашад юрөөлтэй.
3Тэдэ гэмтэ хэрэг хэдэггүй,
Тэрэнэй замаар ябадаг.
4Өөрын захиралтануудые заабол бэелүүлэн байхые
Та захираа бэлэйт.
5Танай хуули ёһонуудые сахин байхаар
замуудни бата тогтоһой!
6Тиигэбэл, Танай захяа заабаринуудые харан байхадаа
би эшэхэгүй бэлэйб.
7Үнэнхэ зүрхэнһөө Таниие магтан байнаб,
үнэн зүбэйтнай заршам шудалнаб.
8Хуули ёһонуудыетнай сахин байхаб,
намайе дууһан бү орхиит!

ב Бээт 9Залуу хүбүүн замаа сэбэрээр
яагаад сахин байхаб?
Танай үгые сахин байһаараа.
10Бүхы сэдьхэл зүрхөөрөө Таниие бэдэрэн байнаб,
захяа заабаринуудһаатнай алдууран байхыем бү зүбшөөгыт!
11Танай урда нүгэл үйлэдэхэгүйн тула
зүрхэ сэдьхэлдээ Танай үгые шанга хадагалнаб.
12Эзэн, Та юрөөлтэйт!
Хуули ёһонуудтаа намайе һургыт!
13Танай аманһаа гараһан бүхы тогтоолнуудые
би өөрын хэлээр тунхаглаа бэлэйб.
14Ямаршье баялигта баясадагтал,
Танай зарлигуудай замда баярланаб.
15Танай захиралтанууд тушаа бодомжолноб,
харгы замуудыетнай харанаб.
16Хуули ёһонуудтатнай баясанаб,
Танай үгэ мартахагүйб.

ג Гиимэл 17Намайе амиды байлгажа,
үгыетнай сахин бэелүүлэхымни тула
Өөрын зарасада хайра үзүүлэн хандыт.
18Танай һургаалай гайхамшагта үзэгдэлнүүдые
намда харуулхын тула нюдыемни нээгыт.
19Би газар дэлхэй дээр ерүүл хүндэл эрхэгүй жаахамби,
Өөрын захяа заабаринуудые намһаа бү хоргодуулыт!
20Танай тогтоолнуудые хододоо хүсэн эрмэлзэһээр
сэдьхэлни шаналжа байнал.
21Захяа заабаринуудһаатнай хазагайрдаг,
бардам гү, али хараал шэнгээһэн зониие
Та номгоруулаат.
22Танай гэршэлгэнүүдые сахин хадагалдаг ушарһаам
доромжолол ба шоо үзэлгые намһаа зайлуулыт.
23Ноёд һуужа, минии урдаһаа хэлсээ зохёожо байна.
Харин би, Танай зараса, хуулинуудыетнай бүри гүнзэгыгөөр шудалнаб.
24Гэршэлгэнүүдтнай минии баясхалан,
минии зүблөөшэд мүн.

ד Даалэт 25Сэдьхэлни тооһо шоройдо дарагданхай,
үгөөрөө намайе һэргээгыт.
26Өөрын замууд тушаа тунхаглааб, Та намда харюусаат.
Өөрын хуули ёһонуудта намайе һургыт.
27Зарлигуудайтнай зам шэглэлые намда ойлгуулыт,
гайхамшагта үйлэ хэрэгүүд тухайтнай бодохолби.
28Гай тодхорһоо боложо ами наһамни һалажа байна,
үгөөрөө намайе шанга болгыт.
29Худал зам намһаа зайлуулыт,
Өөрын һургаалые намда нигүүлэсхы хайрлыт.
30Үнэн сэхэ зам шэлээб,
Танай тогтоолнуудые хүсэн-жүрөөдэн байнам.
31Гэршэлгэнүүдыетнай баряад лэ ябанам,
Эзэн, намайе эшхэбтэр байдалда бү оруулыт!
32Зүрхымни үргэн мэдэлтэй болгодог ушарһаатнай
Танай захиралтануудай замаар яаранам.

ה Һээ 33Танай хуулиин замаар ябахымни һургыт, Эзэн!
Би эсэс хүрэтэрөө тэрээниие дахан ябахалби.
34Намда ухаа заагыт, һургаалыетнай сахин ябахалби,
бүхы зүрхөөрөө тэрэниие хадагалан байхаб.
35Һургаал заабаринуудайнгаа замаар намайе хүтэлыт,
би тэрэниие хүсэнэлби.
36Зүрхыем олзо руу бэшэ,
Өөрын гэршэлэл руу хандуулыт.
37Нюдыем худалһаа ондоо тээшэ шэглүүлыт,
Өөрын харгы замда намда амидарал бэлэглыт.
38Өөрын зарасада найдуулһан үгэеэ бэелүүлыт,
тиихэдэ би Танһаа түбэгшөөн байхалби.
39Эшхэбтэр байдалһаа би айнаб, тэрэниие намһаа холодуулыт!
Танай тогтоолнууд һайн бэлэй.
40Анхарыт, би Танай захиралтануудые хүлеэн байнам,
Өөрын зүб шударгаар намайе амидыруулыт.

ו Ваав 41Оо, Эзэн, энэрэл хайратнай, абаралтнай
Танай үгын ёһоор намда ерэхэнь болтогой!
42Тиигэбэл, нам тушаа муугаар хэлэдэг хүндэ
харюу үгэхэ үгэ намда олдохол.
Юуб гэбэл, үгэдэтнай этигэнэм.
43Үнэн зүб үгэ аманһаам бү абыт,
юуб гэбэл, Танай зүб шударгада би этигэнэб.
44Танай һургаал заабариие хододоо, хэтэдээ сахин байхаб.
45Танай захиралтануудые гүйсэдхэхээ эрмэлзэдэг ушарһаа
би сүлөөтэй алхалха болоноб.
46Хаашуулда Танай гэршэлэлгэнүүд тушаа хөөрэхэб, эшэхэгүйб.
47Би Танай һургаалнуудта дурлааб,
тэдээндэ баясахаб.
48Би өөрын дурлагша һургаалнуудтатнай гараа һунгахаб,
зарлигууд тухайтнай бодомжолхоб.

ז Заайин 49Өөрын зарасада үгэһэн үгэеэ һаныт,
тэрэ үгэдэ найдахымни Та захираа бэлэйт.
50Танай үгэ намайе амидыруулһаниинь
зоболон дундам һатаарха зүйлни болоол.
51Бардам зон намайе ехэ шоо үзэнэ,
харин би Танай һургаалһаа хазагайраагүйб.
52Танай урданай тогтоолнуудые һанажа,
Эзэн, тэрээгээр һамаардаг байгаалби.
53Танай һургаал орхигшо муу зониие үзэхэдөө,
уур хилэмни хүрэнэ.
54Аяншалан ондоо газарта байхадам
зарлигуудтнай намда дуун мэтэ болоол.
55Эзэн, би хадаа нэрыетнай һүни бүри һанажа,
һургаалыетнай сахин байгааб.
56Иигэжэ Танай захиралтануудые бэелүүлжэ,
өөрын болгооб.

ח Хээт 57Танай үгэнүүдые сахижа,
«Эзэн хадаа минии хуби юм» гэжэ хэлээб.
58Бүхы зүрхэ сэдьхэлээрээ Таниие гуйналби,
Өөрын үгэ бэелүүлжэ, намда нигүүлэсхы байгыт.
59Өөрын харгы замууд тушаа бодомжолон,
хүлөө Танай гэршэлгэнүүд руу шэглүүлээб.
60Танай захиралтануудые бэелүүлхэеэ
яаранаб, хойшолуулхагүйб.
61Муу зоной урьха намайе баряа,
харин би һургаалыетнай мартаагүйб.
62Һүниин тэгэн дунда бодожо,
зүб тогтоолнуудайтнай түлөө Таниие магтанам.
63Таниие хүндэлдэг, захиралтануудыетнай дүүргэдэг
зонтой би хамтаб.
64Эзэн, энэрэл хайраартнай дэлхэй дүүрэнхэй,
хуулинуудтаа намайе һургыт.

ט Тээт 65Эзэн, Та амалһанаа бэелүүлэн,
намда, Өөрын зарасада, һайе хэнэт.
66Танай захиралтануудта этигэдэг ушарһаам
намда илгаруулха шадабари ба эрдэм мэдэсэ заагыт.
67Зобохын урда тээ буруу зүгөөр ябан байгааб.
Харин мүнөө үгыетнай сахин дүүргэнэб.
68Та хадаа һайн ба һайе хэдэгта.
Өөрын хуулинуудта намайе һургыт.
69Бардам зон намайе худал хуурмаг үгөөр тойруулан хүрмээд байна.
Харин би бүхы зүрхэ сэдьхэлээрээ захиралтануудыетнай сахин дүүргэнэб.
70Тэдэнэй зүрхэн өөхөөр орёогдон хатууранхай,
харин би Танай һургаалда баясанаб.
71Зоболон дундуур гараһамни намда туһатай,
юуб гэбэл, би Танай хуули ёһонуудта һуранам.
72Аманһаатнай гарагша һургаал намда
мянгаад алта, мүнгэн хабтаһанһаа үлүү.

י Ёд 73Танай гар намайе урлан бүтээгээ бэлэй.
Намайе ухаатай болгыт, би һургаал заабаринуудыетнай шудалхалби.
74Танһаа түбэгшөөдэг зон нам руу баяртайгаар хараха –
би Танай үгэдэ этигэдэг ха юмбиб.
75Эзэн, Танай шиидэбэринүүд зүб шударга гэжэ мэдэнэм,
Та зүб намайе хэһээгээ бэлэйлта.
76Өөрын зарасада, хэлэһэн үгынтнай ёһоор,
энэрэл хайратнай намайе һатааруулхань болтогой.
77Намайе амиды мэндэ байлгахын тула
үршөөл хайратнай намда хүрэг лэ,
юуб гэбэл, һургаалтнай минии баяр мүн.
78Намайе ямаршье ушар шалтаггүй харшалжа байгааша бардам зон
эшхэбтэр байдалда орог лэ.
79Танһаа түбэгшөөдэг,
Танай гэршэлгэнүүдые мэдэдэг зон
нам руу эрьехэнь болтогой.
80Минии эшхэбтэр байдалда орохогүйн тула
зүрхэмни Танай хуули ёһонуудай урда түгэс тэгшэ байхань болтогой.

כ Каап 81Танһаа абарал хүлеэжэл байна сэдьхэлни.
Би Танай үгэдэ этигэнэм.
82Танай үгэ хүлеэн нюдэдни һула боложо байна.
«Хэзээ намда һатаарал үршөөхэбта?» гэжэ асуунам.
83Хөө утаан соо байгааша хүхүүр мэтэ болоошье һаа,
би Танай хуули ёһонуудые мартаагүйб.
84Танай зарасада, хэды хоног үлөөб?
Намайе харшалдаг зониие хэзээ Та шиидхэхэбта?
85Бардам зон Танай һургаал тоонгүй,
намда унаха нүхэ малтан бэлдээ.
86Танай бүхы һургаал заабаринууд – үнэн зүб.
Намайе ямаршье шалтаггүй харшалжа байна. Туһалыт намда!
87Намайе газарай хүрьһэнһөө аршан һалгаан алдаа.
Харин би Танай тушаалнуудые орхёогүйб.
88Өөрын энэрэл хайраар намда амидарал үршөөгыт!
Танай үгэһэн гэршэлгэнүүдые би сахин байхалби.

ל Лаамэд 89Эзэн, Танай үгэ тэнгэридэ хэтэ мүнхэдөө баталагданхай.
90Танай үнэн зүб үеһөө үе дамжан оршохо.
Та газар дэлхэйе бүтээн табяат, тэрэ оршон байна.
91Танай зарлигаар бүхы юумэн мүнөө хүрэтэр байна,
бүгэдэ Танда алба хэнэ.
92Минии баяр бологшо Танай һургаалай үгы һаань,
би зоболон дундаа хосорхо байгааб.
93Хэзээшье Танай зарлигуудые мартахагүйб,
тэдээгээр Та намайе амидыруулнат.
94Би Танайб. Намайе абарыт,
Танай зарлигуудта би ханданам.
95Усадхахын тула хорото муу зон намайе отожо байна.
Харин би Танай заабаринуудай гүн руу тэгүүлнэм.
96Түгэс түгэлдэр бүхы юумэндэ заха хизаар харагдана.
Харин Танай һургаал заабаринууд заха хизааргүй.

מ Мээм 97Танай һургаалда би угаа дуратайб!
Бүхэли үдэртөө тэрээн тушаа бодомжолном.
98Танай һургаал заабари хэтэ мүнхэдөө намтай хамта,
тэрэ намайе дайсадһаам сэсэн мэргэн болгоол.
99Өөрын багшанарһаа би сэсэн мэргэн болонхойб,
юуб гэбэл, Танай зарлигууд тушаа бисалгалнам.
100Танай зарлигуудые сахидаг ушарһаа
би наһажаал зонһоо сэсэн мэргэн болонхойб.
101Хүлнүүдээ муу зам руу гэшхүүлнэгүйб.
Юуб гэбэл, Танай үгэ сахинам.
102Танай тогтоолнуудһаа би хазагайрнагүйб.
Юуб гэбэл, Та намайе һурганат.
103Танай үгэ амталхада хэды амтатайб!
Минии аманда тэдэ зүгын балаһаашье амтатай.
104Танай зарлигууд намда эрдэм мэдэсэ үгэнэ,
худал хуурмаг замые би үзэн яданам.

נ Нүүн 105Танай үгэ – минии хүлдэ гэрэл дэн,
намда замым гэрэлтүүлнэ.
106Танай үнэн сэхэ тогтоолнуудые сахин байхаб гэжэ тангариглаа бэлэйб,
тангаригаа бэелүүлхэб.
107Эзэн, би харшалуулагдаад байнам.
Өөрын амалһанай ёһоор, намда ами наһа үршөөгыт.
108Эзэн, минии аманһаа гарагша һайн дуранай үргэл хүлеэн абыт,
Өөрын тогтоолнуудые намда заагыт.
109Ами наһамни гай тодхорто саг үргэлжэ ороно.
Харин би Танай һургаал мартаагүйб.
110Муу муухай зон намда урьха занга табяа,
харин би Танай зарлигуудһаа хазагайраагүйб.
111Би Танай һургаалнуудые хэтэ мүнхын
уг залгамжалан дамжуулха зүйл болгон абааб.
Юуб гэбэл, тэдэ зүрхэнэйм баяр баясхалан мүн.
112Би Танай хуулинуудые сахин бэелүүлхээр
зүрхэеэ хэтэ мүнхэдөө, эсэс хүрэтэр зорюулааб.

ס Саамэх 113Би хоёр һанаатай зониие үзэн ядададагби,
харин Танай һургаалда дуратайб.
114Та болбол минии хорохо газар, минии бамбай мүн.
Үгыетнай хүлеэдэгби.
115Бузар муу хэрэг хэгшэд, намһаа зайлагты.
Бурханайнгаа тогтоолнуудые би сахин байхаб.
116Амалһанайнгаа ёһоор, намайе дэмжэн бэхижүүлыт.
Амиды мэндэ байлгыт, найдажа байхадам эшхэбтэр байдалда бү оруулыт.
117Намайе дэмжыт, тиихэдэтнай абарагдахаб,
хуулинуудыетнай хододоо шудалан анхаран байхаб.
118Хуулинуудһаатнай хазагайрагшадые бултыень Та голоот,
юуб гэбэл, мэхэ гохонь дэмы хооһон.
119Дэлхэйн бүхы хорото һанаатануудые
нүүрһэнэй хог мэтээр хаянат.
Тиимэһээ би Танай гуримда дуратайб.
120Бэемни Танһаа айжа шэшэрнэ.
Танай зага шүүбэриһээ айнаб.

ע Аайин 121Би шударга ёһо ба үнэн зүбые үйлэдэн байгааб.
Үлдэжэ байгаашадтам намайе бү үгыт.
122Өөрын зарасада һайн һайханай түлөө баталга болыт.
Бардам зондо намайе бү дарлуулыт.
123Танай абарал, Танай үнэн зүб үгые хүлеэн,
минии нюдэд һулараад байна.
124Энэрэл хайрынгаа хэмээр намда, Өөрын зарасада, хандыт,
хуулинуудтаа намайе һургыт.
125Би Танай зарасаб. Намда ухаа заагыт.
Тиихэдэ би Танай һургаал заабаринуудые мэдэдэг болохоб.
126Эзэнэй хэрэг ябуулха саг ерээ,
юуб гэбэл, Танай һургаал эбдэгдээ.
127Би Танай тогтоолнуудта алтанһаа, шэжэр алтанһаа үлүү дуратайб.
128Би Танай зарлигуудай сэхэ замаар ябанам,
худал хуурмагай зам үзэн яданаб.

פ Пээ 129Танай гэршэлгэнүүд гайхамшаг,
тиимэһээ сэдьхэлни тэдэниие сахидаг.
130Танай үгэнүүдэй тунхаглал гэгээрүүлнэ,
юрын зониие ухааруулна.
131Танай захиралтануудые угаа хүсэн байһандаа
амаа ангайн аахилнаб.
132Нэрэдэтнай дуратай зондо юу хэдэгтэл адляар
нам руу хаража, намайе хайрлыт.
133Танай үгэ алхамыем бата болгог лэ,
ямаршье буруу юумэндэ намайе эзэмдэхыень бү зүбшөөгыт.
134Зоной дарлалтаһаа намайе сүлөөлыт,
Танай захиралтануудые сахин байхалби.
135Гэрэлтэмэ нюур шарайгаараа намайе, Өөрын зарасые, гэгээрүүлыт,
хуулинуудтаа намайе һургыт.
136Танай хуули зоной сахидаггүй ушарһаа
нюдэнһөөм урасхал нулимса урдана.

צ Цадээ 137Эзэн, Та хадаа шударга ба
зарга шүүбэритнай зүб шударга мүн.
138Өөрын һургаалнуудые Та захин дамжуулаат,
тэдэ хадаа үнэн зүб ба сасуулшагүй үнэн мүн.
139Танай үгые дайсадайм мартаһанда
би угаа хилэгнэн байнаб.
140Танай үгэ болбол хайлуулһан сэбэр алтан мэтэ.
Би, зарасатнай, тэрээндэ угаа дуратайб.
141Би доройтонхойб, шоологдонхойб.
Гэбэшье захиралтануудыетнай мартаагүйб.
142Танай зүб шударга – хэтэ мүнхын зүб шударга,
һургаалтнай – үнэн зүб.
143Бэрхэшээл ба зоболон намайе дайраа.
Гэбэшье Танай зарлигууд – минии баяр мүн.
144Танай һургаалай үнэн зүб хэтэ мүнхын,
амиды байхым тула намайе ухаатай болгыт.

ק Кооп 145Би бүхы зүрхэ сэдьхэлээрээ хашхаран байнаб:
Эзэн, намда харюусыт.
Танай хуулинуудые сахин байхаб.
146Би Тан руу хашхарнаб: намайе абарыт.
Танай зарлигуудые сахин бэелүүлхэб.
147Үүр сайхые хүлеэнгүй, Таниие дууданаб,
Танай үгэдэ найданаб.
148Танай үгэ тунгаан бодохын тула
би бүхэли һүниндөө нюдөө нээгээд байнаб.
149Эзэн, Өөрын энэрэл хайрын ёһоор минии абяа дуулыт.
Өөрын тогтоолой ёһоор намда амидарал үршөөгыт.
150Хорон худал дахагшад дүтэлжэ байна.
Танай һургаалһаа тэдэ хэды холоб!
151Эзэн, Та ойрохон байнат.
Бүхы тогтоолнуудтнай – үнэн зүб.
152Танай гэршэлгэнүүд тушаа үнинэй мэдэнэб.
Та тэдэниие хэтэ мүнхэдөө баталаат.

ר Рээш 153Минии зоболон хаража, намайе абарыт.
Юуб гэбэл, би Танай һургаал мартадаггүйб.
154Минии хэрэгые аршалжа, намайе хайрлыт.
Амалһанайнгаа дагуу намайе амидыруулыт.
155Абарал хадаа хорото муу зонһоо холо байдаг,
юуб гэхэдэ, тэдэ Танай зарлигуудые бэдэржэ байдаггүй.
156Эзэн, Танай үршөөлнүүд агууехэ.
Амалһанайнгаа дагуу намайе амидыруулыт.
157Намайе харшалагшад болон үһөөтэ дайсадайм олон болобошье,
би Танай заабаринуудһаа хазагайрдаггүйб.
158Мэхэтэйшүүлые хараад жэрхэдэгби.
Юуб гэбэл, тэдэ Танай үгэ сахин дүүргэдэггүй.
159Танай зарлигуудта хэды ехэ дуратайем харыт.
Эзэн, энэрэл хайраараа намайе амидыруулыт.
160Танай үгын удха үнэн ба
Танай зүб шударга тогтоол бүхэн хэтэ мүнхэдөө.

ש Шиин 161Ноёд намайе ямаршье шалтаггүй харшалдаг.
Харин зүрхэмни Танай үгэһөө һүрдэдэг.
162Ехэ олзо олоһон хүн шэнги
Танай үгэдэ баясадагби.
163Худал хуурмагые үзэн ядан жэрхэдэгби,
харин Танай һургаалда дуратайб.
164Зүб шударга тогтоолнуудһаатнай боложо,
би үдэртөө долоо дахин Таниие магтадагби.
165Хуулидатнай дуратайшуул угаа амар амгалан байдаг,
тэдэниие бүдэрүүлхэ зүйлшье байдаггүй.
166Эзэн, Танай абаралда найдадагби,
Танай захиралтануудые дүүргэдэгби.
167Сэдьхэлни Танай заабаринуудые сахин дүүргэдэг,
би тэдээндэ хизааргүй ехэ дуратайб.
168Би Танай захиралтануудые болон гэршэлгэнүүдые сахидагби,
юуб гэбэл, минии бүхы хэрэгүүд Танай урда байдаг.

ת Таав 169Эзэн, хашхархам Танда дуулдаг лэ.
Амалһанайнгаа дагуу намда ухаа хайрлыт.
170Гуйлтыем Өөрын урда байлгыт.
Амалһанайнгаа дагуу намайе абарыт.
171Намда зарлигуудаа заадаг ушарһаатнай
урални магтан байг лэ.
172Бүхы захиралтануудтнай зүб шударга ушарһаа
хэлэмни үгыетнай дуулаг лэ.
173Танай зарлигуудые шэлэһэн ушарһаам
Танай гар намда туһалхаар бэлэн болог лэ.
174Эзэн, би Танай абаралые хүсэн тэгүүлдэг,
хуулитнай минии баяр мүн.
175Таниие магтан байхым тула
сэдьхэлымни амиды байлгыт.
Тогтоолнуудтнай намда туһалаг лэ.
176Төөриһэн хониндол би замһаа хазагайрааб.
Зарасаа бэдэржэ олыт.
Юуб гэбэл, Танай захиралтануудые би мартадаггүйб.