Psa 142 | BxrBBL2024 | STEP | [Давидай псалма.] Эзэн, зальбаралым шагныт! Та найдамтайт – гуйлтымни соносыт! Та зүб шударгат

‏ Psalms 142

1 [Давидай псалма.]
Эзэн, зальбаралым шагныт!
Та найдамтайт – гуйлтымни соносыт!
Та зүб шударгат – намда харюусыт!
2 Өөрын зарасатай бү заргалдыт.
Юуб гэбэл, Танай урда хэншье зүб байхагүй.

3 Юуб гэбэл, дайсан хойноһоом намнажа, газар руу намайе дэбһээ,
үнинэй үхэһэн мэтээр намайе харанхыда байлгуулаа.
4 Һүлдэмни досоомни һулараа,
зүрхэмни досоомни тогтоо.

5 Урданай үе саг һананам,
Танай хэһэн хэрэгүүд тушаа бодомжолном,
Танай бүтээһэн зүйл тушаа бодоном.
6 Тан руу гараа һунганаб.
Сэдьхэлни ангаһан газар мэтэ Тан руу тэгүүлнэ.

7 Эзэн, намда түргөөр харюу үгыт!
Һүлдэмни һулараад байна.
Намһаа нюураа бү нюугыт!
Үгы һаатнай, би нүхэн руу буугшадтал адли болонолби.

8 Энэрэл хайра тухайгаа үглөөгүүр намда дуулгыт!
Ушарынь би Танда найданаб.
Ямар харгы замаар ябахым заагыт, ушарынь сэдьхэлээ Тан руу шэглүүлнэб.
9 Эзэн, дайсадһаамни намайе абарыт!
Хорохо газараа Танда бэдэрнэб.
10 Хүсэлыетнай яажа бэелүүлхые намда заажа үгыт,
юуб гэбэл, Та хадаа минии Бурхан мүн.
Танай һайн Һүлдэ намайе аюулгүй газар руу хүтэлэн гаргаха!
11 Эзэн, Өөрын нэрын түлөө намайе һэргээн амидыруулыт!
Өөрын зүб шударгаар сэдьхэлымни зоболонһоо гаргыт!
12 Энэрэл хайраараа дайсадымни усадхыт!
Амидаралдамни харша бүхы зониие һалгаагыт!

Юуб гэбэл, би Танай зараса мүн.