Psalms 26
1[Давидай зохёоһон.]Эзэн минии гэрэл туяа, абарални, хэнһээ айхабиб тиимэһээ?
Эзэн минии ами наһанай хамгаалалта, хэнһээ һүрдэхэбиб тиимэһээ?
2Намһаа үһөөгөө абаха һанаатайшуул,
дайсад болон муу муухай зон
бэеым залгихаа намда дүтэлбэл,
өөһэдөө бүдэрэн унаха!
3Дайсанай түмэн сэрэг намайе бүһэлбэшье,
би айхагүйб!
Дайн дажар урдаһаамни болобошье,
би этигэл найдалтай зандаа байхаб!
4Би бэдэрһэн нэгэл юумээ Эзэнһээ гуйнаб:
энэ хадаа Эзэнэй һайханиие хаража,
нангин үргөөдэнь харюу Тэрээнһээ хүлеэн,
наһан соогоо Эзэнэй үргөөдэ байһуулби.
5Гай зоболонгой үдэр Тэрэ намайе
Өөрын һарабша доро хоргодуулан хамгаалха,
Өөрын майхангай нюуса газарта намайе хоруулха,
намайе хада хабсагай дээрэ гаргаха.
6Тиихэдэнь тойроод байгаа дайсад дээгүүр
би үргэмжэлэгдэн, майхан соонь баясан,
үргэл болон магтаал үргэхэб,
Эзэндэ магтаалнуудые дуулахаб.
7Эзэн, минии дуу хоолой шагныт,
Таниие дууданаб, хайрлыт, харюу үгыт!
8«Намайе харахаяа эрмэлзэгты!» гэһэн
Танай үгэнүүдые һананаб.
Эзэн, Тан руу би шармайнаб.
9Намһаа буруу бү харыт!
Уурлан зарасаяа бү этэрыт!
Та минии туһамарша мүн!
Минии абарагша Бурхан,
намайе бү хаяыт, бү орхиит!
10Эсэгэ, эхэм намайе орхинхой,
харин Та нам тушаа һанаагаа зобохот!
11Эзэн! Өөрын зам намда заажа,
сэхэ харгыгаар дахуулыт!
Дайсадтамни зорюута энээниие хыт!
12Дайсадаймни зоргоондо намайе бү үгыт!
Худалаар гэршэлэгшэд урдаһаамни худал хэлэнэ,
намайе хардагшад хүсэрхэл хэхэеэ һанана.
13Амиды зоной түби дэлхэй дээрэ
Эзэнэй һайн һайханиие харахаб гэжэ этигэнэб.
14Эзэндэ найдан бай!
Хүсэ шадалтай бай,
Зүрхэншни зоригтой болог!
Эзэндэ найдан бай!
Copyright information for
BxrBBL2024