Psa 27 | BxrBBL2024 | STEP | [Давидай зохёоһон.] Минии аршалалта Эзэн, Таниие дууданаб! Дуугүй бү байгыт! Дуугүй байбалтнай, үхэһэн хүндэ адли болохолби.

‏ Psalms 27

1 [Давидай зохёоһон.]
Минии аршалалта Эзэн, Таниие дууданаб!
Дуугүй бү байгыт!
Дуугүй байбалтнай, үхэһэн хүндэ адли болохолби.

2 Тан руу туһаламжа гуйн дуудахадам,
эгээл нангин газар руутнай гараа һунгахадам,
гуйһан дуу хоолойем соносыт!
3 Хорото муу зонтой болон
гэм зэмэ үйлэдэгшэдтэй хамта
намайе бү шэрэн абаашыт, бү һалгыт!
Тэдэ хажуудахи зонтоёо амгаланаар хөөрэлдэжэ байһан аад,
сэдьхэлдээ муу муухай юумэ түсэблөөл.
4 Хэһэн хэрэгүүдынь, муу муухай үйлыень
өөһэдтэнь харюулыт!
Улаан гараараа хэгшэ юумэнэйнь түлөө амасуулыт!
Хүртэхэ юумынь хүртөөгыт!
5 Тэдэ Эзэнэй ажал хэрэгүүдые,
бүтээлнүүдыень ойшоодоггүй.
Энээнэй түлөө Эзэн тэдэниие усадхажа,
дахин бодхоохогүй.
6 Эзэн магтуулхань болтогой!
Тэрэ минии гуйһан дуу хоолой соносоол!
7 Эзэн болбол минии хүсэ шадал, минии бамбай мүн.
Зүрхэмни Тэрээндэ этигэдэг.
Тэрэнэй намда туһалһанда зүрхэмни баярлана,
өөрын дуу дуулан, Тэрэниие магтахаб.
8 Эзэн хадаа арад түмэнэйнгөө хүсэ шадал,
Өөрын шэлэһэн хаанда абарал, хамгаалалта мүн.
9 Өөрын арад түмэниие абарыт!
Угһаа Танай бүгэдые үреэгыт!
Тэдээндэ хонишон боложо,
тэдэниие хэтэ мүнхэдөө үргэжэ ябыт!