‏ Psalms 32

1Зүб шударга улад зон, Эзэн тухай баясан хүхилдэн байгты!
Сэхэ сэбэр зантай зоной Эзэндэ магтаал үргэхэнь угаа таатай.
2Ятагын ирагуу хүгжэмөөр Эзэндэ талархалаа үргэгты,
арбан утаһан морин хуураар Тэрээндэ магтаал дуулагты.
3Тэрээндэ шэнэ дуу дуулагты,
уранаар наадажа, баярай абяа хашхаран байгты!

4Юуб гэхэдэ, Эзэнэй үгэ зүб сэхэ,
бүхы хэрэгүүдынь үнэн шударга.
5Тэрэ зүб болон шударга байдалда дуратай,
дэлхэй энэрэл хайраарнь дүүрэнхэйл.

6Эзэнэй үгөөр тэнгэри,
аманайнь амисхалаар нара, һара, одо мүшэд бултадаа бүтээгдэнхэй.
7Тэрэ далайн уһые уута руу суглуулһандал суглуулаа,
гүн уһые суургалан хадагалаа.
8Бүхы дэлхэй Эзэнһээ айн һүрдэн байг,
юртэмсын бүхы оршин һуугаашад урдань шэшэрэлдэг лэ!
9Айладахадань, тэрэнь бүтэбэ;
захирхадань, бии болобо!

10Эзэн арадуудай түсэбые үгы хэдэг,
улад зоной зорилгые юуншье бэшэ болгодог.
11Эзэнэй шиидхэбэри хэтэ мүнхэдөө хубилхагүй,
тогтоолынь үеын үедэ байхал.

12Бурханиинь Эзэн байгааша арад жаргалтайл!
Өөрынь шэлэгшэ арад түмэн – угайнь!
13Эзэн тэнгэриһээ адаглажа,
бултыемнай харадаг.
14Өөрын байгаа һууриһаа Тэрэ
дэлхэйн бүхы оршин һуугаашадые харадаг.
15Бултанай оюун ухаа Тэрэ бүтээгээ,
бултанай хэрэгүүдые сүм мэдэдэг.
16Хүсэтэ олон сэрэгээр абарагдаха хаан гэжэ үгы,
агуу хүсөөрөө халхалагдаха баатар гэжэ байхагүй.
17Абарха гэжэ мориндо найдаха арга үгы,
ямаршье хүсэн зайсуулхагүй.
18Харагты, Эзэнэй нюдэд Өөрыень хүндэлдэг,
энэрэл хайрадань найдагшад руу ханданхай.
19Тэрэ тэдэниие үхэлһөө абарха,
үлэсхэлэн хооһон байдалай үедэ амиды үлөөхэ.

20Бидэнэй сэдьхэл Эзэниие хүсэн хүлеэнэ,
Тэрэ хадаа манай туһаламжа болон бамбай мүн.
21Тэрэнэй нангин нэрэдэ этигэдэг ушарһаа
манай зүрхэн баярлан байнал.
22Эзэн, маанадай Танда найдаһанай ёһоор,
энэрэл хайратнай бидэнтэй хамта байхань болтогой!