‏ Psalms 33

(1 Хаан 21:13-15)

1[Давид Абимээлэхэй урда галзуурһан дүрэ үзүүлжэ үлдүүлээд ябаһан үедөө зохёогоо.]
א Алээп 2Саг үргэлжэ Эзэниие үреэнэб,
магтаал үгэнүүд аманһаам һаладаггүй.
ב Бээт 3Һүнэһэм Эзэниие магтана.
Ядуу зон намайе шагнаад баярлахал.
ג Гиимэл 4Намтай хамта Эзэниие магтагты,
нэрыень хамта алдаршуулаял.

ד Даалэт 5Минии хандахада Тэрэ харюусаа,
бүхы аюулһаа намайе зайсуулаа.
ה Һээ 6Тэрээн руу хандан эрьегшэ зоной нюур шарай толорно,
эшэхэ байдал шарайдань үзэгдэхэгүйл.
ז Заайин 7Ядуу хүнэй дуудахада Эзэн дууладаг,
бүхы аюулһаа тэрэниие абардаг.
ח Хээт 8Эзэниие хүндэлдэг зониие тойрон,
Эзэнэй Эльгээмэл харуулда зогсоно, хамгаална.

ט Тээт 9Туршыта, Эзэнэй хэды ехэ һайн байһые үзэхэт,
Тэрээндэ найдагша хүн аза жаргалтайл.
י Ёд 10Эзэнэй гэгээн зон, Эзэниие хүндэлыт,
хүндэлдэг зон юугээршье дутахагүй.
כ Каап 11Арсалангуудшье үлэн хооһон байдал үзэдэг,
харин Эзэниие даган хүндэлэгшэд юугээршье дутадаггүй.
ל Лаамэд 12Үхибүүд, дүтэлэгты, намайе шагнагты,
Эзэниие яажа хүндэлхэб гэжэ би таанадые һургахаб.
מ Мээм 13Танай дундаһаа хэн амиды байха,
жаргалтай үдэрнүүдые үзэхэ һанаатайб?
נ Нүүн 14Тэрэ хүн муу үгэнүүдһээ хэлээ тэбшэн бариг,
худал хуурмаг яряанһаа амаа хизаарлаг.
ס Саамэх 15Муу муухайһаа буруу хаража,
һайн һайханиие үйлэдэг,
эб эеые бэдэрэн шармайжа,
энхэ тайбан байдалые найруулжа байг.

ע Аайин 16Эзэн үнэн сэдьхэлтэниие хаража байдаг,
тэдэнэй зальбаралнуудые дуулажа байдаг,
פ Пээ 17харин муу юумэ үйлэдэгшэдые
Тэрэ буруушаадаг,
тэдээн тушаа дурсалгашье үлэхэгүйл.

צ Цадээ 18Дуудаһан зониие Эзэн соносодог,
ямаршье гай гасаланһаа абардаг.
ק Кооп 19Эзэн болбол шанга сохилтодо нэрбэгдэһэн зоной хажууда байдаг,
урма зоригоо мохоһон зониие абархал.

ר Рээш 20Үнэн шударга хүниие олон гай тодхор амададаг,
гэбэшье бүхы гай аюулһаа Эзэн тэрэниие абардаг.
ש Шиин 21Бүхы яһыень бүтэн зандань
Эзэн байлгадаг, гансаханшье яһыень хухалуулхагүй.

ת Таав 22Нүгэлтэниие муу юумэн өөрөө усадхаха,
үнэн шударга хүниие үзэн ядагшад өөһэдөө хосорхо. 23Эзэн зарасанарайнгаа ами наһа абаран байха,
Тэрээндэ этигэгшэдэй хэнииньшье үхэхэгүй.
Copyright information for BxrBBL2024