‏ Psalms 37

1[Давидай псалма. Мартахагүйн тула шангаар.]
2Эзэн, уур хилэн соогоо намайе бү зэмэлыт,
уур сухал соогоо намайе бү хэһээгыт.
3Юуб гэхэдэ, годлинуудтнай намайе нэбтэ харбаа,
гартнай намайе доошоо дарана.
4Танай хилэнһээ боложо, бэедэм элүүр газар үгы,
нүгэлһөөм боложо, яһамни үбдэнэ.
5Юуб гэбэл, минии гэм буруу намайе толгойтойм хушаа,
хүндэ ашааень би даажа шадахагүйб.
6Минии толгой муутайһаа
шархануудни эдеэртэжэ, муухай үнэртэй болоо.
7Би бүхыгөөб, угаа доошоо тонгойгооб,
бүхэлиин үдэр гай гасалантай ябанам.
8Юуб гэбэл, бэемни халууржа байна,
бэедэм элүүр газар үгы.
9Би һуларааб, угаа доройтооб,
сэдьхэлэй шаналалһаа боложо ёолоноб.
10Эзэн Бурхамнай, бүхы хүсэлыем Та мэдэнэт,
һанаа алдахам Танһаа нюуса бэшэ.
11Зүрхэмни һалганана, хүсэгүй болооб,
нюдэндэм гэрэлшье харагдахаа болёо.
12Минии анда нүхэд, танилнуудни
хамшагһаамни зайлан байна,
түрэл гарални холодон зогсоно.

13Намайе алахаяа һанаашад урьха занга табина,
намда мууе хүсэгшэд минии эсэс тушаа ярилдана,
мэхэ гохо хэхэ тухай бүхэлиин үдэрөө хэлсэнэ.
14Харин би дүлии мэтэ дууланагүйб,
хэлэгүй хүн мэтэ амаа нээнэгүйб.
15Огто дуулахагүй, харюусажа шадахагүй
хүн шэнги болооб.
16Эзэн, Тандаал найданаб,
Эзэн Бурхамнай, Та харюусахат.

17Юуб гэхэдэ, «Буруу гэшхэхэдэм,
өөһэдыгөө намһаа дээгүүр тоолодог тэдэ
бү баярлаг лэ!» гэжэ хэлээб.
18Мэнэ-мэнэ унахаа байнам.
Үбшэмни хододоо намтай.
19Гэм буруугаа мэдэрнэм.
Нүгэл тухайгаа сэдьхэлээ зобоон байнам.

20Харин дайсадни амиды мэндэ, хүсэтэй болоно,
ямаршье шалтаггүй намайе үзэн ядагшад олошорно.
21Һайн руу эрмэлзэдэг туламни
туһые уһаар харюулдаг зон урдаһаам тулана.

22Эзэн Бурхамни, намайе бү орхиит,
намһаа бү холодыт!
23Абарални, Эзэмни,
яаран намда туһалыт!