Psa 38 | BxrBBL2024 | STEP | [Дуунай бүлэгэй хүтэлбэрилэгшэдэ, Едүтүүндэ. Давидай псалма.]

‏ Psalms 38

1 [Дуунай бүлэгэй хүтэлбэрилэгшэдэ, Едүтүүндэ. Давидай псалма.]
2 «Би хэлээрээ нүгэл хэхэгүйн тула
зам мүрөө сахихам.
Хорон муу хүнэй урдамни байха зуура
амаа хазаарлахам» гэжэ хэлээб.

3 Би аниргүй, үгэ дуугүй байгааб,
һайешье дуугараагүйб,
зоболомни бүри ехэ боложо байгаа.

4 Досоогоо гал дүрэлзэхые мэдэрбэб,
гүн ухаандам гал нособо,
тиихэдэнь би дуугаржа эхилбэб.
5 Эзэн, наһанайм эсэс хэзээ гээшэб,
хэды үдэр үшөө үлөөб,
хэды наһа наһалха гээшэбиб гэжэ намда мэдүүлыт.
6 Харыт, Та минии үдэрнүүдые тоолон хэмжээт.
Минии наһан Танай урда юуншье бэшэ.
Үнэндээ хүн бүхэнэй наһан нэгэ дахин амяа абаха агшам юм. [Хүгжэм]
7 Үнэндээ хүн һүүдэр мэтэ ябана,
дэмы юумэндэ оролдодог, суглуулдаг,
харин хэндэ суглуулһанаа мэдэхэгүй.
8 Мүнөө би юу хүлеэхэ гээшэбиб, Эзэмни?
Минии найдал – Тандаа.
9 Гэм бурууһаам намайе зайлуулыт,
тэнэг зоноор намайе бү зэмэлүүлыт.
10 Танай энэниие хэһэн ушарһаа
би хэлэгүй болооб, амаа нээнэгүйб.
11 Өөрын хэһээлтэһээ намайе зайлуулыт,
гарайтнай сохилто доро үгы болонолби.
12 Гэмэйнь түлөө зэмэлэн, Та хүниие хэһээнэт,
арюун юумэнь хибэндэл адли һалаха.
Үнэн дээрээ хүн бүхэн нэгэ амисхал юм. [Хүгжэм]
13 Эзэн, минии зальбаралые дуулыт,
минии хашхархада, шэхээ табиит.
Нулимсыем үзэн, абяагүй бү байгыт.
Би Танда ерүүл хүн,
үбгэ эсэгэнэртээл адли,
богонихон хугасаада
Танай гэртэ би айлшан мүн.
14 Мордожо ошохым, үгы болохым урда тээ
түр зуурашье һаа, баяр үзэхым тула
намайе бү хэһээгыт!