Psa 40 | BxrBBL2024 | STEP | [Дуунай бүлэгэй хүтэлбэрилэгшэдэ: Давидай псалма.]

‏ Psalms 40

1 [Дуунай бүлэгэй хүтэлбэрилэгшэдэ: Давидай псалма.]
2 Үгытэй хүн тушаа һанаагаа зободог хүн юрөөлтэй,
гай тодхорой үдэр Эзэн тэрэниие абархал.
3 Эзэн тэрэниие хамгаалха, ами наһыень аршалха,
газар дэлхэй дээр тэрэ юрөөлтэй ажаһууха.
Эзэн тэрэниие дайсадайнь зоргоондо үгэхэгүй.
4 Орондоо үбшэн хэбтэжэ байхадань,
Эзэн тэрээндэ тэнхээ үгэхэ,
үбшэнтэнэй хэбтээшэ орыень Эзэн хубилгаха.
5 «Эзэн, намайе хайрлыт,
намайе эдэгээгыт, юуб гэбэл, Танай урда нүгэл хээб!» гэбэб.
6 Харин дайсадни нам тушаа иигэжэ муу юумэ хэлсэнэ:
«Тэрэ хэзээ үхэжэ, нэрэнь дурдагдахаяа болихо гээшэб?».
7 Намайе эрьежэ ерэгшэ нэгэн худал хэлэнэ,
сэдьхэлдээ хорон муугаа хоноожо,
гарахадаа, бултанда тараана.
8 Намайе үзэн ядааша зон бултадаа
нам тушаа мууе түсэблэн шэбэнэлдэнэ:
9 «Тэрэ эдэгэхээр бэшэ үбшэн,
Хэбтэриин болоо, бэшэ бодохогүй».
10 Минии этигэдэг хүн,
намтай суг хамта хилээмэ эдижэ байһан хүн,
анда нүхэрнишье хүрэтэрөө
минии урдаһаа эсэргүүсэбэ.
11 Эзэн, Та намайе хайрлыт,
тэдэндэ харюу үгэхым тула намайе бодхоогыт.
12 Намайе диилэһэн тушаа дээрэм дайсанай хашхараагүй һаань,
Таниие нам тушаа һанаагаа табидаг гэжэ ойлгохоб.
13 Намайе үнэн сэхэ зандам үлөөжэ,
Өөрын урда хэтэ мүнхэдөө байлгахат.

14 Израилиин Эзэн Бурхан хэтын хэтэдэ юрөөлтэй!
Болтогой! Болтогой!