Psalms 41
1[Дуунай бүлэгэй хүтэлбэрилэгшэдэ: Коорахай уг удамай ирагуу үгэнүүд.]2Ангаһан бугын урасхал уһан руу эрмэлзэдэгтэл
минии сэдьхэл Тан руу эрмэлзэнэ, Бурхан!
3Сэдьхэлни Бурханаар, амиды Бурханаар ангажа байна.
Хэзээ ошожо, Бурханиие бараалхахабиб?
4«Бурханшни хаана байнаб?» гэжэ зоной хэлэхэдэ,
нулимсам үдэр, һүнигүй минии ундан болоо.
5Урдань би баяр тэмдэглэжэ байгааша зоной дунда ябажа,
баяртай, талархал үргэжэ байгааша
тэдээнтэй хамта Бурханай үргөө руу ошодог бэлэйб.
Энээниие һанахадаа, сэдьхэлни уйлажа байна.
6Сэдьхэлни, юундэ сүхэржэ байнаш?
Юундэ уйданабши?
Бурханда найда! Би Тэрэниие үшөө магтан дуулахаб,
Тэрэ бол минии Абарагша, минии Бурхан мүн.
7Сэдьхэл досоомни сүхэрнэ,
Тиимэһээ би Таниие Иордан нютаг дээр,
Хэрмоон хадаһаа, Мицаарһаа дурсанам.
8Хүрхэрээнүүдэйтнай дуугаар гүн далайнууд бэе бэеэ дуудадаг.
Танай долгид, бүхы дабалгаанууд дээгүүрни гараал.
9Эзэн үдэртөө Өөрын энэрэл хайрые харуулна,
Тэрээндэ зорюулһан дуун,
амидаралайм Бурханда зальбарал,
һүниндөө амандам байна.
10Би Бурханда, өөрын Хамгаалагшада, иигэжэ хэлэхэб:
Юундэ намайе мартаабта?
Юундэ би дайсанай доромжололһоо боложо гашуудан байнабиб?
11Яһыем хухалһан мэтэ,
дайсадни намайе үдэр бүри
«Бурханшни хаана гээшэб?» гэжэ наадална.
12Сэдьхэлни, юундэ сүхэржэ байнаш?
Юундэ уйданабши?
Бурханда найда! Би Тэрэниие үшөө магтан дуулахаб,
Тэрэ бол минии Абарагша, минии Бурхан мүн.
Copyright information for
BxrBBL2024