‏ Psalms 48

1[Дуунай бүлэгэй хүтэлбэрилэгшэдэ: Коорахай уг удамай зохёоһон. Псалма.]
2Бүхы арадууд, шагныта!
Газар дэлхэйн бии оршогшод, анхарыт,
3юрын болон онсошье зон,
баян, үгытэйшье хамтадаа!
4Минии аман сэсэн мэргэн үгэ хэлэхэ,
минии ухаанай бисалгал ойлгоходо туһалха.
5Һургаал үгэдэ шэхээ табихаб,
удхыень бүтүүлэн хэлэһэнээ ятагын дууряалгаар тайлахаб.

6Гэм буруу тойроод байхада,
зобохо зүдэрхэ үдэртөө би юунһээ айхабиб?
7Өөһэдын хүсэ шадалда найдажа,
элбэг-дэлбэг баялигаараа һайрхагша таанад,
8ямаршье хүн ямаршье аргаар
аха дүүгээ абаржа шадахагүй,
тэрэнэй түлөө түлбэри Бурханда үгэжэ шадахагүйл.
9Түлбэринь угаа ехэ!
Мүнхэдөө түлэбэшье, барашагүй,
10хэтэдээ хэн нэгэнэй амидархын тула,
хүүр булашаа харахагүйн тула.
11Сэсэн мэргэн зоншье мунхаг, тэнэг зондол үхэнэ, хосорно,
ондоо зондо баялигаа орхино гэжэ таанад харанат.
12Тэдэ досоогоо «гэрнүүднай мүнхэ,
оршохо газарнай үеһөө үедэ манай байха» гэжэ бододог.
Газар уһаяа тэдэ өөһэдын нэрээр нэрлээл.
13Харин хүн хүндэлүүлжэ хододоо байхагүй,
үхэдэг амитадтал адлил.

14Иимэл даа, мунхаг зондо найдагшадай,
ухаагүй зоной үгэдэ этигэгшэдэй харгы зам! [Хүгжэм]
15Тэдэ хонидтол Үхэлэй орон руу туугдан оруулагдаха,
Үхэл тэдэнэй хонишон болохо,
үнэн сэхэ зон үглөө тэдэниие захирха,
бэень шалзаран һалаха, хүүр гэрынь болохо.
16Харин Бурхан намайе абажа,
Үхэлэй оронһоо абарха. [Хүгжэм]

17Хүнэй баян боложо,
гэр оронойнь эд зөөриин олошорхо үедэ бү айгаарай.
18Юуб гэбэл, үхэхэдөө, тэрэ юушье абаад ябахагүй,
алдар солоньшье хойноһоонь дахан ошохо бэшэ.
19Юуб гэхэдэ, амиды байхадань баяр хүргэбэшье,
тэниглэн байхадаш бусад шамайе магтадаг шуу –
20гэрэл хэзээшье харахагүй элинсэг хулинсагтаа
тэрэ заабол ошохол.
21Агууехээр хүндэлэгдэбэшье, ухаагүй хүн хадаа
үхэхэ табилантай адагуусандал адли мүн.