‏ Psalms 49

1[Асаапай псалма.]
Бурханай Эзэн Бурхан айладан,
наранай мандаха зүгһөө жаргаха зүг хүрэтэрнь
бүхы газар дэлхэйе дуудана.
2Үзэсхэлэн һайханай эгээл дээдэнь болохо Сионһоо
Бурхан Өөрыгөө харуулан заларна.
3Бурхамнай заларна!
Тэрэ абяа шэмээгүй бэшэ.
Урдань гал бушаганана,
тойроод – һалхи шуурган.
4Өөрын арад түмэниие шүүхын тула
Тэрэ дээдэ тэнгэриие болон газар дэлхэйе дуудана:
5«Минии үнэн зониие Нам руу суглуулагты!
Тэдэ үргэлэй аргаар Намтай хэлсээ баталһан юм».
6Тэнгэри Тэрэнэй зүб шударгые тунхаглана,
юуб гэхэдэ, Бурхан Өөрөө шүүгшэ мүн. [Хүгжэм]
7– Арад зомни, намайе шагнагты, Би айладахам!
Израиль, Би шинии урдаһаа гэршэлэн гэмнэхэб,
Би хадаа Бурхан, шинии Бурхан мүн.
8Үргэлнүүдһээш боложо шамайе зэмэлхэгүйб,
түгэс шатаалта үргэлнүүдшни хододоо урдамни байна.
9Би шамһаа залуу бухыешье,
хашааһааш хусыешье абахагүйб.
10Юуб гэбэл, ойн бүхы амитад,
мянгаад толгойдо бэлшэгшэ мал – Минии.
11Хада уулын шубуу бүхэниие мэдэдэгби,
хээрэ талын амитад бултадаа Минии.
12Би үлдэжэ байгаашье һаа, шамда айладахагүй һэм,
юуб гэбэл, дэлхэй болон тэрэниие дүүргэгшэ бүхэн – Минии.
13Би бухануудай мяха эдидэг,
хусануудай шуһа уудаг юм гүб?!
14Би Дээдэ Бурхан мүн!
Гансал Намда Талархалай үргэл үргэ
болон Намда амалһанаа бэелүүл!
15Зоболонто үдэртэ намайе дуудахадашни
Би шамайе абархаб, ши Намайе хүндэлэн алдаршуулхаш.

16Харин хорото муу хүндэ Бурхан иигэжэ айладаха:
Минии хуули ёһонуудым зарлан,
хэлсээем амандаа юундэ байлганаш?
17Өөрөө заабариим үзэн ядана,
үгэнүүдым тооногүй бшууш!
18Хулгайшаниие харахадаа баярланаш,
забхайрагшадтай нэгэдэнэш.
19Аманшни бузар мууе хэлэнэ.
Хэлэншни мэхэ гохо зохёоно.
20Һуугаад, аха дүүгээ муулан дуугарнаш,
эхынгээ хүбүүе худалаар хардажа байнаш.
21Шинии энээниие хэхэдэ, Би аниргүй байгааб.
Ши Намайе өөртэйгөө адляар бодоош.
Үгы, шамайе гэмнэжэ, бурууеш элирүүлэн харуулхаб.
22Намайе мартагшад, энээн тухай бодогты.
Үгы һаатнай, таһа татажа хаяхаб, абарха хэншье байхагүй.
23Талархалай үргэл үргэгшэ нэгэн Намайе хүндэлнэ,
үйлэ хэрэгээ заһан-сахин байгаашада Би, Бурхан, абарал үршөөхэб.