Psalms 5
1[Дуунай бүлэгэй хүтэлбэрилэгшэдэ: лимбын дууряалга доро. Давидай псалма.]2Эзэн! Үгэнүүдыем дуулыт!
Һанаа алдахым анхарыт!
3Хаамни, Бурхамни, хашхарааем шагныт!
Би Танда зальбаржа байнаб.
4Эзэн! Үглөө бүри Та намайе дуулажа байнат.
Үглөө бүри би найдал дүүрэн урдатнай байнам.
5Муу хүндэ Та дурагүй Бурханта,
нүгэлтэй хүн Танай хажууда байжа шадахагүй!
6Һайрхадаг зон урдаһаатнай хаража шадахагүй,
муу муухай хэрэг үйлэдэгшэдые Та үзэн яданат,
7гүжэр үгэ хэлээшэдые усадхахат,
алууршан, худалшан Танда жэгшүүритэй муухай.
8Танай хайраар би гэр руутнай орохоб,
нангин Һүмэдэтнай шэшэрэн-айн һүгэдэхэб.
9Эзэн! Өөрын үнэн зүб замаар намайе хүтэлэн ябыт!
Дайсадтамни харша болгон, харгыем дардам сэхэ болгыт!
10Дайсад үнэн зүб юумэ хэлэдэггүй.
Сэдьхэлдэнь – үхэл хатал,
ама хоолойнь – үхэлэй зам руу татадаг,
хэлэниинь билдагануур.
11Бурхан, тэдэниие хэһээгыт!
Һанамжалһан юумэнь өөһэдэйнь толгой дээр бууг!
Нүгэлтэй тэдэниие намнажа үлдыт!
Тэдэ Таниие буруушаана бшуу!
12Танай аршалан байгаа зон хүхилдэн байг лэ!
Тэдэнэй хамгаалагшань Танай байһанда
тэдэ хэтэ мүнхэдөө хүхин байг!
Нэрэдэтнай дуратай зондо Та баяр хүхилдөөн болонот.
13Эзэн, Та үнэн шударга хүниие үреэхэт,
бамбайгаар мэтэ үршөөлөөрөө тэрэниие халхалхат!
Copyright information for
BxrBBL2024