‏ Psalms 50

(2 Хаан 11:1–12:23)

1[Дуунай бүлэгэй хүтэлбэрилэгшэдэ: Давидай псалма.
2Давидай Бат-Шээбэтэй унтаһанай дараа лүндэншэ Натаан тэрээн руу ерээ һэн, тиихэдэ Давид энээниие зохёогоо бэлэй.]
3Бурхан, энэрэл хайраараа
Та намайе хайрлыт!
Үршөөл ехэтэй Та
алдуу эндүүем арилгыт!
4Гэм бурууһаам намайе һайса угаажа,
нүгэлһөөм намайе сэбэрлыт!

5Юуб гэбэл, би алдуутайгаа мэдэнэм,
нүгэлни ходо урдам байна.
6Танай урдаһаа, гансал Танай урдаһаа нүгэл үйлэдөөб,
Танай нюдэнэй урда бузар мууе хээб.
Тиимэһээ Та шиидхэбэреэ айладахадаа тон зүбта,
зарга шүүбэритнай зүб шударга.

7Харыт даа, гэм буруугай дунда би түрөөб,
нүгэл соо эхэмни намайе оложо тээгээ.

8Харин Та сэдьхэлэйнгээ гүндэ үнэн байхые хүсэдэгта,
Өөрын сэсэн мэргэн ухаае намда үзүүлээт.

9Минии нүгэлые эсообоор арюудхыт, арюун болохоб,
намайе угаагыт, сэбэр болохоб.
10Баярай, хүхилдөөнэй абяа дууе намда соносуулыт,
Өөрын хухалһан яһые Та баясуулыт.
11Нүгэлһөөм толгойгоо хазагайруулыт,
минии бүхы гэм бурууе арилгыт.
12Бурхан, досоомни сэбэр сэдьхэл түхөөгыт,
досоомни үнэн сэхэ һүлдэ шэнэлыт.
13Өөрын хажууһаа намайе бү үлдыт,
Өөрын Нангин Һүлдые намһаа бү абыт.
14Танаар абарагдаха баяр намда һэргээгыт,
хүсэлэнтэ Һүлдөөр намайе тэдхыт.

15Гэм буруутай зондо Танай харгы зам заахаб,
нүгэлтэйшүүл Тан руу эрьехэл.
16Бурхан, абаралайм Бурхан,
намайе шуһата табиланһаа абарыт!
Хэлэмни Танай зүб шударгые баяртай магтахал.
17Эзэн, минии амые нээгыт!
Амамни Таниие магтахал.

18Үргэхэ һэм, харин Та үргэл хүсэнэгүйт,
түгэс шатаалта үргэл Танда таалагданагүй.
19Бурханда үргэхэ үргэл хадаа гэмэлтэһэн һүлдэ мүн,
гэмэлтэһэн сэдьхэлые Бурхан буруушаахагүй.

20Өөрын дураар Сиондо һайе үйлэдыт,
Иерусалимай хэрэм барижа бодхоогыт.
21Тиигээд Та зүб шударга болохын тула үргэл –
түгэс шатаалта үргэл, бүтэн шатаалта үргэл – хүсэн абахат.
Тиихэдэ үргэлэй шэрээ дээрэтнай залуу буханууд үргэгдэхэ.