‏ Psalms 52

(Псал 13)

1[Дуунай бүлэгэй хүтэлбэрилэгшэдэ: үлеэдэг хүгжэмтэ зэмсэгэй дууряалга доро. Давидай ирагуу үгэнүүд.]
 2Мунхаг хүн сэдьхэлдээ «Бурхан үгы» гэжэ һанана.
Зон һальхай һамуун хэрэгүүдые хэнэ,
муу муухай, жэгшүүритэй юумэ үйлэдэнэ.
Һайн хэрэг хэдэг хүн байхагүй.
 3Юумэ ойлгодог, Бурханиие бэдэрдэг хүн бии гү
гэжэ мэдэхэеэ Бурхан тэнгэриһээ зон руу харана.
 4Бүхы зон хамта замһаа хадуураа,
бүгэдөөрөө забхайралдаа.
Һайн хэрэг хэдэг хүн байхагүй,
нэгэшье үгы.
 5Муу юумэ хэдэг тэдэ юушье ойлгодоггүй юм гү?
Хилээмэ эдиһэндэл адляар минии арад түмэниие зооглонол,
Бурханиие дууданагүй.
 6Аймаар бэшэ газарта тэдэ угаа ехээр айха.

Юуб гэбэл, шинии урдаһаа тулагшадай яһые Бурхан сасаха,
Тэдэ эшхэбтэр байдалда орохо, юуб гэхэдэ, Бурхан тэдэниие тообогүй.
 7Израилиин абарал Сионһоо ерэхэнь болтогой!
Арад зоноо баряанһаа Бурханай бусаахада,
Яков баярлаха, Израиль баясаха!
Copyright information for BxrBBL2024