‏ Psalms 54

1[Дуунай бүлэгэй хүтэлбэрилэгшэдэ: хүбшэргэйтэ зэмсэгэй дууряалга доро. Давидай зохёоһон ирагуу үгэнүүд.]
2Бурхан, зальбаралым соносыт,
гуйхадамни, саашаа бү харыт.
3Намайе анхаран дуулажа, харюусыт.
Би тодхор соогоо шаналан,
ёолон байнаб.
4Энэ дайсанай дуу хоолойһоо,
хорото муу хүнэй дарлалтаһаа мүн.
Ушарынь гэбэл, тэдэ хээгүй юумым нам дээр тохоно,
уурлан намайе үзэн ядана.
5Досоомни зүрхэм доһолжо,
үхэлтэ аймшаг намайе бажуугаал.
6Айдаһан, шэшэрээндэ абтажа,
яахаяашье мэдэнэгүйб.
7«Тагтаа мэтэ жэгүүртэй байха байгааб!
Ниидэн ошожо, амарха һэм.
8Харагты даа, холын холо руу ябажа,
сүл губида байрлаха һэм.
9Хуй һалхи, шуурганһаа хорохо газар руу
яаран ошохо бэлэйб», – гээб.

10Эзэн, тэдэнэй дунда худхаляа үймүүлыт,
хэлэнүүдыень худхалдуулыт.
Юуб гэбэл, хотодо хүсэрхэл, эбгүй байдал обёоржо байнаб.
11Тэдэ үдэр, һүнигүй хэрэм хана дээгүүрнь тойроод ябана,
досоонь буруу ябадал, гай тодхор!
12Хотын дунда үхэл хатал,
хара худал болон мэхэ гудамжануудһаань һаланагүй.
13Ушарынь гэбэл, энэ хадаа дайсамни намайе доромжолно бэшэ,
тиигээ һаань, би тэсэхэ һэм.
Намайе үзэн ядагша дээгүүрни өөрыгөө үргэнэ бэшэ,
тиигээ һаань, би тэрээнһээ хорохо байгааб.
14Харин ши, намтай адли ши,
минии анда нүхэр, дүтын хүмни!
15Хамта һайхан зугаа дэлгэжэ,
Бурханай нангин үргөө руу хамта ябагша бэлэйлди…

16Дайсад дээр үхэл гэнтэ бууг лэ!
Үхэлэй орон руу тэдэ амидыгаар ошог!
Юуб гэбэл, байра соонь, тэдэнэй дунда муу муухай оршонол.
17Бурханиие дуудахадам,
Эзэн намайе абарха.
18Үглөө, үдын тэнгээршье гуйн хашхархаб,
Тэрэ минии дуу хоолойе дуулаха.
19Дайсадай хэды олон байгаашье һаань,
минии урдаһаа бодогшодһоо намайе абархал.
20Хэтын хэтэһээ шэрээ дээрэ заларагша Бурхан
соносожо, тэдэниие номгоруулха. [Хүгжэм]
Юуб гэбэл, тэдэ өөһэдөө зоргоороо юумэ хэдэг, Бурханһаа айдаггүй.
21Өөһэдтэйнь энхэ тайбан байгаашадай урдаһаа гараа далайжа,
тэдэ хэлсээгээ эбдээ.
22Яряа хүүрынь сүсэгыһээ нялуун,
харин һанаандань – дайлал.
Үгэнүүдынь тоһонһоошье зөөлэн,
харин һугалһан бэлэн һэлмэ мэтэл!
23Ашаагаа Эзэндэ даалга, Тэрэ шамайе дүнгэхэ,
зүб шударга хүниие Тэрэ хэзээдэшье гунхуулхагүй!

24Бурхан, Та дайсадые үхэлэй нүхэн руу унагаахат,
шуһаар жүрөөдэгшэ, мэхэшэ зон наһанайнгаа хахадыньшье эдлэхэгүй.

Харин би Тандаал этигэнэб.