Psalms 55
(1 Хаан 21:10-15; 27:1-4)
1[Дуунай бүлэгэй хүтэлбэрилэгшэдэ: холодо эмэ тагтаагай аниргүй байгаа тухай. Пилиштын зоной Гаадта Давидые бариха үедэ тэрэ энээниие бэшээ бэлэй.]2Эзэн, намайе хайрлыт!
Зон намайе залгихаяа һананал,
бүхэли үдэрөө намда добтолон,
намайе харшалнал.
3Дайсадни намайе залгихаар бүхэлиин үдэр бэдэрнэ.
Юуб гэбэл, урдаһаам бардамлан добтологшо тэдэ олуулаа юм.
4Айжа байхадаа би Тандал найданаб.
5Бурхандал найданаб,
үгыень магтан байнаб, айнагүйб.
Хүн намда юу хэжэ шадаха юм?
6Бүхэли үдэрөө тэдэ үгыем ондоо болгоно,
намда муу юумэ хэхэеэ һанаашална.
7Добтолхоор бэлдэн тэдэ маряана,
Ами наһыем абахаяа алхам бүхэниием ажаглан байна.
8Хорон муугайнгаа түлөө тэдэ харюусахагүй юм аал?
Хилэнсэглэн, Бурхан, зониие номгодходог бэлэйлта!
9Минии зоболон тушаа Та мэдэхэгүй юм гүт?
Сурхирса уйлахым дууланагүй юм гүт?
Ном соотнай минии зоболон бэшэгдээгүй юм гү?
10Бурханиие дуудаһан үдэртэм
дайсадни һөөргөө сухарина,
Бурхан минии түлөө гэжэ энээнһээ ойлгоноб.
11Үгыень магтадаг Бурхандаа,
үгыень магтадаг Эзэндээ,
12Бурхандаа найданаб, айнагүйб.
Хүн намда юу хэжэ шадахаб даа?
13Бурхан, тангаригаа бэелүүлхэб,
Танда магтаал үргэхэб.
14Юуб гэбэл, Та намайе үхэлһөө абараат,
мүн хүлыем бүдэрхэһөө һэргылээт,
Танай, Бурханай, урда,
амиды юумэ гэгээрүүлэгшэ Гэрэлэй урда,
ябахымни тула!
Copyright information for
BxrBBL2024