‏ Psalms 67

1[Дуунай бүлэгэй хүтэлбэрилэгшэдэ. Давидай псалма. Дуун.]
2Бурхан бодожо, дайсад тунан үгы боложо,
Өөрыень үзэн ядагшад зугадаг лэ!

3Утаанай тунадагтал, тэдэниие тунаан үгы болгыт.
Гал дүлэнһөө дабирхайн хайладагтал,
Бурханай урда муу муухай зон хосорог лэ!
4Харин үнэн шударга зон хүхиг!
Бурханай урда тэдэ баярлаг,
хүхилдэн хөөрэн байг лэ!

5Манай Бурханиие магтан дуулагты,
нэрэдэнь магтаал үргэгты,
Тэнгэреэр Ябагшада замынь заһагты!
Тэрэнэй нэрэнь – Эзэн.
Урдань баясан байгты!
6Тэрэ үншэн хэнзэнүүдэй ба бэлбэһэн эхэнэрнүүдэй эсэгэ.
Бурхан Өөрын нангин байра соо.
7Гансаардаһан зондо Бурхан гэр байра болон гэр бүлэ үршөөдэг,
баряанда байгшадые гэнжэһээнь сүлөөлдэг.
Харин буһалгаата зон сүл губида үлэг лэ!

8Бурхан! Арад түмэнэйнгөө урда ябахадатнай,
сүл губиие гаталхадатнай [Хүгжэм]
9газар доһолон байгаа,
огторгойһоо хура бороо адхараа,
Синайн Бурханай урда,
Бурханай, Израилиин Бурханай урда.

10Бурхан, Та хура бороо мэтээр хэшэгээ урасхуулаат,
орон нютагайнгаа зобон зүдэрхэдэ
Та тэрэниие дүнгөөт.
11Танай һүрэг мал энэ дэлхэй дээр бэлшэнэ.
Та, Бурхан, үгытэй хүндэ хэрэгтэйень бэлдэнэт.
12Эзэн үгэеэ эльгэнэ,
айладхагшадынь түмэн сэрэг мэтэ олон!

13Түмэн сэрэгэй хаашуул зугадана, зугаданал!
Харин ши, гэртээ үлөөшэ, олзо хубаагыш!

14Таанад түүдэгэй һуурида хэбтэбэл.
Тагтаагай далинууд мүнгэн,
үдэнүүдынь алтан!
15Түгэс Хүсэтын энэ дэлхэйн хаашуулые намнахада,
Цалмоон дээр саһан сайжа байгаа бэлэй.

16Бурханай хада, Башаан хада!
Үндэр хада, Башаан хада!
17Үндэр хада ууланууд,
Бурханай оршохо, Эзэнэй хэтэдээ оршодог хада руу
юундэ иигэжэ харанабта?

18Бурханай дайшалхы тэргэнүүд үй түмэн,
Эзэн тэдэнэй дунда.
Синайн Бурхан арюун нангин газарта.

19Та үндэр газарта дабшан гараат,
баряан руу зониие туугаат,
эсэргүүсэгшэ зонһоо ясаг абаат,
тэндэ байра байдал зохёогоот,
оо, Эзэн Бурхан!

20Үдэрһөө үдэртэ Эзэн үреэлтэй байг!
Тэрэ манай ашаа даажа ябана,
Бурхан – манай абарал! [Хүгжэм]
21Бурхан маанадта абарагша Бурхан юм.
Үхэлһөө зайлаха гээшэ Эзэн Бурханай мэдэлэй.

22Бурхан дайсадайнгаа толгойе,
гэм ходо хэжэ байгаашын толгойн оройе няса сохихо.

23«Би тэдэниие Башаанһаа бусаахаб,
далайн гүнһөө гаргахаб», – гэжэ
Эзэн айладаа бэлэйл.
24Энэ хадаа дайсадай шуһанда шинии хүлөө,
нохойнуудайш хэлээ дүрөөхын тула бэлэйл.

25Бурхан, Танай заларан ерэлгэ,
Бурханайм, Хаанайм нангин газарта залархань харагдана.
26Урдань дуушад,
хойнонь хүгжэмшэд,
дундань хэсэ хэнгэрэг сохиһон залуу эхэнэрнүүд.
27Израилиин үри һадаһад,
Эзэн Бурханиие ехэ суглаанай дунда магтан дуулагты!
28Тэндэ – одхон Бэньямиин түрүүлнэ,
Иудын ноёд өөһэдын түмэн зонтой,
Зэбүлүүнэй ноёд, Напталиигай ноёд.

29Бурхан, Өөрын хүсэндэ,
бидэндэ туһа болгон эльгэдэг хүсэндээ захирыт!

30Танай нангин үргөөдэ, Иерусалимда,
хаашуул Танда бэлэгүүдые асарха.
31Хулһан соо байгааша амитанда,
хүсэтэ бухануудай – арадуудай һүрэгтэ занаарайт.
Хүлдэ һүгэдэн унаг, мүнгэ асараг!
Дайгаар жүрөөдэһэн арадуудые тараан үлдөөрэйт.
32Египедһээ элшэн сайдууд ерэхэ,
Эфиопи Бурхан руу гараа һунгаха.

33Дэлхэйн хан түрэнүүд!
Бурханда магтаал үргэгты!
Эзэниие магтагты! [Хүгжэм]
34Тэрэ эртэ урдын огторгой тэнгэридэ мордоод заларан ябана.
Анхарыт, һүрөөтэй дуу хоолойгоор захирна.
35Бурханда алдар соло дуулагты!
Хүсэниинь Израилиие аршалһан нэмэргэ мэтэ,
хүсэ шадалынь үүлэн дээрэ байна.

36Бурхан, Израилиин Бурхан,
Та нангин газартаа һүрдэмөөр байнат!

Тэрэ арадтаа хүсэ, шадал үршөөдэг.
Бурхан магтагдаха болтогой!