‏ Psalms 68

1[Дуунай бүлэгэй хүтэлбэрилэгшэдэ: «Сараана» гэдэг аялга, Давидай зохёоһон.]
2Бурхан, намайе абарыт,
юуб гэбэл, ехэ уһан аминдамни хүрэжэ байнал.
3Би гүнзэгы намагта шабагдааб,
хүлөө табиха газар үгы.
Гүнзэгы уһанда орооб,
түргэн урасхалда абтааб.

4Хашхарһаар би ехэ хүсэгүй болооб,
хоолоймни хаташоо.
Бурханаа хүлеэһээр
нюдэдни һохор боложо байна.
5Ямаршье шалтаггүй аад, намайе үзэн ядагшад
толгойн үһэнһөөмни олон байна.
Зүб бэшэ аад, намайе мүрдэгшэд хүсэтэй.
Хулгайлаагүй юумэеэ бусааха ёһотойлби.

6Бурхан! Та минии мунхаг тэнэгые мэдэнэт,
буруу байһамни Танһаа нюуса бэшэ.

7Минии буруу Танда этигэдэг зониие
эшхэбтэр байдалда бү оруулаг,
Түмэн Сэрэгтэ Эзэн Бурхан!
Минии буруу Таниие бэдэрэгшэ зониие
эшхэбтэр байдалда бү оруулаг,
Израилиин Бурхан!

8Юуб гэбэл, би Танай түлөө
шэбшэг муухай байдал тэсэн байнаб,
нюурыем эшэгүүр бүглөөд байна.
9Аха дүүнэртээ хариин хүн мэтэ болооб,
тэдээндэ гадаада хүн болооб.
10Танай Гэртэ дуратай байһамни намайе дүлэн мэтээр бадараана,
Таниие доромжолһон баһалтанууд нам дээрэ буугаа.
11Би масаг барин сэдьхэлдээ уйлааб,
иигэжэ баһажа-наадалуулжа байбаб.
12Гашуудалай хубсаһа үмдэжэ,
ябаган зугаа болооб.
13Хотын бартаануудай хажууда нам тухай хэлсэнэ,
һогтуу зоной дуун соо дурдагданаб.
14Эзэн, таатай сагта зальбарални Танда шэглэдэг,
Бурхан, агуу энэрэл хайраараа,
үнэн абаралаараа намда харюулыт.
15Намайе намагһаа татан гаргыт, бү шэнгүүлыт.
Дайсадһаа, гүн ехэ уһанһаа абарыт.
16Урасхалда намайе бү абтаагыт,
гүн уһан намайе бү шэнгээг,
Дээгүүрни нүхэнэй аман бү хаагдаг лэ.
17Та үнэн сэхэ ба энэрхы сэдьхэлтэйт, намда харюусыт!
Угаа ехэ үршөөлтэй Та нам руу эрьеыт!
18Өөрын богоолһоо буруу бү харыт,
Юуб гэбэл, би зоболондо абтаад байнаб. Түргөөр намда харюусыт!
19Дүтэлыт, ами наһым абарыт,
дайсадайм урдаһаа зорюута намайе абыт.
20Намайе яажа буруу болгон хэлэдэгые,
эшхэбтэр байдалда оруулан доромжолдогые Та мэдэнэт.
Минии дайсад бултадаа Танай урда.
21Намайе буруу болгон хэлэдэгынь зүрхыем эмтэрүүлжэ, ехэ зобоод байнам.
Хэн нэгэн намайе хайрлаха гэһэмни, хэншье үгы.
Сэдьхэлым тэгшэрүүлхэ нэгэниие харагшалхадам, хэншье байхагүй.
22Эдеэн гэжэ намда хоро үгэнэ.
Ангажа байхадам, уксус уулгана.
23Тэдэнэй урда байгааша эдеэнэй шэрээнь тэдэндэ занга болог лэ,
амгалан тайбан хоол барилгань урьха болог лэ.
24Тэдэ хаража шадахаа болиг, нюдэниинь балартаг,
бэрхэшээл зоболонгуудта дарагдан
хэтын хэтэдэ тахииг лэ!
25Уур хилэнсэгээ тэдээн дээр адхыт,
дүрэлзэн байгаа ууртнай тэдээн дээр бууг лэ!
26Гэр байрань хооһорог,
майхануудтань хэншье ажаһуухаа болиг!
27Юуб гэбэл, Танай шархатуулһан хүниие тэдэ шахан намнан байна,
Танай хадхаһан зондо тэдэ үшөө зоболон ушаруулна.
28Нүгэл дээрээ нүгэл хэһыень һануулыт,
Танай урда тэдэ зүб бү болог.
29Амиды мэндэ зоной номһоо тэдэ хаһагдан аршагдаг,
зүб шударга зонтой хамта бү бэшэгдэг.

30Харин би үгытэй ядууб, зобожо байнам.
Бурхан, абаралтнай намайе өөдэнь үргэг лэ!
31Бурханай нэрые дуугаар магтахаб,
үгэ хэлэн, Тэрэниие үргэмжэлхэб.
32Энэ бол Бурханда
эбэртэй, туруутай буха үргэлһөө
үлүү зохид байхал.
33Ядуу зон энэниие харахадаа хүхилдэхэ,
Бурханиие бэдэрэгшэдэй зүрхэн һэргэн амидырхал.
34Юуб гэбэл, Бурхан ядаржа байгаашадые дууладаг,
шорондошье байгаа Өөрын зониие анхаралаараа орхихогүй.
35Тэнгэри ба газар,
далай болон тэндэ амидарагша бүхэн
Тэрэниие магтахань болтогой!
36Бурхан Сиониие абарха, Иудын хотонуудые бодхоохо,
зон тэндэ дахяад һуужа,
өөрын газарые эзэмшэн байхал.
37Зарасанарайнь уг удам тэрэниие уг залгамжалжа,
Тэрээндэ дуратайшуул тэндэ оршон һуухал.