‏ Psalms 70

(Псал 30:2-4)

1Эзэн, би хорохо газар Танһаал бэдэрнэб.
Хэзээшье эшхэбтэр байдалда намайе бү оруулыт,
2зүб шударгаараа намда туһалыт, абарыт!
Намайе дуулыт, зайлуулыт!
3Намда хабсагай, аршалалта,
хододоо хорохо газарни болыт!
Минии абаралта тухай захирыт,
юуб гэбэл, Та бол минии хабсагай, хэрэмни мүн!
4Бурхамни, муу муухай хүнһөө,
гэм хэгшэһээ, хэрзэгы дарлагшаһаа намайе зайлуулыт.
5Юуб гэбэл, Та, Эзэн Бурхан, минии найдал,
эдир наһанһаа эхилжэ найдагшамни болонот.
6Эхын умайда бүрилдэһэнһөөм хойшо минии түшэг гээшэт,
умайһаа намайе гаргаат, хододоо Таниие магтан байхаб.
7Олондо би жэшээ болооб,
Та минии бата тулгуубари мүн.
8Аманһаам Танда магтаал гарана,
үдэр бүри Танда алдар үргэнэб.
9Үбгэрхэ үедэм намайе бү орхиит,
хүсэ шадалайм буурахада, намайе бү хаяыт.
10Дайсад нам тушаа хэлсэжэ,
үхэхыем хүлеэнэ, зүбшэнэ.
11Тэдэ иигэжэ хэлсэнэ: «Бурхан тэрэниие орхёо. Намнагты!
Баригты, юуб гэбэл, абарха хэншье байхагүй!»
12Бурхан, хажуу тээшээ болоод бү байгыт!
Бурхамни, туһалхаа яарыт!
13Намайе үзэн ядагшад аягүй байдалда орог, үгы болог!
Намда мууе һанагшад эшхэбтэр байдалда орог, доромжологдог!

14Харин би хододоо Танда найдажа ябахаб,
дахяад Таниие магтан байхаб.
15Үдэр бүри Танай зүб шударгые магтахаб,
Намайе абархадаа юу хэһыетнай тунхаглахаб,
харин бүгэдые тооложо боломоор бэшэ олон юм.
16Танай хүсэн тушаа хөөрэхэб,
Танай ори гансаараа зүб шударга тухай!
17Бурхан, бага наһанһаам эхилэн намайе һурганат,
би Танай гайхамшагта хэрэгүүдые мүнөөшье хүрэтэр магтан байхаб.
18Үбгэрхэ, буурал болоходомнишье намайе бү орхиит!
Танай шадалые зондо тунхаглахаб,
хүсыетнай ерэхэ үенүүдтэ хөөрэхэб.
19Бурхан, Танай зүб шударга тэнгэри тулама.
Хэһэн үйлэ хэрэгүүдтнай агууехэ.
Бурхан, Тандал адли хэншье байхагүй!
20Хэды олон зоболон намда үзүүлээ гээшэбта!
Харин намайе дахин-дахин һэргээжэ,
газарай гүнһөө татан гаргадаг байгаат.
21Дахяад намайе үргыт, һанааем тэгшэрүүлыт.
22Би ятагаар дууряалан Таниие магтахаб,
Бурхамни, Танай үнэн сэхые дуулахаб!
Ятагаар наадан, Таниие магтахаб, Израилиин Арюун!
23Танда дуулахадаа амамни баярлана,
Танай абарһан сэдьхэлни баясана.
24Үдэр бүри хэлэмни Танай үнэниие тунхаглана,
юуб гэбэл, намда мууе һанаашад доромжолуулжа шоодбори болоол!