Psalms 78
1[Асаапай псалма.]Бурхан, хариин зон Танай угай зөөри руу ерээл.
Тэдэ нангин үргөөетнай бузарлаа,
Иерусалимые һандарал болгоо.
2Богоолнуудайтнай бэе шубуу шонхорто эдишэ болгон,
гэгээн зонойтнай бэе ан арьяатануудта үгөөл.
3Тэдэнэй шуһые уһан мэтээр Иерусалимые тойрон урасхуулаа,
тэдэниие хүдөөлүүлхэ хэншье байгаагүй.
4Бидэ хүршэнэртөө энеэдэ наадан болообди,
тойроод маанадые баһана, шоо үзэнэ.
5Эзэн! Хэзээ болотор уурлахабта? Хэтэдээ юм гү?
Уур хилэнтнай гал мэтэ хэды болотор дүрэлзэн байхаб?
6Таниие мэдэдэггүй арадууд руу,
нэрыетнай дуудадаггүй хан түрэнүүд руу уураа хандуулыт.
7Юуб гэбэл, тэдэ Яковые залгижа,
байра байдалынь хооһоруулаа.
8Элинсэгэймнай нүгэлые маанадта бү ашыт,
Өөрын энэрэл хайрые бидэндэ үзүүлыт,
ушарынь угаа зобоод байналди.
9Маанадые абаржа байгаа Бурхан,
Өөрын нэрын алдар солын түлөө бидэндэ туһалыт!
Өөрын нэрын түлөө бидэниие абарыт, нүгэлымнай хүлисыт!
10«Бурханиинь хаана юм?» гэжэ үндэһэтэд юундэ хэлэжэ байха юм?
Богоолнуудайтнай шуһа урасхуулһанай түлөө яажа хэһээдэгыетнай
манай хараһаар байтар тэдэ үндэһэтэд үзэг лэ!
11Шорондо байгаашадай ёолохонь Танда дуулдаг,
үхэхэ ёһотой зониие агууехэ хүсэ шадалаараа абарыт!
12Эзэн, Таниие баһаһанайнь түлөө баһалтыень
хүршэнэртэмнай долоо дахин үлүүгээр бусаагаарайт!
13Харин бидэ, Танай арад түмэн, Танай бэлшээриин хонин һүрэг,
Таниие мүнхэ алдаршуулан байхабди,
үеһөө үедэ Танда магтаал үргэхэбди.
Copyright information for
BxrBBL2024