Psa 80 | BxrBBL2024 | STEP | [Дуунай бүлэгэй хүтэлбэрилэгшэдэ: гиттит гэжэ хүбшэргэйтэ зэр зэмсэгэй дууряалга доро. Асаапай зохёоһон.]

‏ Psalms 80

1 [Дуунай бүлэгэй хүтэлбэрилэгшэдэ: гиттит гэжэ хүбшэргэйтэ зэр зэмсэгэй дууряалга доро. Асаапай зохёоһон.]
2 Манай хүсэн болохо Бурханиие магтан дуулагты,
Яковай Бурханда баяртай хашхаралдагты.
3 Дуу дуулагты, хэсэ сохигты,
элдэб янзын ятаг дээрэ наадагты.
4 Һарын шэнэдэ үхэр бүреэ үлеэгты,
арбан табанай һарада – һайндэртээ.

5 Юуб гэбэл, энэ Израильда зорюулһан зарлиг,
Яковай Бурханай тогтоол мүн.
6 Тэрэ Египедэй нютагаар ябажа байхадаа
энэ зарлигые Иосифто үгэһэн юм.

Урдань дуулаагүй иимэ хоолой соносоо бэлэйб:
7 Тэрэ иигэжэ хэлэжэ байгаа: Мүрнүүдһээшни хүндэ ашаа буулгааб,
гарнуудыш арагһаа сүлөөлөөб.
8 Гай тодхорто ороод, ши Намайе дуудааш, Би шамайе сүлөөлөөб,
туулган хара үүлэн сооһоо шамда харюусааб.
Би шамайе Мэрибаагай уһанай хажууда туршааб.
9 Арад түмэмни! Уряаем дуулыш!
Израиль, Намайе шагна!
10 Таанарай дунда хариин бурхан бү байг.
Таанар ямаршье хариин бурханда мүргэхэ ёһогүйт.
11 Би шинии Эзэн Бурхан мүн.
Египедэй газар дайдаһаа шамайе гаргааб.
Амаа ангай, Би шамайе эдеэлүүлхэб.
12 Теэд арад түмэмни Намайе дуулабагүй,
Израиль Намайе дахабагүй.
13 Тиимэһээ Би тэдэниие дураараа ябуулхын тула
зүрхыень үсэд зандань үлөөгөөб.
14 Минии арад түмэн Намайе дуулажа,
Израиль Минии зааһан замаар ябаа һаань, хэды һайн һэм!
15 Дайсадынь тэрэ дары номгоруулха һэм,
дарлагшад руу гараа һунгаха һэм.
16 Дайсадынь Эзэнэй урда билдагуушалжа эхилхэ һэн,
тэдэнэй хэһээлтэнь хэтэ мүнхын байха бэлэй.
17 Таанадые эрхим шанартай шэниисээр хооллуулха,
таанадай түлөө хабсагайһаа зүгын бала урасхуулха һэм!