Psalms 81
1[Асаапай псалма.]Бурхан бурхадай суглаанда бодожо,
тэдээн тушаа иимэ зарлиг тунхаглаа:
2«Хэды болотор таанар буруу шүүбэрилхэбта,
хорото муу зоной талые баримталхабта?! [Хүгжэм]
3Ядуу болон үншэн хэнзые аршалагты,
зобоһон-тулиһан болон үгытэй зониие зүбөөр шүүжэ байгты.
4Ядуу болон үгытэйе абарагты,
хорото муу зоной һабарһаа мултаруулагты!»
5Харин тэдэ ойлгоогүй, мэдэрээгүй!
Харанхыда ябана!
Дэлхэйн һуури хүдэлбэ!
6Би таанадта хэлээ бэлэйб: «Таанад – бурхад гээшэт,
бултадаа Дээдэ Эзэнэй хүбүүдта.
7Харин таанар хүнүүдтэл адли үхэхэт,
алишье ноёндол адли унахат».
8Бурхан, бодыт! Дэлхэйе шүүбэрилыт!
Бүхы арадууд – Танай эзэмшэл мүн.
Copyright information for
BxrBBL2024