Psalms 85
1[Давидай зальбарал.]Эзэн, шэхээ табиит, харюусыт намда,
юуб гэбэл, би үгытэй болон угаа ядуу мүн.
2Танда этигэдэг байһандам
ами наһым хамгаалыт.
Танда найдадаг Өөрын зарасые абарыт, Бурхамни!
3Эзэн, намайе хайрлыт,
юуб гэбэл, бүхэлиин үдэрөө Таниие дууданаб.
4Өөрын зарасын сэдьхэл баясуулыт,
Юуб гэбэл, Эзэн, Танда ами наһаа даалганаб.
5Юуб гэбэл, Эзэн, Та һайн ба нигүүлэсхыт,
Таниие дуудагша бүхэндэ энэрэл хайраар дүүрэнта.
6Эзэн, мааниием дуулыт,
зальбарһыем анхарыт.
7Зоболонто үдэрөө Таниие дууданаб,
юуб гэбэл, Та намайе дуулахат.
8Танда адли Бурхан байхагүй,
Тандал адли үйлэ хэрэгүүд байхагүй.
9Танай бүтээһэн арадууд бултадаа ерэжэ,
Танай урда һүгэдэхэ, Эзэн!
Танай нэрэ алдаршуулха.
10Юуб гэбэл, Та агууехэт,
гайхамшагта хэрэгүүдые бүтээдэгта.
Та гансаараал Бурхан мүн.
11Эзэн, намайе Өөрын замаар шэглүүлыт,
Танда үнэн сэхээр ябахалби,
Танай нэрые хүндэлдэг байхыем
зүрхэ бодолым шангадхан байгыт.
12Үнэнхэ зүрхэнһөө, Эзэн Бурхамни, Таниие магтанаб,
нэрыетнай хэтэ мүнхэдөө алдаршуулан байхалби.
13Юуб гэбэл, нам руу шэглүүлһэн Танай энэрэл хайра агууехэ:
Үхэлэй ороной гүнһөө минии сэдьхэл абараат.
14Бурхан, дээрэлхүү зон урдаһаам бодожо,
муу муухай зон намайе алахаар бэдэрнэ.
Өөһэдын урда тэдэ Таниие залаагүй.
15Харин Та, Эзэн Бурхан, үршөөлтэйт, нигүүлэсхыт,
удаан тэсэбэритэй, энэрэл хайраар болон үнэнөөр элбэгта.
16Нам руу эрьеыт, намайе хайрлыт,
Өөрын зарасада хүсэеэ хайрлыт,
Өөрын зарасые абарыт.
17Намда һайн байһанайнгаа дүлгэ тэмдэгые үзүүлыт.
Намайе үзэн ядагшад хараад, эшэг лэ,
юуб гэхэдэ, Та, Эзэн, намда туһалаат, намайе тайбшаруулаат.
Copyright information for
BxrBBL2024