‏ Psalms 87

1[Дуулал. Коорахай уг удамай псалма. Дуунай бүлэгэй хүтэлбэрилэгшэдэ: үлеэдэг хүгжэмтэ зэмсэгэй дууряалга доро, зоболон тушаа хүгжэм. Эзраахай Һэмаанай ирагуу үгэнүүд.]
2Намайе абардаг Эзэн Бурхан,
үдэр, һүнигүй Таниие дууданаб.
3Зальбарални Тан руу ошог лэ,
гуйхадам шэхээ табиит.

4Юуб гэхэдэ, сэдьхэлни зоболоноор дүүрэнхэй,
ами наһам Үхэлэй орондо ойртоол.
5Нүхэн руу буугшад шэнги болооб,
хүсэгүй хүндэл адлиб.
6Үхэһэн зоной дунда хаягдаһан,
агы нүхэн хуурсаг руу табигдаһан үхэнхэй хүндэл адли болооб.
Та тэдээн тухай дахин һанахагүйт,
тэдэ Танай мэдэлэй бэшэ.

7Та намайе угаа гүнзэгы нүхэндэ,
харанхы газарта, гүн руу табяат.
8Уур хилэнтнай намайе хүндөөр дараа.
Өөрын уур сухалай долгёор намайе зобоогоот. [Хүгжэм]
9Нүхэдым намһаа холодуулаат,
тэдэ намһаа жэрхэнэ.
Би шорондо мэтэ зобоноб, гаража шадахагүйб.
10Зоболоной нёлбоһодһоо боложо
нюдэмни һулараа.
Бүхэли үдэрөө Таниие, Эзэн, дууданаб,
Тан руу альгаа дэлгэнэб.

11Та үхэһэн зондо гайхамшаг үйлэнүүдые үзүүлхэ юм гүт?!
Һүүдэр болоһон зон бодожо, Таниие магтаха юм гү?! [Хүгжэм]
12Танай энэрэл хайра булашада,
Танай үнэн зүб үмхэй газарта тунхаглагдаха юм гү?!
13Танай гайхамшагта үйлэнүүд харанхыда мэдэгдэхэ юм гү?!
Зүб шударгатнай марталгын газарта ойлгогдохо юм гү?!
14Эзэн, би Таниие дууданаб!
Эртэ үглөө зальбарални Танай урда ерэхэл.
15Эзэн, юундэ Та намайе орхёобта?
Юундэ намһаа буруу хараат?

16Би залууһаа зобоноб, үхэхэ туйлдаа хүрөөб,
Танай хэрзэгыһээ боложо хүсэгүй болонхойб.
17Уур хилэнэйтнай долгин намайе бүдэрөөгөө,
Танай эльгэһэн аймшагууд намайе һүнөөнэ,
18үдэр бүри намайе уһандал хүреэлнэ,
тэдэ хамтадаа намайе бүһэлөө.
19Та амарагыем болон анда нүхэдыем намһаа зайлуулаат,
минии танил тала – харанхы.