‏ Psalms 9

1[Дуунай бүлэгэй хүтэлбэрилэгшэдэ: «Хүбүүнэйнгээ орондо үхэ» гэһэн аялга. Давидай псалма.]
2Эзэн, үнэнхэ зүрхэнһөө Танда һайниие хүргэнэб,
гайхамшагта хэрэгүүдыетнай тунхагланаб.
3Тан тушаа баярлан, баясан байнаб,
Дээдэ Бурхан, нэрыетнай магтан дууланаб.

4Эрьехэдэтнай, дайсадни һөөргөө сухарижа,
бүдэрэн унаба, хосорбо!
5Иигэжэ Та минии заргалдаан, шүүхын хэрэг шиидхээт,
сэнтиидээ залараат, Үнэн шударга шүүгшэ!
6Арадуудые номгоруулаат, хорото муу зониие усадхаат,
тэдээн тушаа дурсагдахашье юумэн үгы болоо.
7Дайсад хэтэдээ һандаргагдан һалаа,
хотонуудыень үндэһөөрнь абажа хаяат,
тэдээн тушаа юуншье һануулнагүй.

8Эзэн хэтэ мүнхэдөө хааншалан байха.
Зарга шүүбэри ябуулхын тула Тэрэ шэрээгээ дэлгээ.
9Бүхы дэлхэйе Тэрэ үнэн шударга шүүбэрилхэ,
арадуудые шударга сэхээр шүүбэрилхэл.
10Дарлагдаад байгаа хүндэ Эзэн хорохо газар,
бэрхэшээлтэй сагта хоргодохо газар болохо.
11Нэрыетнай мэдэдэг зондо Та этигэл найдалынь гээшэт,
юуб гэбэл, Таниие бэдэрэн дагагшадые орхидоггүйт.

12Сиондо оршодог Эзэндэ магтаал дуулагты,
хэһэн үйлэ хэрэгүүдынь зоной дунда тунхаглагты.
13Шуһа урдахуулагшадһаа үһөөгөө Тэрэ абадаг, һанажа байдаг,
зобогшодой ёолоон хашхараае мартадаггүй.

14Эзэн, намайе үршөөгыт! Дайсад намайе зобоожо байнал, харыт!
Үхэлэй хаалгаһаа намайе бодхоонот.
15Юунэй түлөө бэ гэхэдэ,
Сионой хаалгануудта Таниие магтан байхым тула.
Намайе абарһандатнай баясан байхаб!

16Үндэһэтэнүүд өөһэдын малтаһан нүхэндэ унаа,
өөһэдын нюуһан торон зангада хүлөөрөө орошоо.
17Иигэжэ Эзэнэй зарга эли тодо болоо,
хорото муу хүн өөрын торон зангада ороо! [Хүгжэм]
18Бурханиие мартадаг бүхы үндэһэтэнүүд –
хорото муу зон Үхэлэй орон руу бусаха.
19Үгытэй хүн хэтэ мүнхэдөө мартагдаа бэшэ,
ядуу зонһоо найдалынь мүнхэдөө таһараа бэшэ!

20Эзэн, заларыт! Хүнэй бардамынь бү илаг лэ!
Үндэһэтэнүүд Танай зарга шүүлгэндэ ерэг лэ!
21Эзэн, тэдэниие айлган һүрдүүлыт,
яяр хүнүүд гээшэлди гэжэ үндэһэтэн мэдэдэг байг лэ! [Хүгжэм]
22Эзэн, юундэ Та холо зогсонобта,
бэрхэшээлтэй сагта харагданагүйбта?

23Бардам зантай хорото муу хүн ядуу хүниие намнажа хойноһоонь ябана.
Өөрынгөө зангада тэрэ өөрөө орог лэ!
24Муу хүн дуратай юумэ абажа шадахаараа һайрхажа,
хомхой хүн Эзэниие хараажа, Тэрээнһээ буруу хаража байна гээшэ.
25Тэрэ бардамаар хаража,
«харюусалга гэжэ байхагүй, Бурхан үгы» гэжэ һанадаг.
26Бүхы замынь амжалтатай байдаг.
Танай шиидхэл тэрээнһээ холо, үндэр,
бүхы дайсадынь тэрээндэ юуншье бэшэ.
27«Би оройдоошье бүдэрхэгүйб,
үеын үедэ гай зоболонтой ушархагүйб» гэжэ тэрэ һанадаг.

28Амандань – хараал, мэхэ, худал,
хэлэндэнь – һаад түбэг, хорон һанаан.
29Тэрэ амадаха газарта һуудаг,
нюуса газарта гэмгүй хүниие аладаг,
ядуу хүниие гэтэн бэдэржэ байдаг.
30Нүхэндөө байгаа арсалан шэнги
тэрэ нюуса газарта хорожо, маряажа,
31ядарһан хүниие барижа шэрэхэеэ хэбтэдэг.
Тиигээд ядарһан нэгэниие торон зангадаа оруулжа баридаг.
32Бэеэ хуряан, маряажа, һүрэн унахадань,
азагүйшүүл хүсэтэй һабартань ородог.
«Бурхан мартамхай, буруу хараад байна,
юушье харанагүй» гэжэ тэрэ хорото хүн һанадаг.

33Эзэн, бодыт! Бурхан, гараа һунгыт!
Ядуу зон тухай бү мартыт!
34Хорото муу хүн Бурханиие юундэ хараана бэ?
Харюусалгада татахагүй гэжэ Тан тухай һанана гү?
35Теэд Та харанат, гай тодхор, зоболон ажагланат.
Өөрын гараар бүхы юумэнэй түлөө харюулхат!
Ядуу хүн өөрыгөө Танда үгэнэ,
үншэн хэнзын туһалагша гээшэт.
36Хорото муу юумэ хэжэ,
бузар үйлэдэжэ байгаашын гарые хухалаад,
хорон мууень элирүүлээд,
олохын арагагүй болотор мууень үгы хыт!

37Эзэн хадаа хэтэ мүнхэдөө Хаан юм.
Газар нютагһаань хариин зон усадхагдаха.
38Эзэн, Та даруу номгон зоной хүсэл соносоо бэлэйт.
Зүрхыень зоригжуулжа, шэхээ табин шагныт!
39Иигэжэ дэлхэй дээрэ дарлалта үүдхэдэг зоной үгы болохын тула
үншэн болон ядуу зоной түлөө оролсыт!