Rom 12 | BxrBBL2024 | STEP | Зай, аха дүүнэрни, Бурханай үршөөл хайраар өөһэдыгөө арюун сэбэр, таатай, амиды үргэл болгон Бурханда асарагты гэжэ гуйнаб. Тиигэбэл, тэрэтнай танай бодото алба болохо.

‏ Romans 12

Бурханда алба хэн амидаралга

1 Зай, аха дүүнэрни, Бурханай үршөөл хайраар өөһэдыгөө арюун сэбэр, таатай, амиды үргэл болгон Бурханда асарагты гэжэ гуйнаб. Тиигэбэл, тэрэтнай танай бодото алба болохо. 2 Энэ дэлхэйн зондо адли бү байгты, харин ухаан бодолоо шэнэлүүлэн, өөһэдыгөө бүрин хубилгагты. Тиигэбэл таанад Бурханай эрхэ мэдэлые: Тэрээндэ таалагдама, зохистой, эрхим түгэс байхые мэдэжэ байхат.

3 Бурханай намда үршөөһэн абьяас бэлигэй ашаар таанадай хүн бүхэндэ хэлэнэб: байһанһаан үлүү ехээр өөр тухайгаа бү һанажа байгты. Зүгөөр Бурханай шамда үгэһэн этигэл һүзэгэй хэмжээгээр өөр тухайгаа дарууханаар бодомжолжо байгты. 4 Манай ганса бэедэ олон эрхэтэнүүд байна, тиин бэеын эрхэтэн бүхэн ондо ондоо зорилготой юм. 5 Тон тиигэжэл бидэ олоншье байһан мүртөө бултадаа Христоостой хамта нэгэ бэе болонобди, тиин бидэ нэгэ бэеын ондо ондоо эрхэтэнүүдтэл адли бэе бэетэйгээ холбоотойбди. 6 Тиимэһээ Бурханай маанадта хайрлаһан элдэб янзын абьяас бэлигүүдээ хэрэглэнэбди. Хэрбээ Бурханай хэлэһые дамжуулха абьяас бэлигтэй байгаа һаа, һүзэгэйнгөө хэмжээгээр лэ хүргэхэ ёһотойбди. 7 Бусад зондо алба хэхэ табилантай һаа, алба хэхэ ёһотойбди; һургаха табилантай һаа, һургаха ёһотойбди; 8 бусадые урмашуулха табилантай һаа, урмашуулха ёһотойбди. Бусадтай хубаалсажа байгаа һаа, бардам баянаар хубаалсагты; хүтэлэгшэ юм һаа, бүхы хүсэ шадалаараа захиржа байгты; буян үйлэдэбэл, баяртайгаар буян үйлэдэгты.

9 Хүнүүдтэ үнэн зүрхэнһөө дуратай байгты; нүгэлтэ юумэнүүдһээ зайсагты; үлзы дэмбэрэлтэй юумэндэ эрмэлзэжэ байгты. 10 Бэе бэедээ аха дүүнэртэйл адляар дуратай байгты, бусад зониие өөрһөөн дээгүүр хүндэлэгты. 11 Эзэндэ урматайгаар, оролдосотойгоор алба хэжэ байгты. 12 Найдалаараа урмашажа, зоболон бэрхэшээлнүүдтэ тэсэбэритэй байжа, саг үргэлжэ зальбаржа байгты. 13 Дуталдажа байһан һүзэглэгшэдтэй хубаалсажа, аяншадые гэртээ оруулан хүндэлжэ байгты.

14 Таанадые хашан мүрдэжэ байһан хүнүүдые үреэжэ, хараалгүйгөөр үреэжэ байгты. 15 Баяр жаргалтай байһан зонтой баярлажа, уйлажа гашуудажа байһан зонтой гашуудажа байгты. 16 Хоорондоо нэгэ һанал бодолтой һуугты. Омогорхол бахархалгүйгөөр юрын хүнүүдтэй нүхэсэгты. Өөһэд тухайгаа сэсэн ухаантайбди гэжэ бү бодогты.

17 Таанадта муу юумэ хэһэн хүндэ харюудань муу юумэ бү хэгты. Харин хүн бүхэнэй һайн гэжэ бододог юумэ бүтээхэеэ оролдогты. 18 Хүн бүхэнтэй эбтэй эетэй байхые хэшээжэ, бүхы шадалаараа шармайгты. 19 Аха дүүнэр, үһөөгөө абахые бү һэдэгты, харин Бурханай уур сухалда тэрэнээ даалгагты. «Би үһөөгөө абахаб, Би харюулхаб гэжэ Эзэн хэлэнэ», – гээд Нангин Бэшэг соо бэшээтэй байдаг. 20 «Үлэсхэлэн дайсанда эдеэ үгэ, ангаа һаань, ундалуула. Иихэдээ ши тэрэнэй толгой дээрэ шатажа байһан нүүрһэ обоолнош», – гэжэ Нангин Бэшэг соо баһа хэлэгдэнэ. 21 Харатай муу юумэн шамайе бү илаг, харин орондонь ши харатай муу юумые үлзытэй хэрэгээр илажа бай.