Rut 2 | BxrBBL2024 | STEP | Наомиида үбгэнөөрнь түрэл болохо Бооһаз гэжэ хүн бии һэн. Тэрэ хүндэтэй, баян, Элимээлэхэй угай бэлэй.

‏ Ruth 2

Рүүт Бооһазай таряалан дээрэ

1 Наомиида үбгэнөөрнь түрэл болохо Бооһаз гэжэ хүн бии һэн. Тэрэ хүндэтэй, баян, Элимээлэхэй угай бэлэй. 2 Моһааб Рүүт Наомиида:

– Таряалан руу ошохыемни намайе табиит. Хэн нэгэнэй зүбшөөбэл, хойноһоонь ябажа, унаһан хоолос түүхэб, – гэхэдэнь, Наомии тэрээндэ:

– Басагамни, ошо даа, – гэбэ.

3 Иигэжэ тэрэ ябажа, таряа хадагшадай хойноһоо дахажа, унажа үлэһэн хоолос түүбэ. Яба ябаһаар тэрэ гэнтэ Элимээлэхэй угай Бооһазай таряалангай хуби дээрэ ерэшэһэн байба.

4 Тиигэһээр Бооһаз Бэтлэһээмһээ ерэжэ, таряа хадагшадта:

– Эзэн таанартай хамта оршохонь болтогой! – гэхэдэ, тэдэ:

– Эзэн таниие үреэхэнь болтогой! – гэжэ харюусаба.

5 Таряа хадагшадай ажал хинагша зарасаһаа Бооһаз:

– Энэ хэнэй басаган бэ? – гэжэ асууба. 6 Таряа хадагшадай ажалай түлөө харюусалгатай зарасань:

– Тэрэ Моһааб нютагһаа Наомиитай хамта бусажа ерэһэн моһааб залуу эхэнэр юм. 7 «Таряа хадагшадай хойноһоо ябажа, боолтонуудай хоорондуур унаһан хоолос түүхыемни зүбшөөгыт», – гэжэ намайе гуйгаад, хара үглөөнһөө мүнөө болотор тэрэ ажаллажа байна, һарабша доро амархань үсөөн, – гэжэ харюусаба.

8 Бооһаз Рүүдтэ иигэжэ хэлэбэ:

– Басагамни, шагна. Хаягдаһан хоолос түүхэеэ ондоо таряалан руу бү ошо, эндэһээ бү холодо, минии шэбэгшэ эхэнэрнүүдтэй хамта үлэ. 9 Тэдэнэй хадаха таряалангые хаража, хойноһоонь ябаарай. Шамайе үлдэжэ болохогүй гэжэ би зарасанартаа захирааб. Ангахадаа, минии зарасанарай удхаһан һабаһаа уугаарай.

10 Рүүт газарта хүрэтэр доро дохижо, тэрээндэ:

– Минии хариин хүн байгаашье һаа, та юундэ намда иимэ энэрхыгээр ханданабта? Би яагаад танай талархалда хүртөө гээшэбиб? – гэбэ. 11 Бооһаз тэрээндэ харюусан:

– Үбгэнэйнгөө наһа бараһанай дараа шинии хадам эжыдээ хэһэн бүхы юумые, эхэ, эсэгэеэ, түрэһэн нютагаа орхижо, урид хэзээшье мэдээгүй арад түмэн руу ерэһэн тухайшни намда зон дуулгаа һэн. 12 Энэ хэрэгэйшни түлөө Эзэн шагнахань болтогой! Израилиин Эзэн Бурханһаа ерэхэ шагналынь дүүрэн байха болтогой! Тэрэнэй дали доро хоргодохо газар бэдэрэн ерээш, – гэбэ. 13 Тиихэдэнь тэрэ:

– Эзэмни, та намда угаа энэрхыгээр хандабат. Намтай зохидоор хөөрэлдэжэ, һанаа сэдьхэлыем заһабат. Харин би танай али нэгэн шэбэгшын шэгшыдэшье хүрэхэгүй гээшэлби, – гэбэ. 14 Эдеэ хоол бариха сагай ерэхэдэ, Бооһаз тэрээндэ:

– Наашаа дүтэлөөд, хилээмэнһээ эди, тэрэнээ уксуста дүрөөд эди, – гэбэ. Тиихэдэнь тэрэ таряа хадагшадай хажууда ерэжэ һууба. Бооһаз тэрээндэ хуураһан орооһо үгэбэ. Рүүт эдижэ садаад, заримыень үлээбэ. 15 Тиигээд тэрэ бодожо, үлэһэн хоолос суглуулхаяа ошобо. Бооһаз зарасанартаа иигэжэ захирба:

– Таряанай боолтонуудай хоорондууршье тэрэ суглуулаг, бү доромжологты тэрэниие. 16 Таряа бооходоо, хоолос унагаажа, тэрээндэ үлөөгты. Суглуулаг, бү тэрэниие хараагты.

17 Иигэжэ Рүүт үдэшэ болотор унаһан хоолос түүбэ. Түүһэн таряагаа сохиходонь, нэгэ эфаа болобо. 18 Энээнээ абаад, тэрэ хото руу ошожо, хадам эжыдээ харуулба. Тиигээд үнөөхи эдижэ садаһанайнгаа удаа үлөөһэн эдеэгээ гаргажа, хадам эжыдээ үгэбэ. 19 Хадам эжынь тэрээндэ:

– Хаягдаһан хоолосые хаана мүнөөдэр түүбэш? Хаана ажаллабаш? Шам тушаа һанаагаа табиһан хүн юрөөлдэ хүртэхэнь болтогой! – гэбэ. Иигээд Рүүт хэнтэй ажаллаһан тухайгаа хадам эжыдээ хөөрэжэ:

– Минии ажаллаһан таряалангай эзэнэй нэрэнь Бооһаз, – гэжэ хэлэбэ. 20 Наомии бэридээ:

– Амиды болон нүгшэһэншье зониие энэрэлээрээ орхидоггүй Эзэн тэрэ хүниие үреэхэнь болтогой! Тэрэ хүн болбол бидэндэ ойрын түрэлэй хүн, бидэниие худалдан абаха эрхэтэнэй нэгэн юм, – гэжэ хэлэбэ. 21 Моһааб Рүүт:

– Тэрэ хүн үшөө «Минии зарасанарай бүхы ургасые хуряажа дүүргэтэр тэдэнэй хажууһаа бү холодоорой» гэжэ намда хэлээ, – гэбэ. 22 Наомии Рүүт бэридээ:

– Басагамни, тэрэ хүнэй шэбэгшэнэртэй хамта гарахашни һайн, ондоо таряалан дээрэ ябабалшни, шамда үсэрэлдэжэ болохо бшуу, – гэжэ хэлээ һэн. 23 Иигэжэ Рүүт хаягдаһан хоолос түүхын тула ешмээн болон шэниисэ хуряаха ажалай дүүрэтэр Бооһазай шэбэгшэ эхэнэрнүүдһээ холодобогүй. Тэрэ хадам эжытэеэ хамта ажаһууһан зандаа байгаа.