Song of Solomon 4
Хүбүүн:1Инагни, ши үзэсхэлэн гоёш!
Яахын арагагүй уран гоёш!
Гивлүүрэй саана ▼
▼ Заншалай ёһоор, хадамлагдаад байһан басаган түрэ хуримай үедэ нюураа гивлүүрээр бүтээдэг байгаа.
хоёр нюдэдшнисагаан тагтаа мэтэ энхэрэн нюугданхай.
Хөөбэр үһэнэйш намилзан хүдэлхэнь
Галаад хадаһаа уруудан ябааша
ямаан һүрэгэй зэрэлгээн мэтэл.
2Дун сагаан шүдэдшни
һаяхан нооһоо хиргуулаад,
голһоо гараһан хонид мэтэ.
Хундан сагаан тэрэ хонид
бултадаа эхир хурьгатай,
нэгэньшье һубайраагүй.
3Уян гоё уралшни
улаан тууза мэтэ үнгэ тодо.
Булай хөөрхэн аманшни
дура буляама һайхан.
Унжаһан гивлүүрэй саанаһаа
улаа бутарма хоёр хасаршни
таһалан хубааһан анар жэмэс мэтэ
харахада үзэсхэлэн гоё.
4Хүзүүншни Давид хаанай мянгаад бамбайтай самхаг мэтэ,
хэрэм мэтэ һүрөөтэй.
Дээрэнь хүсэтэй эрэшүүлэй
мянган бамбай үлгөөтэй.
5Хоёр хөөрхэн хүхэншни
сараана сэсэгэй дунда бэлшэдэг
һалашагүй эхир инзагад мэтэ хөөрхэн.
6Үүрые угтаһан һалхинай һэбшээлжэ,
һүниин һүүдэрэй һүнэн зайлатар
гүгэлэй һайхан үнэртэй
уула өөдэ гарахамни.
7Үзэмжэ түгэс хайратамни!
Өө мөөгүй амарагни!
8Һайхан ганса хубитамни!
Хаанашье ябабал, намтай бай.
Ливаанай уулада гараашье һаа,
намтай хамта бусажа ерэ!
Аманаа һарьдагһаа, Сэниирэй оройһоо,
Хэрмоон уулын үндэр орьёлһоо,
арсалан, барасай үүрэй дундаһаа
намтай хамта бусажа ерэ!
9Минии хубита, дүүхэймни!
Харасаа нам руу нэгэл шэдээд,
сэдьхэл зүрхымни эзэлээш.
Эрдэни зүүдхэлээ ялас гүүлээд,
эрьежэ харахадаал, эзэмдээш.
10Минии хубита, дүүхэймни!
Инаг шиниимни энхэрэлые
үзэмэй дараһан архитай сасуулшагүй.
Амараг шиниингээ түрхиһэн тоһые
анхилма үнэртэй юунтэй зэргэсүүлхэбиб?
11Инагни, булай хөөрхэн уралшни
балай амтаар намайе баяжуулжа,
сагаан эдеэн, зүгын бал
хэлэн дороһоош урдажа байна.
Ливаан ороной сэнгэлиг ой
үмдэдэг хубсаһаарш анхилжа байна.
12Минии хубита, дүүхэймни!
Хаалтатай үүдэтэй сэсэрлиг мэтэ,
хаажа таглаһан булаг мэтэ
хайратамни сэбэр арюунши.
13Шинии бэе сэсэрлиг мэтэ,
анар мододтой, эрхим жэмэстэй,
анхилма үнэртэй хинна, ая гангатай.
14Ая гангаһаа гадна гүргэм сэсэг,
зэгсэ, анхилма корица,
үнэр һайтай, үнэтэ дабирхайтай
ургамал модод,
үнэтэ дабирхайтай һөөгүүд ургана.
15Үзэсхэлэн тэрэ сэсэрлигтэ
орьёлно тунгалаг булаг.
Амидаралаар тэдхэгшэ горхон
Ливаан уулаһаа урдана.
Басаган: 16Хойто зүгэй һалхин, хүдэлыш!
Урда зүгэй һалхин, үлеэгыш!
Сэсэрлиг руум үлеэжэ эхилэ!
Һайхан үнэрыень тараажа эхилэ!
Инагни, мүнөө намдаа ерээрэй!
Минии сэсэрлигтэ ороорой!
Тансаг жэмэс бүриһээмни
таһалан абажа амасаарай!
Copyright information for
BxrBBL2024