‏ Song of Solomon 5

Хүбүүн:
1Минии хубита, дүүхэймни!
Сэсэрлигтээ би орооб.
Һайхан үнэртэй дабирхай суглуулжа,
зүгын үүрһээ балынь һорожо,
үзэмэй дараһан архи шэмэжэ, һү уунам.
Иерусалим хотын басагад: Манай хайрата амарагууд!
Хайрын зоогһоо амасагты!
Хайрын архиһаа уугты!
Ханажа садатараа эдеэлэгты!

Дүрбэдэхи дуун

Басаган: 2Нойрсожо байгаашье һаа, зүрхэмни һэргэг.
Шагнана гүт, тэрэ!
Хайратамни газаа ерэшоод,
хаалга тоншожо байна.
Хүбүүн: Инагни!
Дүүхэймни, амарагни!
Хөөрхэн сагаан тагтаамни!
Өө мөөгүй амарагни!
Үүдэ хаалгаа тайлыш!
Һүниин шүүдэрһөө толгоймни нороо,
үһэмни нойтон.
Басаган: 3Үмдэдэг хубсаһаа тайланхайлби.
Дахин яажа үмдэхэбиб?
Хүлөө би угаанхайлби.
Дахин яажа шоройдохобиб?
4Хайратамни тиихэдэ хаалга тайлахаяа
нүхөөр гараа һарбайгаад оруулба.
Амарагайнгаа ойртоһые мэдэрээд,
сэдьхэлни дэгдээ, хүсэл бадараа.
5Инаг тэрэнээ оруулжа асархаяа
яаран бодожо, хаалга руу ошоходом,
үүдэнэй барюулда үнэртэ тоһон
гарһаамни дуһалан байгаал даа.
6Амараг тэрээндээ үүдээ нээбэб.
Харин тэрэм эрьелдээд ябашоол.
Ай, тэрэнэй ябаһые харахадаа,
амяа табиха туйлдаа хүрөөб!
Дуудахадам, харюусанагүй.
Бэдэрхэдэм, олдоногүй.
7Хотын гудамжаар эрьен ябадаг
һүниин харуулшад намтай дайралдаад,
хүхэржэ нязартар намайе сохёод,
хубсаһымни тоножо абаа.

8Иерусалим хотын басагад!
Таанадые тарнидан гуйнаб!
Амарагаймни хэрбээ олдобол,
хайра дуранай түймэртэ шатан,
хосоржо байһыем дамжуулыт.
Иерусалим хотын басагад: 9Эмэгтэйшүүлэй дундаһаа
эгээл һайхамнай!
Шинии амараг юугээрээ
бусад эрэшүүлһээ дээрэ юм?
Шинии инаг юугээрээ
бусад эрэшүүлһээ дээрэ болоод,
маанадые гуйжа, тангариг эринэш?
Басаган: 10Минии инаг үзэсхэлэн түгэс,
эрүүл шиираг, хасар улаан,
түмэн эрын дундаһаашье онсо!
11Тунамал алтан мэтэ туяарһан шарайтай,
үһэниинь буржагар,
хирээгэй үдэн мэтэ хилэн хара.
12Һүндэ умбан шунгаад,
харзын дэргэдэ һуугааша
сагаан тагтаа мэтэ нюдэдынь.
13Хасарынь үнэрдэбэл,
һайхан үнэртэй сэсэрлиг мэтэ.
Урал аманиинь гэбэл,
аятай хангалтай тоһо дуһааһан
сараана сэсэг мэтэ.
14Хоёр гарынь гэбэл,
молор эрдэниин шэгэдхээтэй
шэжэр алтан бахана мэтэ.
Үбсүү бэень гэбэл,
биндарьяа шулуу һуулгаһан
заанай яһан һиилэбэри мэтэ.
15Хоёр хүлынь гэбэл,
сэбэр алтан һууритай
гантиг шулуун бахана мэтэ.
Минии амараг
үндэр гоё хуша модотой
Ливаанай уула мэтэ һүрөөтэй һайхан.
16Үгэ хүүрынь илдамхан.
Тэрэ шэгээрээ аятайхан.
Иерусалим хотын басагад!
Хайрата амарагни иимэл даа,
хамагай һайхан андал даа!