‏ Song of Solomon 6

Иерусалим хотын басагад:
1Эмэгтэйшүүлэй дундаһаа
эгээл һайхамнай!
Амарагшни хайшаа ошооб?
Али харгыгаар ябааб?
Шамтай хамта бэдэрэел!
Басаган: 2Минии амараг сэсэрлигтэ орожо,
сэсэгэй мандал руу ошоо.
Сэнгэлэй дээдые эдлэн,
сараана сэсэг түүжэ байна.
3Амараг тэрэмни ганса минии!
Би өөрөө гансал тэрэнэйб.
Сараана сэсэгэй дунда тэрэмни
сэнгэлэй дээдые эдэлжэ байна.

Табадахи дуун

Хүбүүн: 4Инагни, ши
үзэмжэ түгэс Тирцаа хото мэтэш,
үнэхөөр һайхан Иерусалим хото мэтэш,
нюдэ буляама, илдам һайхан.
Үй олон туг намируулһан
үзэсхэлэнтэ хото мэтэ эрхим һүрөөтэйш.
5Хөөрхэн нюдөөрөө бү шэртэ намайе!
Хүсэлэй гални дүлэтэн байна.
Миндаһан үһэншни намилзан хүдэлхэдөө,
Галаадай хадаһаа уруудан буугааша
ямаан һүрэгые һануулна.
6Дун сагаан шүдэншни
һаяхан нооһоо угаалгаад,
голһоо гараһан хонид мэтэ үзэмжэтэй.
Хундан сагаан тэрэ хонид
эхир хурьга гарганхай,
һубайрһан нэгэньшье үгы.
7Һанжаһан гивлүүрэй саанаһаа
улаа бутарма хоёр хасаршни
зохидоор хубааһан анар жэмэс мэтэ
нюдэ буляама үзэсхэлэн гоё.
8Эзэн хаан жаран хатантай,
наян һайхан бага һамгатай,
басагад тоо томшогүй.
9Харин хөөрхэн сагаан тагтаамни!
Өө мөөгүй амарагни!
Олоной дундаһаа угаа һайхан.
Минии дуратай амараг
хүнэй ганса мэтэ онсо һайхан.
Олон хүүгэдтэй эжынгээ хубида
онсо хайратайнь тэрэмни бэлэй.
Эхэнэрнүүд тэрэниие харабал,
«Бүгэдэһөө жаргалтайнь» гэжэ хэлэдэг.
Хатан хаан, бага һамгадшье
хайратымни хараад, бахардан магтаа.
Иерусалим хотын басагад: 10Үүрэй толон мэтэ ялагар,
һүниин һара мэтэ һайхан,
үдэрэй наран мэтэ гэрэлтэй,
үзэсхэлэн гоёнь хэн бэ?
Тэрэ болбол минии амараг.
Үй олон туг намируулһан,
үзэсхэлэнтэ хото мэтэ эрхим һүрөөтэй.
Хүбүүн: 11Талын ногоорхые харахаяа,
уһан үзэмэй мододой сэсэглэжэ,
анар модоной нахилзан задархые харахаяа
һамарай модоной сэсэрлиг руу
би уруудан буугааб.
Басаган: 12Уянгын нүлөөндэ абтахадаа, би
ухаагаараа бодохо сүлөөгүй
хун тайжынгаа хажууда ошоод,
морин тэргэдэнь һууһан байбаб.