‏ Song of Solomon 8

1Амарагни! Нэгэ эхые хүхэжэ үдэһэн
ахамни байхаяа яалайш!
Тиимэ һаань, газаа шамайе тэбэреэд таалахадам,
хэншье нам руу хилайхагүй һэн.
 2Түрэһэн эхындээ шамайе асархадам,
намайе дуранда һургаха һэнши.
Шамда уулгахаяа
өөрын анарай шүүһэнһээ гаргаһан
амтата үзэмэй дараһан архи үгэхэ байгааб.
 3Инагни, зүүн гараараа намайе хүзүүдэн,
баруун гараар энхэрэн таалажа,
сэдьхэл доһолгоон, хүсэлым нэмээнэш.
 4Иерусалим хотын басагад!
Таанадые тарнидан гуйнаб!
Дуранай ёһоор таалажа шадахагүй һаа,
хайрын гал бү носоогты!

Түгэсхэл дуун

Иерусалим хотын басагад: 5Алас сүл губиһаа хүрэжэ ерээд,
амараг хүнөө тэбэрин байгаа
энэ басаган хэн бэ?
Басаган: Амарагни! Алим модон мэтэ анхилма дураар
анхан би шамайе носоогооб.
Иимэ дуранай хүсөөр лэ
эхэшни шамайе хэбэлдээ оложо,
хүн болгожо түрүүлһэн бэлэй.
 6Зүрхэндөө ши намайе тамгалжа,
тэбэридээ ши намайе ласада!
Дуран гээшэ үхэл шэнги хүсэтэй.
Хара гээшэ хүүр шэнги үршөөлгүй.
Дуранай гал түймэр мэтэ дүрэлзэдэг.
Халуун дүлэниинь хуйхалан шатаадаг.
 7Үй түмэн гол урдабашье,
үерэй ехэ уһан нэмэбэшье,
дуранай гал унтараажа шадахагүй.
Хэн нэгэн дура абаха гэжэ
гэрэй баялигаа бултыеньшье үгэбэл,
баһуулан доромжолуулхань дамжаггүй.
 Басаганай аханар: 8Бидэндэ үшөө нэгэ басаган дүү бии.
Хүхэниинь ургаагүй бишыхан басаган бии.
Хэзээ нэгэ сагта үдэжэ үндыхэдэнь,
тэрэнииемнай эрэ хүнэй хүсэбэл,
яажа бидэ хамгаалхабибди?
 9Хэрбээ тэрэмнай хэрэм байгаа һаань,
хана хэрэм дээрэ самхаг баряад,
харуулай мүнгэн самхаг баряад,
хамгаалжа шадаха байгаа бэзэбди.
Хэрбээ тэрэмнай хаалга байгаа һаань,
хабтагай модыень хушаар дараад,
хамгаалжа шадаха байгаа бэзэбди.
 Басаган: 10Би хэрэм хана гээшэб!
Хоёр хүхэмни харуулай самхаг.
Амар тайбан аза жаргалые
амараг тэрээндээ би үгэхэб.
 Хүбүүн: 11Соломоон хаан Бааһал-Хамоон
уһан үзэмэй сэсэрлигээ
хэдэн зондо хүлһэлжэ үгөө.
Үрэ жэмэсэйнь эдеэшэхэ үедэ
тэдэ зон татабари түлэдэг,
мүнгэн зоос мянгые түлэдэг.
 12Соломоон хаан мянган зоос,
хүлһэлжэ абагшад хоёр зуун зоос,
тус тустаа абабал, абаг.
Харин минии өөрын бэе,
уһан үзэмэй сэсэрлигни,
гансал өөрын, өөрын ушарһаа
амараг тэрээндээл би үгэхэб.

13Амараг шиниимни дуу хоолойе
анда нүхэдшни сэсэрлигһээ соносоно.
Намдаа баһа дуулуулыш даа!
 Басаган: 14Инагни! Һайхан үнэртэй дабирхай шэнгээһэн
хангай уулын буга мэтэ,
хээрэ талын ооно мэтэ
хонгор намдаа яараарай!
Copyright information for BxrBBL2024