‏ Titus 3

Христиан һүзэглэгшэд өөһэдыгөө ямараар абажа ябахаб

1Засаглагша болон захирагшадай үгыень дуулажа, эрхэ мэдэлдэнь байхые, ямаршье сагта дэмбэрэлтэ һайхан хэрэгүүдые хэхээр бэлэн байхые һүзэглэгшэ зондо һануулжа байгаарай. 2Хүниие хардажа бү хэлэгты, харин эбтэй эетэй, амгалан тайбан байгты, хүн бүхэндэ ходо дарууханаар хандагты гэжэ тэдэндэ баһал хэлэжэ байгаарай. 3Бидэшье өөһэдөө урдань баһал тэнэг, үгэ дууладаггүй, эндүүржэ ябадаг һэмди. Ташаяан хүсэлэнгүүдэй болон элдэб янзын сэдьхэлээ ханалгын мэдэлдэ байгаабди. Бидэ атаархалдан, хара һанаатайгаар амидардаг, бэе бэеэ үзэн ядадаг һэмди. 4Харин манай Абарагша, Бурхан аша буянгаа, хайра дураяа үршөөжэ, 5бидэниие абараа. Хэһэн дэмбэрэлтэй хэрэгүүдэймнай ашаар бэшэ, харин Өөрынгөө үршөөл хайраар Арюун Һүлдын ашаар Бурхан бидэниие арюудхан угаажа, шэнээр түрүүлжэ, шэнэ амидарал хайрлажа, бидэниие абараа. 6– 7Бурханай үршөөл хайраар сагааруулагдажа, найдажа байһан мүнхын амидарал залгамжалхын тула Бурхан манай Абарагша Иисүүс Христоосоор дамжуулан, Арюун Һүлдэ маанадта элбэг дэлбэгээр үршөөгөө. 8Энэ хэлээшэмнай үнэн. Үлзытэй хэрэгүүдые оролдосотойгоор бүтээжэ байхыень Бурханда һүзэглэһэн хүнүүдые ши идхан һургажа байгаарай. Иимэ хэрэгүүд зондо ехэл аша туһатай, һайн. 9Тэнэг арсалдаануудһаа, уг гарбал ба Хуули тухай хэрүүл, заргалдаанһаа зайлажа байгаарай. Тэдэ болбол аша туһагүй, дэмы юм. 10Хэрүүл татагшадта хоёр дахин ухаа заагаад, удаань тэдэнһээ холодожо байгаарай. 11Тиимэ хүнүүд буруу замда оробо, тиин нүгэлнүүдынь тэдэнэй зэмэтэй байһыень гэршэлнэ гэжэ мэдэнэ ха юмши.

Һүүлшын захяа

12Шамда Артемые гү, али Тихикые эльгээхэдэмни, ши түргэхэн намда Никополь хото хүрэжэ ерэхые бодоорой. Би тэндэ үбэлжэхэ гэжэ шиидээб. 13Зинаа үмэглэгшэ Аполлос хоёрой аян замаа үргэлжэлүүлхэдэнь, юугээршье дутаангүй ябуулхые шадалаараа оролдоорой. 14Манай хүнүүд өөһэдтөө шухала хэрэгтэй юумэ хэжэ, буянтай һайхан хэрэгүүдые бүтээн, сагаа үнгэргэжэ һураха ёһотой. Тэдэнэр удхагүй дэмыгээр ажамидарха ёһогүй.

15Намтай байһан зон булта шамда амар мэндые хүргэнэ. Һүзэглэгшэ нүхэдтэмнай амар мэндыемнай дамжуулаарай.

Бурханай үршөөл хайра та бүгэдэндэ үгтэхэнь болтогой.
Copyright information for BxrBBL2024