1Ch 13 | BxrBBL2024 | STEP | Давид мянганай, зуунай даргануудтай, мүн бүхы удамаршадтай зүбшэбэ,

‏ 1 Chronicles 13

Ханзые Кирьяат-Еариимһээ Обээд-Эдоом руу абаашалга

(2 Хаан 6:1-11)

1 Давид мянганай, зуунай даргануудтай, мүн бүхы удамаршадтай зүбшэбэ, 2 тиигээд тэрэ израильшуудай бүгэдын суглаан дээрэ иигэжэ хэлсэбэ:

– Эзэнэй, манай Бурханай үршөөһэнэй ёһоор бүхы израилиин газар дээрэхи манай аха, дүүнүүдтэ, мүн санаартадта ба левидүүдтэ, тэдэнэй хотонууд болон тосхонуудта манда сугларха дохёо эльгээе; 3 өөһэдынгөө ханза тэндэһээ наашань асарха, юуб гэхэдэ, Саулай үдэрнүүдтэ, бидэ тэрээндэ нэгэшье хандаагүйбди.

4 Удаань суглаан иигэжэ тогтообо «Зүб, тиигэхэ ёһотой», энэ хэрэг бүхы арад түмэндэ тон зүб гээд тоологдоо.

5 – Тиигээд Давид Египедэй Шихоорһоо эхилээд, Хамаатай аман хүрэтэрхи бүхы израильшуудые суглуулжа, Бурханай ханза Кирьяат-Еариимһээ асарха гээд хэлсэбэд. 6 Давид мүн бүхы израильшууд херүүбүүд дээрэ заларагша Эзэнэй нэрээр нэрлэгдэһэн Бурханай ханзые асархаяа Иудын Баһалатаа, ондоогоор Кирьяат-Еариим, руу ябаба. 7 Абинадаабай гэрһээ Бурханай ханзые шэнэ тэргэ дээрэ табяад абаашабад; Уззаа Ахиһоо хоёр энэ тэргэ хүтэлэн ябаба. 8 Давид болон бүхы израильшууд Бурханай урда хүхилдэн, бүхы шадалаараа дуу дуулажа, ятаг, лира, хэнгэрэг, тобшуур, сан дуугарган наадажа ябаа.

9 Тэдэнэй Кидооной амбаарта хүрэжэ ерэхэдэ, үхэрнүүдынь торожо, ханзые хэлтылгэбэ. Уззаа тэрэ ханзада хүрэн, шүүрэн бариба. 10 Эзэн тэрэ дары Уззаада уур хилэн боложо, гараа ханза руу һунгаһанайнь түлөө тэндэнь һалгаажа, тэрэ Бурханай урда гээгдэбэ. 11 Эзэнэй Уззаае һалгааһанда Давид шаналаа бэлэй, тиигээд энэ газарые Пээрэц-Уззаа гэжэ нэрлэбэ. Мүнөө болотор тэрэ иигэжэ нэрлэгдэдэг.

12 Тэрэ үдэр Давид Бурханһаа айн, иигэжэ бодоо һэн: «Эзэнэй ханзые яагаад өөртөө абаашахабиб даа?» 13 Тиигээд тэрэ ханзые өөрын хото руу абаашахаяа зүрхэсөөд, Гаат хотын ажаһуугша Обээд-Эдоомой гэртэ тэрэниие шэглүүлбэ. 14 Иигэжэ Бурханай ханза Обээд-Эдоомой гэртэ гурбан һара байба. Эзэн гэр бүлыень, Обээд-Эдоомые ба бүхы юумыень юрөөбэ ха.