‏ 1 Kings 22:41-50

Иудын хаан – Ёшапаат

41Израилиин хаан Ахаабай дүрбэдэхи жэлээ хааншалха үедэ Асаагай хүбүүн Ёшапаат Иудын хаан болоһон юм. 42Ёшапаат гушан табатайдаа хаанай шэрээдэ һуужа, Иерусалимда хорин табан жэлэй туршада хааншалаа. Эхэнь Шилхиигэй басаган Азубаа бэлэй. 43Тэрэ Асаа эсэгынгээ жэшээ даган, Эзэндэ таатай хэрэгүүдые эрхилэн ябаа. Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг, уталгануудые ууюулдаг байгаа. 44Ёшапаат Израилиин хаантай амгалан тайбан байха тушаа хэлсээ баталаа. 45Ёшапаадай бусад хэрэгүүд, баатаршалганууд Иудын хаашуулай угай бэшэг соо бэшээтэй. 46Үшөө Асаа эсэгынь амиды мэндэ байхада бии байгааша янхан эхэнэр, эрэшүүлые тэрэ үгы болгон усадхаа. 47Эдоомдо тэрэ үедэ хаан байгаагүй, хаанай томилон табиһан захирагша тэрэ орон нютагые зонхилдог байгаа. 48Опиир гэжэ газар руу алта олзолхын тула ошохоёо Ёшапаат далайн мантан онгосонуудые баряа. Теэд тэдэнь Эциһоон-Гээбэртэ бутаран һалаа бэлэй. Иигэжэ хүрэхэ газараа хүрөөгүй. 49Тиихэдэнь Ахаабай хүбүүн Ахазияа Ёшапаадта:

– Минии зонтой хамта танай зон далайн онгосоор тамардаг байг лэ, – гэбэ, харин Ёшапаат зүбшөөгөөгүй. 50Ёшапаат наһа баража, элинсэг хулинсагтаяа хамта Давидай хото соо хүдөөлүүлэгдөө һэн. Тэрэнэй орондо Иораам хүбүүниинь хаан шэрээдэ заларба.
Copyright information for BxrBBL2024