1Ki 8:1-13 | BxrBBL2024 | STEP | Соломоон Эзэнэй хэлсээнэй ханзые Давидай хото болохо Сионһоо гарган абаашаха хэрэгээр Израилиин угуудай амбан һайдые, обогуудай удамаршадые, аха захатаниие Иерусалим руу дуудаба.

‏ 1 Kings 8:1-13

(2 Уг 5:2–6:2)

1 Соломоон Эзэнэй хэлсээнэй ханзые Давидай хото болохо Сионһоо гарган абаашаха хэрэгээр Израилиин угуудай амбан һайдые, обогуудай удамаршадые, аха захатаниие Иерусалим руу дуудаба. 2 Иигэжэ израильшууд бултадаа жэлэй долоодохи һара этаниимдэ һайндэрэй үедэ Соломоон хаанда сугларан ерэбэ. 3 Израилиин бүхы ахамадуудай суглархада, санаартан хэлсээнэй ханза үргэжэ, 4 Уулзалгын майхан һүмые, майхан соо байгааша нангин бүхы хэрэгсэлнүүдые, Эзэнэй ханзые абаад, санаартан ба левидүүд тэдэ бүгэдые тэлээд абаашаба. 5 Соломоон хаан болон Израилиин улад зон хэлсээнэй ханзын урда тээ алхалжа, тоо томшогүй хони, буруугаар үргэл үргэжэ байгаа бэлэй. 6 Иигэжэ санаартан Эзэнэй хэлсээнэй ханзые Һүмын дотоодо таһалгада, Хамагай нангин газарта, херүүбүүдэй дали доро залаба. 7 Херүүбүүд хэлсээнэй ханза дээгүүр даляа дэбижэ, тэрэниие тэлээд ябадаг һургаагтайнь хамта хушан байба. 8 Ханзые тэлэжэ ябадаг һургаагууд аргагүй утанууд аад, Хамагай нангин газарай урда оршоһон дотоодо таһалгаһаа харагдадаг, харин газааһаа бултайжа харагдадаггүй бэлэй. Мүнөөшье болотор тиимэ зандаа. 9 Израилиин арад зоной Египедһээ гарахада, Хорээб хада дээрэ Эзэнэй тэдээнтэй хэлсээ баталжа, Моисейн тиишэнь хэһэн хоёр шулуун хабтаһанһаа бэшэ ондоо юумэн тэрэ ханза соо үгы һэн.

10 Санаартадай нангин газарһаа гарахада, үүлэн Эзэнэй Һүмые гэнтэ бүрхөөбэ. 11 Эзэнэй алдар солоор толорһон үүлэнэй Эзэнэй Һүмые барандань бүрхөөһэн ушарһаа санаартан зогсожо, уялгануудаа дүүргэжэ шадахаяа болёод байгаа бэлэй. 12 Удаань Соломоон иигэжэ хэлэбэ:

Эзэмнай, барагар үүлэн соо оршохо дуратайгаа Та айладхаат.
13 Танай хэтэ мүнхэдөө заларан оршохо
үндэр үргөө би баряаб!