‏ 2 Chronicles 1:3-12

3Соломоон ба тэрээнтэй хамта бүхы сугларагша зон Гибэһоон руу мүргэлэй газарта ошобо. Юундэ ошооб гэхэдэ, тэндэ зэлүүд хооһон газарта Эзэнэй богоол Моисейн табиһан Бурханай оршолой Уулзалгын майхан һүмэ байгаа шуу. 4Гэбэшье Бурханай ханза Иерусалимда, Давидай табиһан майхан соо һэн. Давид хаан тэрэ ханзые Кирьяат-Еариимһээ Иерусалим руу асараа бэлэй. 5Хуурай аша, Үриин хүбүүн Бэцалээлэй гуулин түмэрөөр бүтээһэн үргэлэй шэрээ Гибэһоондо, Эзэнэй оршолой нангин майханай урда тээ байгаа. Соломоон ерэгшэ зонтоёо хамта тэндэ Эзэндэ үргэл хэжэ мүргэбэ. 6Эзэнэй оршолой Уулзалгын майхан һүмын урда тээ, гуулин түмэрөөр бүтээһэн үргэлэй шэрээ дээрэ Соломоон хаан түгэс шатаалта үргэлдэ мянган мал асарба.

7Тэрэл һүниндөө Бурхан Соломоондо үзэгдэжэ:

– Юун шамда хэрэгтэйб, Намһаа гуйхадаш болохо, – гэжэ айладхаба.

8Соломоон Бурханда:

– Минии эсэгэ Давидта Та ехэ энэрэл хайра үзүүлээт. Эсэгэеэ даган хаан болохыемни мүнөө намда зүбшөөгөөт. 9Харин мүнөө, Эзэн Бурхан, минии эсэгэ Давидта найдуулһанаа бэелүүлыт. Газарай шорой мэтэ тоо томшогүй арад түмэнэй хаан болгон намайе табяа хадаа, 10мүнөө тэдэниие зонхилхо сэсэн мэргэн ухаа болон эрдэм мэдэсэ намда үршөөгыт. Юуб гэбэл, намһаа бэшэ хэн Танай агууехэ арад зониие зонхилжо шадахаб? – гэжэ хэлэбэ.

11Бурхан Соломоондо:

– Ухаандаа байгааша юумые үнэн сэхэ хэлээш. Баялиг, үнэтэ нөөсэнүүдые, алдар соло, дайсадтаа үхэл, мүн өөртөө ута наһа гуйхын орондо ши хаан болгожо Минии шамайе табихада, тэрэ арадыем зонхилхын тула сэсэн мэргэн ухаа, эрдэм өөртөө гуйбаш. 12Сэсэн мэргэн ухаан болон эрдэм шамда үршөөгдэнэ! Энээндэ нэмэжэ, шинии урда болон хойто сагуудай хаашуулда байгаагүй баялиг, үнэтэ нөөсэнүүдые, алдар соло шамда үршөөхэб, – гэжэ айладхаба.
Copyright information for BxrBBL2024