2Ch 34:8-13 | BxrBBL2024 | STEP | Арбан наймадахи жэлээ хааншалжа байхадаа, газар дайда болон Бурханай Һүмэ арюун болгоһоной удаа тэрэ Ацаалияагай хүбүүн Шапааниие, хотын дарга Маашэяае, Ёахаазай хүбүүн, түүхэ бэшэгшэ Ёһаае Эзэнэй һүмэ заһабарилхыень эльгээбэ.

‏ 2 Chronicles 34:8-13

Ёшияа Һүмые шэнэлэн бодхоно

(4 Хаан 22:3-7)

8 Арбан наймадахи жэлээ хааншалжа байхадаа, газар дайда болон Бурханай Һүмэ арюун болгоһоной удаа тэрэ Ацаалияагай хүбүүн Шапааниие, хотын дарга Маашэяае, Ёахаазай хүбүүн, түүхэ бэшэгшэ Ёһаае Эзэнэй һүмэ заһабарилхыень эльгээбэ. 9 Һүмын үүдэ харууһалагша левидүүд Мэнашшээгэй, Эпрааимай болон Израилиин бусад обогуудай зоной, Иудын болон Бэньямиинэй, Иерусалимай уладай Бурханай энэ һүмэ руу асарагша алта мүнгые суглуулаа бэлэй. Тэрэ мүнгые эдэ гурбан ахамад санаартан Хилкияада үгэбэ. 10 Удаань энэ мүнгэн Эзэнэй һүмэ заһабарилжа байгааша хүдэлмэришэдтэ дамжуулха зорилготойгоор тэрэ заһабарилгын ажал хинагша зондо үгтөө һэн. 11 Үшөө Иудын хаашуулай муудхааһан гэрнүүдые заһабарилха хэрэгтэ хабтагайлжа хайһан шулуунуудые, гэр модо худалдажа абахыень модошо дархашуулда, барилгашадта тэрэ мүнгэнһөө үгтөө бэлэй.

12 Бурханда этигэдэг зон тэндэ хүдэлөө. Тэдэниие хинахаар Мэрариин үри һадаһад, левидүүд Яахат ба Обадияа, Кэһаадай үри һадаһад Захарияа ба Мэшуллаам табигдаа. Хүгжэмэй зэр зэмсэгүүд дээрэ наадажа шададаг бүхы левидүүд 13 ашаа тэлэн ябааша зоной ажал хинадаг, мүн бүхы ажалшадые хинан байгаа. Левидүүдэй заримань бэшээшэд, хинадаг дарганар, үүдэ харууһалагшад байгаа бэлэй.