‏ 2 Kings 11:4-20

Атаалияае хан шэрээһээнь абажа хаялга ба амииень хороолго

4Долоодохи жэлэй ябажа байхада, юрын ба түгэс шатаалта үргэлнүүдые эмхидхэн үнгэргэдэг ахамад санаарта Ёядаа хаанай һахюул харуулшадай ба ябаган сэрэгшэдэй зуутын дарганарые дуудажа, Эзэнэй һүмэдэ суглуулба. Ёядаа Эзэнэй һүмэ соо тэдэниие баалажа шахаа тангаригынь абаад, тэдээндэ хан хүбүүн Ёһаашые харуулба.

5Тиигээд Ёядаа тэдээндэ хандажа:

– Таанад иимэ юумэ хэгты: субботодо ажалдаа гараха ёһотой таанадай гурбанай нэгэ бүлэг хаанай ордон харууһалаг! 6Гурбанай нүгөөдэ бүлэг Суур хаалта үүдэ, гурбанай гурбадахи бүлэг Харбагшадай хаалта үүдэндэхи хаанай ордон харууһалаг! 7Субботын үдэр харуулай албанда гарахагүй нүгөөдэ хоёр бүлэг хааниие аршалжа, Эзэнэй үргөөе харууһалаг! 8Зэр зэбсэгээ баряад, хааниие алишье талаһаань аршалан, бүһэлэн тойрожо зогсогты! Таанадта дүтэлһэн хүн алуулха! Хаанашье ошоходонь, хааниие үдэшэгты! – гэжэ захирба.

9Зуутануудай дарганар юрын ба түгэс шатаалта үргэлнүүдые эмхидхэн үнгэргэдэг Ёядаа санаартанай захирһан бүхы юумыень дүүргэбэ. Субботын үдэр харуулай албанда гарагшад, мүн тэрэ үдэр амарагшад өөһэдынгөө зуутануудай дарганартай хамта Ёядаа ерэбэд. 10Ёядаа Эзэнэй һүмэ соо Давид хаанай хадагалаанда байһан жадануудые, бамбай хуягуудые зуутадай дарганарта тарааба. 11Сэрэгшэд зэр зэбсэг баряад, хааниие зүг бүхэнһөө харууһалжа, Һүмын урда талаһаа хойто тала хүрэтэр, мүн һүмын хорёо соохи үргэлэй шэрээн дэргэдэ зогсобод. 12Ёядаа Ёһаашые газаа гаргаад, хаанай титим үмэдхүүлжэ, хаанай нэрэ түрын тэмдэг барюулжа, оливын тоһо толгойдонь түрхеэд, хаан болоһыень соносхобо. Арад зон альгаа ташажа: «Хаан мандаха болтогой!» – гэжэ хашхаралдабад.

13Атаалияа сэрэгшэдэй ба арад зоной альгаа ташахые, хашхаралдахые дуулаад, Эзэнэй һүмэдэ ошобо. 14Атаалияа хаашуулай зогсодог баханануудай хажууда ёһо гуримай дагуу зогсоһон хааниие, сэрэгэй дарганарые, эбэр бүреэнүүдые үлеэгшэдые болон хүхилдэн байһан арад зониие хараад, эбэр бүреэнүүдэй хүнхинэн зэдэлхые шагнаад, хубсаһаяа таһар удхар шууламсаараа:

– Урбалта! Урбалта! – гэжэ хашхарба.

15Санаарта Ёядаа бүлэг сэрэгүүдые ударидадаг зуутадта хандажа:

– Тэрэ эмые һүмэһөө гаргажа, жагсаалай дэргэдэ асарагты! Тэрэнэй тала баригшадые алагты! – гэжэ захирба.

Ёядаа тэрэ эхэнэрые һүмэ соо алажа болохогүй гэжэ һанаһан байба.

16Атаалияае барижа, Моридой хаалта үүдээр үргөөһөө зүүн зүг тээшэ гаргаад, ордонһоо холо абаашаад алаба.

Санаарта Ёядаагай хубилалтанууд

17Санаарта Ёядаа арад зоноо Эзэнэй арад болгохын тула Эзэндэ үнэн сэхэ байха тухай хэлсээ Эзэнэй болон арад түмэнэй, хаанай хоорондо баталба. Тиигээд хаан эсэгэдэ үнэн сэхээр алба хэхэ тухай хэлсээ хаанай болон арад түмэнэй хоорондо баталба.

18Тиигээд арад зон Баалай һүмэдэ ошожо һандаргаагаад, үргэлэй шэрээнүүдые, бурхадай һүрэгүүдые үй бута сохёод, Баалай санаарта Маттааниие үргэлэй шэрээнүүдэй урда алаба.

Ёядаа харуулшадые Эзэнэй һүмын дэргэдэ орхибо. 19Тиигээд зуутанай дарганар, харуулшад, ябаган сэрэгшэд, бүхы арад зон Ёядаа санаартантай хамта хааниие Эзэнэй һүмэһөө гаргаад, Харуулшадай хаалта үүдэнүүдээр хаанай ордон руу ороторынь үдэшэбэ. Ёһааш хан шэрээдэ заларан һууба. 20Бүхы арад зон баярлажа хүхилдэбэ. Атаалияагай хаанай ордон соо һэлмээр сабшуулан алуулагдаһан хойно хото дотор амгалан тайбан байдал тогтоо һэн.
Copyright information for BxrBBL2024