2Ki 16:7-20 | BxrBBL2024 | STEP | Ахааз элшэдээ Ассириин хаан Тиглаат-Пилэсээртэ эльгээхэдээ: – Би барлагшни, эсэгэмни байһандал шамда хандадагби! Ерэ, намайе минии дайсад болоһон Араамай хаанай, Израилиин хаанай гарһаа абара,

‏ 2 Kings 16:7-20

7 Ахааз элшэдээ Ассириин хаан Тиглаат-Пилэсээртэ эльгээхэдээ:

– Би барлагшни, эсэгэмни байһандал шамда хандадагби! Ерэ, намайе минии дайсад болоһон Араамай хаанай, Израилиин хаанай гарһаа абара, – гэжэ захиба.

8 Ахааз Эзэнэй һүмын ба хаанай ордоной һангуудай дарасануудһаа алта мүнгэ абаад, тэдэнээ Ассириин хаанда бэлэг болгожо эльгээбэ. 9 Ассириин хаан тэрэнэй гуйлтые дүүргэжэ, Дамааскда дайгаар добтолон орожо, тэрэ хотые эзэмдээд, Рэцииниие саазалба, тэндэхи хүнүүдые Киир руу туужа абаашаба.

Ахааз Эзэнэй Һүмые шэнээр һэльбэнэ

10 Ахааз хаан Ассириин хаан Тиглаат-Пилэсээртэй уулзахаяа Дамааск ошожо, тэндэхи тахилайнь шэрээе хараад, тэрэ тахилайнь шэрээгэй дүрсын тодорхой хэбые санаарта Урияада эльгээбэ. 11 Хаанай нютагаа бусахын урда тээ санаарта Урияа Дамааскһаа Ахаазай эльгээгшэ үргэлэй шэрээгэйнь хэбээр тон тиимэ тахилай шэнэ шэрээ бүтээгээд байба.

12 Хаан Дамааскһаа бусажа, тахилай тэрэ шэнэ шэрээе хараад, тэрээндэ дүтэлэн ерэжэ, дээрэнь гараба. 13 Тиигээд Ахааз хаан тахилай тэрэ шэрээ дээрэ түгэс шатаалта, эдеэ хоолой үргэлнүүдые шатаагаад, үзэмэй дараһан архи сасаһанай һүүлдэ, найрлалгын үргэлнүүдтэ шуһа сүршэбэ.

14 Тахилай хүрэл шэрээ Эзэнэй һүмын үүдэнэй сэхэ урдань табяатай байба. Тиихэдэнь хаан тэрэниие Эзэнэй һүмэдэ ородог үүдэнһээ холо болгожо, тахилай шэнэ шэрээ Эзэнэй һүмэ хоёрой хоорондо урдандаа байһан үргэлэй шэрээе шэнээр табигдаһан үргэлэй шэрээгэй хойто талада абаашажа табиха захиралта үгэбэ.

15 Ахааз хаан санаарта Урияада иигэжэ захирба:

– Тахилай энэ ехэ шэрээ дээрэ хаанай ба арад зоной асарһан тахилнуудые, үглөөнэй түгэс шатаалта үргэлнүүдые, үдэшын үргэлнүүдые шатаа. Тэрэ шэрээдэ үзэмэй дараһан архи саса, түгэс шатаалта үргэлнүүдтэ шуһа сүршэ. Тахилай энэ хүрэл шэрээ намда гэдэһэ дотор үргэжэ, үзэл харахада (Эзэнһээ туһа гуйхада) хэрэгтэй.

16 Ахааз хаанай зарлигаар санаарта Урияа бүхы юумэ бүтээбэ.

17 Ахааз хаан табюурнуудһаань бүреэһэнэй хушалтануудые, табюурнуудһаань шаануудые абхуулба. Тиигээд тэрэ шулуун шалаһаа дээшээ эдэ бүхы юумэнүүдые дороһоонь тулгадаг Зэд Далай, зэд бухануудые доошонь табюулба. 18 Мүн баһа Эзэнэй һүмэ соо байдаг хан шэрээгэй дээрэхи хүшэгын бүреэһэ, Эзэнэй һүмэдэ хаанай ордонһоо ородог нарин хоридоорой газаа талын гоёолтые абхуулба. Эдэ бүгэдэ Ассириин хаанай түлөө баригдаһан байгаа.

Ахаазай наһа баралга

19 Ахаазай хэһэн бусад хэрэг ябуулганууд тухай «Иудын хаашуулай түүхын ном» соо бэшээтэй юм. 20 Ахааз хаан наһа баража, Давидай хотодо өөрынгөө үбгэ эсэгэнэртэй зэргэлжэ хүдөөлүүлэгдэбэ. Хэзэкияа хүбүүниинь орондонь хаан шэрээдэ заларба.