‏ 2 Kings 23:1-20

(2 Уг 34:3-7, 29-33)

1Тиихэдэ хаан Иерусалимай ба Иудын бүхы аха захатадые тэрээндэ сугларан ерэхэ захиралта үгэбэ. 2Тэрэ Эзэнэй һүмэдэ оробо. Тиихэдэнь бүхы Иуда ба Иерусалимда ажаһуугшад, санаартад, лүндэншэд болон бага ехэгүй арад зон барандаа тэрэнэй хойноһоо дахажа, Эзэнэй һүмэдэ оробо. Хаан Эзэнэй һүмэдэ олдоһон Хэлсээ баталгын хуйламал бэшэг тэдээндэ уншажа үгэбэ. 3Хаан табсан дээрэ зогсоод, Эзэниие дахан ябаха, энэ ном соо бэшээтэй хэлсээнэй үгэнүүдые бэелүүлхын тула һургаал заабаринуудынь, захиралтануудынь, хуули ёһонуудынь бүхы сэдьхэлһээ, үнэнхэ зүрхэнһөө сахин байха тушаа хэлсээ баталба. Арад зон тэрэ хэлсээе тогтоон абаба.

4Хаан тэнгэриин наран, һара болон одо мүшэдтэ, Ашэраада ба Баалда шүтэн мүргэлгэндэ алба хэдэг бүхы хэрэгсэлнүүдые Эзэнэй һүмэһөө гаргажа хаяха захиралта ахамад санаарта Хилкияада, санаарта туһалагшадта үгэбэ. Хаан тэдэ бүхы хэрэгсэлнүүдые Иерусалимһаа гаргажа, Кидрооной хүндын ташаланда абаашажа шатаагаад, үнэһыень Бэт-Ээлдэ абаашуулба.

5Тиигээд тэрэ Иудын хотонууд ба Иерусалимай оршон тойронхи мүргэлэй обоонууд дээрэ үргэл үргэжэ байха гэжэ Иудын хаашуулай тогтоол гаргаһан, мүн баһа Баалай ба тэнгэриин наран, һара болон одо мүшэдтэ шүтэдэг тэрэс шажанай бүхы шүтөөнүүдые абхуулба.

6Тиигээд тэрэ Эзэнэй һүмэһөө Ашэраагай дурые гаргажа, Иерусалимай хэрэм ханын саанахи Кидрооной хүндыдэ абаашахыень захирба.

Тиигээд тэрэ дүрсые Кидрооной хүнды соо шатаажа, үнэһыень хамажа суглуулаад, эгээлэй юрын хүнүүдэй булаша дээгүүр сасан тарааба. 7Тиигээд тэрэ Эзэнэй һүмэ соо урдандаа байһан «зорюулагдаһануудай» таһалгые, Ашэраада эхэнэрнүүдэй хубсаһа хунар оёдог таһалга үгы хэбэ.

8Тэрэ Иудын бүхы хотонуудай санаартадые дуудаба, тэдэнэй тахижа байдаг Гээбэһээ Бэһээр-Шээбэ хүрэтэрхи мүргэлэй обоонуудые бузарлаба. Тиигээд тэрэ (хотын хаалта үүдэнэй зүүн таладахи Хотын дарга Ёшуһаагай хаалта үүдэнүүдэй урдань байдаг) хаалта үүдэнэй хажуудахи тэрэс шажанай дуган үгы хэбэ. 9Иерусалим хотын Эзэндэ тахидаг шэрээдэ алба хэдэг санаартадта, мүргэлэй шүтөөнүүдтэ үргэл үргэлгые болюулба. Зүгөөр тэдэнэр бусад санаартадтай эһээбэригүй хилээмэ эдихые зүбшөөбэ.

10Тэрэ Бэн-Һинноомой хүнхэртэхи Тоопэдтэ Моолох бурханда өөрынгөө хүбүү ба басага галда үгэлгые болюулба.

11Тиигээд тэрэ Иудын хаашуулай Наранда зорюулһан моридые, дайшалхы тэргэнүүдые галдаба. Тэдэнэр Эзэнэй һүмын үргөөндэ ородог үүдэнһээ холо бэшэ байдаг заһаагаа абхуулһан Натаан-Мээлэх харуулшанай таһалгануудта дүтэшэг байгаа.

12Тиигээд тэрэ Иудын хаашуулай, Ахаазай амардаг гэрэй дээдэ дабхарай оройдо бодхооһон үргэлэй шэрээнүүдые һандаргаба. Мэнашшээ тахилай тэдэ шэрээнүүдые Эзэнэй һүмын хоёр хашаа хорёо соо бүтээлгэһэн байгаа. Тэрэ тэдэниие һандарган буталжа, бутархайнуудыень тооһо шоройтойгоор хамаад, тэдэнииень Кидрооной хүндыдэ хаюулба.

13Хаан Иерусалимай зүүн тээһээ урагшаа Элеон хада хүрэтэр байһан мүргэлэй шүтөөнүүдые бузарлаба. Израилиин хаан Соломоон сидооной яндан – Аштаарта, моһаабай яндан – Хэмоошто болон аммооной яндан – Милхоомдо шүтөөнүүдые барюулһан байгаа.

14Тэрэ нангин шулуунуудые буталба, Ашэраагай модон сэргэнүүдые таһар сабшажа унагааба. Тиигээд тэрэ нангин тэдэ газарнуудта үхэһэн хүнүүдэй яһануудые хаяба.

15Хаан Набаадай хүбүүн Еробоһаамай Бэт-Ээлдэ барюулһан, тэрэнэй зэмээр бүхы Израиль нүгэл хэжэ байһан үргэлэй шэрээе мүргэдэг обоонуудай онгонуудтай хамта үгы хэбэ. Тиигээд тэрэ Ашэраагай модон сэргэнүүдые шатаажа үнэһэн тоборог болгобо.

16Ёшияа эрьежэ, хада дээрэхи булаша бунхан хараад, тэндэһээ хүүрэй яһануудые асархые захирба. Тиигээд тэрэ тэндэһээ асарһан хүүрэй яһануудые үргэлэй шэрээ дээрэ шатаажа, Бурханай хүнөөр дамжуулһан Эзэнэй үгые бэелүүлжэ, тэрэ үргэлэй шэрээе бузарлаба.

17Ёшияа тэндэхи хотын зондо хандажа:

– Энэ юун хүшөө шулуун бэ? – гэжэ һураба.

Тэндэхи хотын зон тэрээндэ иигэжэ харюусаба:

– Таниие Бэт-Ээлдэхи үргэлэй шэрээе үгы хэхэ гэжэ бүхы юумэ уридшалан хэлэхэеэ Иудаһаа ерэһэн Бурханай хүнэй булаша.

18Ёшияа тэдээндэ хандажа:

– Энэ булашые орхигты. Хэншье тэрэнэй үлэгдэлдэ гар бү хүрэг, – гэжэ захирба.

Ёшияагай хүнүүд тэдэ үлэгдэлнүүдтэ, мүн тэдээнтэй хамта Самариһаа ерэһэн лүндэншын үлэгдэлнүүдтэ гар хүрэбэгүй.

19Ёшияа Эзэнэй уур сухалые хүргэдэг байһан Израилиин хаашуулай Самариин хотонуудта ба мүргэлэй обоонуудта барюулһан бүхы дугануудые Бэт-Ээлэй обоонууд дээрэхи дуган мэтээр болюулба. 20Тиигээд тэрэ үргэлэй шэрээнүүд дээрэ санаартадые алаад, тэдэнэй үхэһэн бэенүүдые шатааба.

Тиигээд тэрэ Иерусалимда бусаба.