‏ 2 Samuel 15:13-37

Давид Иерусалимһаа тэрьедэбэ

13Тиихэдэ Давидта мэдээ асарагша нэгэн ерэжэ, иигэжэ дуулгаба:

– Израильшууд Абшалоомой тала баряад байна.

14Тиихэдэнь Давид Иерусалимда өөртэйнь хамта байһан бүхы түшэмэлнүүдтээ иигэжэ хэлэбэ:

– Тэрьедэхэ ёһотойбди. Үгы һаа, Абшалоомдо бултадаа алуулхабди. Түргэлэе! Тэрэнэй маанадые баряадүй, гай ушаруулан, зониие һэлмээр сабшан усадхаадүйдэнь гаран ошоё.

15Тэдэнь хаанда харюусаба:

– Үндэр түрэлтэ хаан! Танай хэлэһээр лэ бүхы юумэ хэхэбди.

16Хаан гаража, тэрэнэй хойноһоо гэр бүлэнь, бүхы түшэмэлнүүдынь дахан ошобо. Харин гэрээ һахюулан, хаан арбан бага һамгадаа үлөөбэ.

17Хаан болон тэрэнэй бүхы зон хотоһоо гаран ябажа, Бэт-Мэрхаада тогтобо. 18Хамаг түшэмэлнүүд хажуудань зогсобо. Бэеыень аршалаашад бултадаа, хэрээдүүд ба пэлидүүд бултадаа, мүн хаантай хамта Гаатһаа ерэһэн зургаан зуун хүн бүгэдэ хаанай урдуур жагсаалаар ябан үнгэрбэ. 19Хаан гаадуудай удамаршан Иттайда иигэжэ хэлэбэ:

– Ши юундэ бидэнтэй хамта ябанабши? Хари хүн ха юмши, өөрынгөө газарһаа үлдүүлэнхэйш. Бусажа, нүгөөдэ хаантай хамта үлэ. 20Ши һаял бидэндэ ерээш. Тиигээд хаагууршье ябахаяа мэдэхэгүй аад, би шамайе мүнөө намтай яба гэжэ баадхаха аалби? Ши өөрынгөө нютаг зониие абаад буса. Үршөөл хайратай, сэхэ сэбэр ябахатнай болтогой!

21Иттай хаанда харюусаба:

– Үндэр түрэлтэ хаан! Эзэнэй нэрээр тангаригланаб: танай амидышье, нүгшөөдшье, хаанашье байгаа хадатнай би тэндэл байхаб!

22Тиимэһээ Давид Иттайда хэлэбэ:

– Тиигээ һаа, ошоё.

Иигээд гаадай Иттай, тэрэнэй бүхы зониинь үхи хүүгэдтэеэ хамта ошобо. 23Нютагаа орхин ошожо ябахадаа бүхы зон шангаар бархиралдан ябаа. Хаан Кидроон горхо гаталха гарасын хажууда байгаа. Бүхы арад зон сүл губи тээшэ замаар шэглэн ябаа.

24Цадоок болон тэрээнтэй байһан бүхы левидүүд Бурханай хэлсээнэй ханзые абажа ябаа. Тэдэ тус ханзые буулган табиба ▼

▼ Еврей хэлэн дээрэ «адхаба».

. Бүхы зоной Иерусалимһаа гаратар Абиатаар үргэл хэжэ байгаа ▼

▼ Еврей хэлэн дээрэ «дээшээ үгсэн гараа».

. 25Хаан Цадоогто хэлэбэ:

– Бурханай ханзые хото руу бусаан абааша. Эзэнэй үршөөл хайрада хүртөө гээшэ һаам, Тэрэ намайе дахин бусаажа, Өөрыгөө болон оршодог газараа үзүүлхэ. 26Харин Тэрэнэй намайе үршөөгөөгүй гээшэ һаань, яахаб, Тэрэ намда һанаһаараа юумэ хүүжэн. 27Хаан үшөө тэрээндэ иигэжэ хэлэбэ:

– Хара даа, өөрынгөө хүбүүн Ахимаац болон Абиатаарай хүбүүн Ёнатааниие аба. Хоюулаа хүбүүдтэеэ хамта амгалан тайбан хото руу бусагты. 28Таанадһаа мэдээнэй ерэтэр би сүл губида, Иордан голой гарасын дэргэдэ хүлеэн тогтохоб.

29Цадоок болон Абиатаар Бурханай ханзые Иерусалим руу бусаажа, тэндээ үлэбэ.

30Давид Элеон хада өөдэ үгсэхэдөө, толгойгоо бүглэн, уйлан, хүл нюсэгэн ябаба. Мүн тэрээнтэй хамта байһан бүхы зон толгойгоо бүглэн, уйлан ябаа һэн. 31Хэн нэгэнэй Давидта:

– Абшалоомтой нюуса хэлсээ хэгшэдэй дунда Ахитоопэл байна, – гэжэ хэлэхэдэнь, Давид:

– Эзэн, Ахитоопэлэй зүблөөе ухаа удхагүй болгожо үгыт гэжэ би зальбарнаб, – гэбэ. 32Бурханда мүргэдэг газар болоһон хадын оройдо Давидай гараха үедэ хубсаһаа уринхай, толгой дээрээ шорой адхаһан архэй хүн Хушай урдаһаань ерэжэ ябаба. 33Давид тэрээндэ иигэжэ хэлэбэ:

– Хэрбээ ши намтай ябабал, намда дарамта болохош. 34Харин хото руу бусабал, Абшалоомдо «Хаан, би танай зарасаб. Урдань эсэгынтнай зараса байгааб, мүнөө танай зарасаб» гэжэ хэлээрэй, Ахитоопэлэй зүблөөе туһагүй болгожо шадахаш. 35Тэндэ санаартад Цадоок болон Абиатаар шамтай хамта байха. Хаанай ордон соо дуулаһан лэ юумэеэ тэдээндэ хөөрөөрэй. 36Цадоогой хүбүүн Ахимаац болон Абиатаарай хүбүүн Ёнатаан тэдэнтэй хамта байха. Дуулаһан юумыетнай тэдэ намда дамжуулха.

37Тиигээд Давидай нүхэр Хушай хото руу ошобо. Тэрэ үедэ Абшалоомшье Иерусалим руу ерэжэ байгаа бэлэй.

‏ 2 Samuel 16

Давид ба Цибаа

1Давид хадын оройһоо нэгэ бага уруудан ябахадаа, Мэпибоошэдой зараса Цибаатай уулзаба. Тэрэ ашаа тээһэн хоёр элжэгэтэй, тэдээн дээрээ хоёр зуун хүбэриг хилээмэн, зуун багса хатааһан үзэм, зуун багса инжир, нэгэ тулам үзэмэй дараһан архи ашаһан ябаа. 2Хаанай Цибааһаа:

– Яахаяа эдэ бүгэдые абаад ябанабши? – гэжэ асуухада, Цибаа иигэжэ харюусаба:

– Элжэгэнүүд хаанай гэр бүлын унаа, хилээмэн болон жэмэс зоной эдихэ хоол, үзэмэй дараһан архи хадаа элһэн сүл губида эсэһэн зоной ууха ундан болохо юм.

3– Эзэнэйшни хүбүүн хаана байнаб? – гэжэ хаан асууба ха.

– Тэрэ Иерусалимда үлөө, «мүнөө израильшууд үбгэ эсэгымни хаан түрые намда бусааха» гэжэ хэлэнэ, – гэбэ Цибаа.

4Тиихэдэнь хаан Цибаада иигэжэ хэлэбэ:

– Мэпибоошэдой хамаг юумэн мүнөө шинии.

– Үндэр түрэлтэ хаан, би танай үнэн зарасаб, үршөөл хайратнай хододоо намтай байхань болтогой! – гэжэ Цибаа хэлэжэ, доро дохибо.

Давид ба Шимэй

5Давид хаанай Бахуриимдэ хүрэжэ ерэхэдэ, Саулай түрэлэй нэгэ хүн гаража ерэбэ. Тэрэ Гэраагай хүбүүн Шимэй бэлэй. Тэрэ хараал шэрээл табижа ябаба. 6Хаан руу, мүн хааниие баруун, зүүн талаһаа тойроод байһан түшэмэлнүүд руунь тэрэ шулуу шэдэжэ байгаа һэн. 7Шимэй:

– Тонило, тонило! Алууршан! Хаатаржаан! 8Саулай гэр бүлын шуһа урдахуулһанайш түлөө Эзэн шамайе хэһээжэ байна. Ши Саулай хаан шэрээ буляажа абааш. Тиимэһээл Эзэн хаан шэрээе шамһаа шэлжүүлэн, Абшалоом хүбүүндэшни үгэбэ. Алууршан байһандашнил эдэ бүхы гай гасалан шамтай ушарна, – гэжэ харааба. 9Цэруяа эхэтэй Абишай:

– Энэ үхэһэн нохой яахадаа минии эзэн хааниие харааха болооб? Ошожо, тэрэнэй толгой таһа татахые намда зүбшөөгыт, – гэбэ ха. 10Хаан:

– Цэруяагай хүбүүд, таанад яанабта? Хэрбээ Эзэнэй тэрээндэ «Давидые хараа» гэжэ хэлээ хадань, тэрэ харааһан болобол, хэн тэрээндэ «Ши юундэ иинэбши?» гэжэ хэлэхэ юм? – гэбэ. 11Тиигээд Давид Абишай болон бүхы түшэмэлнүүдтээ иигэжэ хэлэбэ:

– Минии түрэһэн хүбүүнэй намайе алаха гэжэ байгаа хадань энэ бэньямиин хүнэй тиихэньшье бүри ехэ шалтагаантай юм бэшэ гү? Орхигты тэрэниие! Эзэн тэрээндэ захираа, тэрэ хараажал байг. 12Эзэн минии доромжолуулагдажа байһые хаража, тэрэнэй хараалай орондо намда һайн һайханиие хэжэ магад.

13Давид болон тэрэнэй зон өөрын харгы замаар саашалжа, Шимэй тэдэнэй хойноһоо, хадын ташалангаар гэшхэлэн, тэрэниие хараажа, шулуу шэдэжэ, шорой сасажа ябаа һэн. 14Хаан өөрынгөө зонтой хамта Иордан руу ▼

▼ Иордан руу – эхэ хэлэн дээрэ ном соо эдэ үгэнүүд үгы.

ерэбэ. Тэдэ эсэжэ ядарһан тула тэндэ амараа һэн.

Абшалоом Иерусалимда ерэбэ

15Абшалоом болон бүхы Израилиин сэрэг Иерусалим хото руу ерэбэ. Ахитоопэлшье тэрээнтэй хамта ерээ һэн. 16Давидай нүхэр Хушай гэдэг архэй хүн Абшалоомдо ерэжэ, иигэжэ хандаба:

– Хаан мандатугай! Хаан мандатугай! 17Абшалоом Хушайһаа асууба:

– Нүхэртөө шинии үнэн сэхэ байгаашашни энэ гээшэ гү? Юундэ ши нүхэртэеэ хамта ябаагүйбши?

18Хушай Абшалоомдо харюусаба:

– Үгы. Эзэн болон энэ арад түмэн, бүхы израильшууд хэниие шэлэн һунганаб, би тэрэнэй боложо, тэрээнтэй хамта байхаб. Би тантайб. 19Тиигээдшье би хэндэ бэшэ алба хэхэбиб даа. Урдань танай эсэгэдэ алба хэдэг бэлэйб, мүнөө хүбүүндэнь хэхэ ёһотойб.

20Нэгэ хэды болоод Абшалоом Ахитоопэлһээ асууба:

– Зүбшэл хэлэгты. Яаха болонобибди?

21Ахитоопэл харюусаба:

– Гэрээ һахюулхаар эсэгынгээ үлөөһэн бага һамгадтай унтагты. Таниие эсэгэдээ үзэн ядуулхаар юумэ хэһыетнай, үнэхөөр дайсаниинь болоһыетнай бүхы Израиль дуулажа, танай тала баригшад бүри ехээр таниие дэмжэжэ эхилхэ.

22Иигээд Абшалоомдо ордоной хушалта дээрэ майхан татагдаба, тэрэ тиишээ орон, эсэгынгээ бага һамгадтай унтаба. Хамаг Израиль энээниие хараа һэн.

23Тэрэ сагта Ахитоопэлэй зүбшэлнүүд Бурханһаа зүбшэл асуужа байһандал тоологдодог байгаа. Тэдэ Давидташье, Абшалоомдошье ехэ сэнтэй бэлэй.

‏ 2 Samuel 17

Хушай үүргэеэ дүүргэбэ

1Ахитоопэл Абшалоомдо иигэжэ хэлэбэ:

– Арбан хоёр мянган хүниие шэлэжэ абаад, энэ һүни Давидые нэхэн ошохыемни зүбшөөгыт. 2Тэрэнэй эсэжэ, тэнхээ алдаад байха үедэнь би добтолжо, тэрэниие айлгахаб. Тиихэдэм тэрээнтэй байһан бүхы сэрэг зон зугадаха. Харин би гансал хааниие алахаб. 3Бүхы сэрэгые танда бусаан асархаб. Та гансал хүниие – Давидые алахаяа һанана ха юмта, тэрэнэй гээгдэхэдэнь, хамаг сэрэг амгалан тайбан бусаха.

4Энэнь Абшалоомдо болон Израилиин бүхы удамаршадта һайшаагдаба.

5Гэбэшье Абшалоом иигэжэ хэлэбэ:

– Хушай гэдэг архэй хүниие мүн лэ дуудагты. Тэрэнэй юун гэжэ хэлэхыень шагная.

6Хушай Абшалоомдо ерэбэ. Абшалоом тэрээндэ Ахитоопэлэй дурадхалые хөөрэжэ, иигэжэ асууба:

– Ахитоопэлэй зүбшэл заабари иимэ. Бидэ тэрэнэй үгөөр болохо гүбди, али үгы гү? Хэрбээ «үгы» гээ һаа, өөрынгөө һанамжа хэлэ.

7Хушай Абшалоомдо харюусаба:

– Энэ удаа Ахитоопэлэй зүбшэл заабари таарахагүй. 8Хээрэ талада гүлгэдөө буляалгаһан эмэ баабгайдал адли эсэгэтнай болон зониинь дошхон, зоригтой эрэшүүл гэдэгые та мэдэнэт. Танай эсэгэ дайнда мэргэшэһэн хүн, тэрэ сэрэгтэеэ хамта хоножо байхагүй. 9Мүнөө ямар нэгэ агы нүхэндэ гү, али ондоо тээ тэрэ хорожо байһан байха. Хэрбээ түрүүшын лэ байлдаанда танай сэрэг хороолгожо эхилээ һаань, энээниие дуулаһан зон «Абшалоомой сэрэг бута сохюулаа!» гэлдэхэ. 10Тиигэбэл, арсаландал адли зоригтой хүнэйшье зоригынь мохохол. Юуб гэбэл, танай эсэгын зоригтойнь, тэрэниие дахаад ябаһан зоной эрэлхэгынь бүхы Израильда мэдээжэ. 11Тиимэһээ оронойнгоо нэгэ талаһаа нүгөө хүрэтэр, Даанһаа Бэһээр-Шээбэ хүрэтэр далайн эрьедэхи элһэн мэтэ үй олон израильшуудые бултыень суглуулжа, та өөрөө тулалдаанда тэдэниие хүтэлэгты гэжэ би зүбшэл заабари үгэхэ байнаб. 12Давидай хаанашье байгаа һаань, бидэ тэрээндэ добтолхобди. Шүүдэрэй газарта унадаг мэтэ бидэ тэрээн дээрэ нэмэрэн буужа, тэдэнэй нэгэньшье амиды үлэхэгүй. 13Хэрбээ тэрэнэй али нэгэн хото руу орон хоргодоо һаань, манай зон тэрэ хото руу аргамжануудые асаржа, нэгэшье шулуунай үгы болотор тэрэ хотые ▼

▼ Еврей хэлэн дээрэ «тэрэниие».

хүнды хүрэтэр доошонь шэрэхэбди.

14Абшалоом болон бүхы израильшууд иигэжэ хэлсэбэ:

– Хушай гэдэг архэй хүнэй зүбшэл Ахитоопэлэй үгэһэн зүбшэлһөө дээрэ.

Тэдэ иигэжэ юундэ шиидээб гэхэдэ, Эзэн Абшалоомдо гай тодхор ушаруулхын тула Ахитоопэлэй һайн зүбшэл заабари хараада абтахагүй гэжэ шиидэһэн байгаа.

Давид һэргылэгдэн тэрьедэбэ

15Абшалоомдо болон Израилиин удамаршадта ямар зүбшэл заабари өөрөө үгэһэнөө, Ахитоопэлэй тэдээндэ ямар зүбшэл үгэһые Хушай санаартад Цадоок ба Абиатаарта хөөрэбэ. 16Тэрэ тэдээндэ иигэжэ захиба:

– Мүнөө угаа яаралтайгаар хүниие эльгээжэ, Давидта «Энэ һүни элһэн сүл губиин хажуудахи голой гараса дээрэ бү хоногты, яагаашье һаа, Иордан голые гаталан гарагты. Тиигэбэл та сэрэгтэеэ хамта хосорхогүйт» гэжэ дуулгыт.

17Санаартадай хүбүүд Ёнатаан болон Ахимаац Рогээл гэдэг худагай хажууда хүлеэжэ байгаа. Тэдэ Иерусалим руу орожо, бэеэ харуулхаяа һанаагүй. Тиимэһээнь шэбэгшэ эхэнэр тэдээндэ ошожо дуулгаба. Тиихэдэнь тэдэ Давид хаанда ошожо хэлэхэ ёһотой бэлэй.

18Теэд нэгэ залуу хүбүүн тэдэниие хараад, Абшалоомдо дамжуулан дуулгаа һэн. Тэдэ хоюулаа түргөөр хоргодожо, Бахуриим руу нэгэ хүнэй гэртэ ерэбэ. Хорёо соонь худаг байгаа, тиигээд тэдэ хоёр доошоо худаг руу бууба. 19Гэрэй эзэнэй һамган нэмэргэ бүд абажа, худагай амһар дээгүүр татаад, тэрээн дээрэ будаа тараан сасажа, юушье мэдэхээр бэшэ болгобо. 20Абшалоомой сэрэгшэд тэрэ гэртэ ерэжэ, эхэнэрһээ:

– Ахимаац болон Ёнатаан хаанаб? – гэжэ асуухадань, тэрэ эхэнэр иигэжэ харюусаба:

– Тэдэ горхо гаталаад ябаа һэн.

Абшалоомой албатан тэдэниие бэдэрбэ, гэбэшье олонгүй, Иерусалим руу бусаа һэн. 21Тэдэнэй ябаһанай хойно тэдэ хоёр худагһаа гаража, Давид хаанда ошожо мэдээ хүргэн, Ахитоопэлэй зүбшэл заабари тушаа хөөрөөд, иигэжэ хэлэбэ:

– Гол түргэн гаталагты.

22Тиигэжэ Давид болон тэрээнтэй байгаа бүхы зон Иордан голые гаталан гараба. Үүр сайтар тэдэ бултадаа гол гаталаа бэлэй.

23Ахитоопэл өөрынь зүбшэл заабариин тоогдоогүй байһые хараад, элжэгээ эмээллэн, түрэлхи хото руугаа гэртээ бусан ерэжэ, гэр бүлэдөө гэрээд үгэеэ хэлээд, бэеэ боожо алаба. Тэрэ эсэгынгээ булашада хүдөөлүүлэгдөө һэн.

24Давид Маханааим хото руу ерэбэ. Энэ үедэ Абшалоом болон тэрээнтэй байгаа израильшууд бултадаа Иордан голые гаталаа. 25Абшалоом Ёһаабай орондо Амасаа гэгшые сэрэгэй ударидагшаар томилоо. Амасаа хадаа Езрээл хотын Итраа гэгшын хүбүүн; тэрэнэй эхэнь Абигааһил, Абигааһил гээшэ Наһаашай басаган, Ёһаабай эхэ Цэруяагай дүү бэлэй. 26Абшалоом болон тэрэнэй зон хотон хүреэнээр Галаадай газар нютагта тогтобо.

27Давидай Маханааим руу ерэхэдэнь, аммоонуудай Раббаа хотын Наһааш гэдэг хүнэй хүбүүн Шобии болон Лодэбаарай Аммиһээл гэгшын хүбүүн Махиир, Галаадтахи Рогэлиим нютагай Барзиллай гэгшэд 28унтари хэбтэри, аяга, шабар амһарта, тиихэдэ эдеэ хоол: шэниисэ, ешмээн, гурил, хатааһан орооһо, шошо, улаан зарма, 29зүгын бала, ямаанай ба үнеэнэй һүөөр хэһэн бяслаг Давидта ба сэрэгтэнь асарба. Сэрэгшэд элһэн сүл губида гэдэһээ үлдөө, эсээ, ангаа гэжэ тэдэ мэдээд байгаа.