‏ 2 Samuel 7:1-17

Давид Бурханда һүмэ бодхоохые түсэблэнэ

1– 2Давид өөрынгөө ордондо ажаһуужа, Эзэн тойроод байһан дайсадһаань аршалжа, амгалан байдал үршөөгөө бэлэй. Давид лүндэншэ Натаанда иигэжэ хэлэбэ:

– Эзэнэй хэлсээнэй ханзын майхан соо табяатай байхада, би хуша модоор бариһан ордондо ажаһуунаб.

3Натаан хаанда харюусаба:

– Һанаһан юумэеэ бултыень үйлэдэгты, юуб гэхэдэ, Эзэн тантай хамта байна.

4Тэрэл һүниндөө Эзэнэй үгэ Натаанда иигэжэ дуулдаба:

5– Ябажа, минии зараса Давидта иимэ юумэ хэлэ. Эзэн иигэжэ айладхажа байна: «Минии оршохо үргөө барижа үгэхэ хүниинь ши мүн юм гүш? 6Израилиин арад зониие Египедһээ гаргаһан сагһаа хойшо энэ болотор Би үргөө соо байгаагүйб, майхан соол оршон, нэгэ газарһаа нүгөө газар хүрэтэр ябадаг байгааб. 7Израилиин арад зонтой хаанашье ябаа хадаа Өөрынгөө арадай удамаршадта ▼
▼ Удамаршадта – еврей хэлэн дээрэ «обогуудта».
 „намда Ливаанай үнэтэ сэнтэ хуша модоор үргөө баригты“» – гэжэ нэгэшье дахин айладаагүйб.

8Тиимэһээ мүнөө ши Минии богоол Давидта иигэжэ хэлэ:

– Түмэн Сэрэгтэ Эзэн иигэжэ айладхажа байна. Өөрынгөө арад түмэн Израилиин захирагша болгохын тула Би шамайе бэлшээриһээ, хонин һүрэг харууһалжа байхадаш абаа һэм. 9Хаанашье ябахадаш Би шамтай байжа, хамаг дайсадыешни шинии хажууһаа усадхааб. Мүнөө дэлхэйн агууехэ зондол адли шамайе агууехэ болгон, нэрыешни алдаршуулхам. 10Би Израилиин арадые ажаһууха газартай болгохоб, тэрэнэй байдал батадхахаб, өөһэдынгөө газар дээрэ амгалан ажаһууха, тэдэнэр хэзээдэшье һамаргаанда орохоёо болихо. Энээнһээ хойшо тэрэниие хашаашад дахин харшалхагүй. 11Өөрынгөө арад түмэн Израилиие хүтэлхыень удамаршадые табиһан сагһаа эхилжэ, Би бүхы дайсадһааш шамайе амаруулхаб, гэр бүлыеш батажуулхаб гэжэ Эзэн шамда дуулгана. 12Шинии наһа баража, үбгэ эсэгэнэртэеэ хамта мүнхэ нойроор нойрсоходош, Би шинии нэгэ хүбүүе хаан шэрээдэ һуулгажа, хаан түрыень бата болгохоб. 13Тэрэ Намда ордон бодхоохо, Би тэрэнэй уг удамда хаан шэрээ хэтэ мүнхэдөө эзэлүүлхэб. 14Би тэрэнэй эсэгэ боложо, тэрэ Минии хүбүүн болохо. Тэрэнэй гэм зэмэ хэбэл, мүшэрөөр эсэгын хүбүүгээ хэһээдэгтэл хэһээхэб. 15Гэбэшье Минии үршөөл хайра тэрээнтэй байха. Саулһаа буруу хаража, шамда энэрэл үзүүлһэндэл тэрээнһээ буруу хаража байхагүйб. 16Ши хододоо үри һадаһадтай байхаш, хаан түрэшни хэтэ мүнхэдөө оршохо. Хаан шэрээдэ һууха уг удамшни хэзээдэшье таһалдахагүй!

17Натаан эдэ бүхы үгэнүүдые болон үзэгдэлые дууһан Давидта хөөрэжэ үгэбэ.
Copyright information for BxrBBL2024