‏ 2 Samuel 7:18-29

Давид Бурханда мүргэнэ

18Давид хаан ошожо, Эзэнэй урда һуун, иигэжэ зальбарба:

– Эзэн Бурхамни! Би хэн аад, баһа минии гэр бүлэ юун аад, Та намайе иитэрээ үргөө гээшэбта? 19Энэшье Танда бага шэнгеэр һанагдаал, Эзэн Бурхамни! Өөрынгөө богоолой уг удамай ерээдүй тушаа үшөө айладхаат. Хүниие иигэжэ хүтэлнэлта, Эзэн Бурхамни! 20Би, Давид, Танда энээнһээ үлүү үшөө юу хэлэхэбиб даа? Та Өөрынгөө богоолые мэдэнэ ха юмта, Эзэн Бурхамни! 21Айладаһанаа батадхажа, Өөрынгөө һанаагаар эдэ бүгэдые хэбэт. Богоолтнай болохо намда эдэ бүхы агууехэ хэрэгүүдээ Та мэдүүлбэт. 22Эзэн Бурхамнай, Та болбол агууехэт! Тандал адли хэншье байхагүй. Бидэнэй шагнажа мэдэһээр, Танһаа бэшэ ондоо Бурхан байхагүй! 23Танай арад түмэн Израильдал адли үшөө ямар үндэһэтэн газар дээрэ байнаб? Та, Бурхан, Израилиие абаржа, Өөрын арад түмэн болгоод, Өөрынгөө нэрэ алдаршуулаа бэлэйт. Египедһээ гаргажа, ондоо арадуудһаа болон тэдэнэй бурхадһаа сүлөөлэн, арад түмэнэйнгөө түлөө Та агууехэ, һүрдэмөөр үйлэ хэрэгүүдые хээ бэлэйт. 24Израилиин арад зониие хэтэ мүнхэдөө Өөрын арад түмэн болгобот. Эзэн, Та тэдэнэй Бурхан болобот. 25Нам тухай болон минии уг удам тухай айладаһан үгэнүүдээ мүнөө хэтэдээ бэелүүлыт, Эзэн Бурхан! Үгүүлһэнээ баталыт! 26Нэрэтнай хэтэ мүнхэдөө агууехэ боложо, «Түмэн Сэрэгтэ Эзэн болбол Израилиин Бурхан» гэжэ хэлэгдэхэнь болтогой! Минии, Давидай, уг удамһаа Танай энэрэл хайра бү һалаг лэ! 27Түмэн Сэрэгтэ Эзэн, Израилиин Бурхан! Юундэ Танда иимэ зальбаралтай хандахаяа зүрхэлөөбиб гэхэдэ, Та эдэ бүгэдые намда, Өөрынгөө богоолдо, мэдүүлээт, уг удамыемни хаан шэрээдэ хододоо байха гээд айладхаа бэлэйт. 28Эзэн Бурхамни, Та болбол Бурхан. Найдуулһан юумэеэ хододоо бэелүүлдэгта, иимэ һайн юумэ намда, богоолдоо, дуулгабат. 29Танай богоол болохо минии уг удамые юрөөгыт, Танай үршөөл хайра тэрээнтэй хэтэ мүнхэдөө байг лэ! Эзэн Бурхан, Та Өөрөө энээн тухай айладхаа бэлэйлта, Танай юрөөлөөр минии, Танай богоолой, уг удам хэтэ мүнхэдөө юрөөлтэй байхань болтогой!
Copyright information for BxrBBL2024