‏ Deuteronomy 5:5-33

5Таанадай галһаа айгаад, хада өөдэ гарахагүйдэ би Эзэнэй үгэ таанадта дамжуулха гэжэ Тэрэнэй болон таанадай хоорондо зогсоо бэлэйб.

Тэрэ иигэжэ айладхаа: 6«Би шамайе Египедэй дарлалтаһаа гаргаһан Эзэн Бурханшни гээшэб.

7Намһаа ондоо бурхан шамда байха ёһогүй.

8Өөртөө шүтөөниие бү зохёо, дээдэ тэнгэридэ байһан ба газар дээрэ, мүн газарһаа доогуур уһан соо байһан алибаа юумэнэй дүрсэ бү дархала. 9Тэдээндэ бү һүгэдэ, бү мүргэ. Юуб гэхэдэ, Би, Эзэн Бурханшни, хуулияа ханалгатай сахидаг Бурхан гээшэб. Намайе хэрэгсээнгүй ябаһан эсэгэнэрэй түлөө үри хүүгэдыень, аша гушанарыень гурбадахи, дүрбэдэхи үе хүрэтэрынь хэһээдэгби. 10Намда дуратай, захяа заабариием сахижа ябагша зондо мянганшье үе хүрэтэрынь үршөөл хайра үзүүлдэгби.

11Эзэн Бурханайнгаа нэрые дэмы бү дурда. Тэрэнэй нэрэ дэмы нэрлэдэг хэнииешье Эзэн хэһээлтэгүй орхихогүй.

12Минии, Эзэн Бурханайшни, захирһанай ёһоор, субботые нангин үдэр гээд сахидаг бай. 13Зургаан үдэрэй туршада ажаллажа, алибаа хэрэгээ бүтээжэ бай. 14Харин долоодохи үдэр – суббото, тэрэ Намда зорюулһан үдэр. Энэ үдэр ямаршье ажал бү хэ, өөрөөшье, хүбүүн, басаганши, богоол шэбэгшэдшни, сар, элжэгэншни, бүхы мал адагуусаншни, хотодош байрлаһан ерүүл хүншье – юрэдөө, бултадаа ямаршье ажал хэхэ ёһогүй. Шамдал адли, богоолнуудшни амарха ёһотой. 15Египедтэ богоол байһанаа, тэндэһээ Минии, Эзэн Бурханайшни, бар хүсөөрөө, агууехэ шадалаараа шамайе гаргаһан тухай бү марта. Тиимэһээ Би, Эзэн Бурханшни, субботые жэншэдгүй сахихыешни захирнаб.

16Эзэн Бурханайнгаа үршөөһэн газарта үлзытэй һайн, ута наһатай һуухын тулада Эзэн Бурханайшни шамда захиһан ёһоор эхэ, эсэгэеэ хүндэлжэ ябаарай.

17Хүниие бү ала.

18Ханидаа бү урба.

19Хулгай бү хэ.

20Хүниие хардажа худалаар бү гэршэлэ.

21Ондоо хүнэй һамганда бү һанаашарха, хүнэй гэр байрада, зөөри зөөшэдэ: газар таряаланда, богоол шэбэгшэндэ, сар элжэгэндэ, юрэдөө, хүндэ байһан ямаршье юумэндэ бү һанаашарха».

22Эгээл эдэ үгэнүүдые Эзэн хада дээрэ, гал дүлэнэй, үүлэнэй, шэб харанхын дундаһаа таанадай суглараад байхада шанга гэгшээр айладхаа. Бэшэ юумэ Тэрэ нэмээгүй. Тиигээд Тэрэ хоёр шулуун хабтаһан дээрэ тэдэниие бэшэжэ, намда үгөө бэлэй.

Арад зоной айха ушар

23Гал дүлэндэ хадын абтаад байхада, харанхы сооһоо таанад абяа дуулажа, обогуудайтнай толгойлогшод ба аха захатантнай намда дүтэлжэ, 24иигэжэ хэлээ бэлэй: «Эзэн Бурхамнай Өөрынгөө алдар соло, һүр жабхалан бидэндэ харуулаа, Тэрэнэй абяаень гал дүлэн сооһоо дуулаалди! Улад зонтой Бурханай хөөрэлдэһые, удаань тэдэ зоной амиды мэндэ үлэһые мүнөөдэр үзөө хараабди. 25Теэд үшөө дахин Эзэн Бурханайнгаа абяа шагнаа гээшэ һаа, үхэхэбди, энэ ехэ гал бидэние үрэбхихэ бшуу. Харин бидэ хосорхоо һананагүйбди! 26Гал дүлэн сооһоо дуугаржа байһан амиды Бурханай хоолойе бидэндэл адли дуулажа, амиды мэндэ үлэһэн амитан бии юм аал? 27Ши, Моисей, тиишээ дүтэлжэ, Эзэн Бурханаймнай айладаһан үгэнүүдые шагнаад, бултыень бидэндэ дамжуула. Бидэ шагнажа, дүүргэхэеэ оролдохобди».

28Эзэн эдэ бүгэдые дуулахадаа, иигэжэ намда айладаба: «Арад зоной шамда хэлэһэн үгэнүүдые дуулааб, хэлээшэнь тон зүб. 29Өөһэдтэнь болон үхи хүүгэдтэнь хэтэ мүнхэдөө һайн байхын тула тэдэнэр Намайе хүндэлжэ, Минии захяа заабаринуудые бүхы наһаараа үнэнхэ зүрхэнһөө сахижа ябаа гээшэ һаань, хэды һайн байха байгааб! 30Ошоод, майхангуудтаа бусахыень тэдэндэ хэлэ. 31Харин өөрөө, Моисей, удаань Намтай эндэ үлөөрэй. Би шамда бүхы захяа заабари, хуули, ёһо гурим хэлэжэ үгэхэб. Хубитань гэжэ Минии үршөөжэ байһан газарта эдэ бүгэдые сахин дүүргэжэ ябахыень тэдэниие һурга».

32Эзэн Бурханайнгаа захирһанай ёһоор, жэншэдгүй үйлэ хэрэг ябуулагты, нэгэшье хуулииень бү хазагайруулагты, хажуу тээшэ халба бү һүрэгты. 33Амиды мэндэ ябахын тула, эзэлхэ газартаа удаан сагта ажаһуужа, та бүгэдэндэ һайн байхын тула Эзэн Бурханайнгаа захирһан юумэ сахин дүүргэгты.