‏ Isaiah 39

Вавилоонһоо ерэһэн зон

1Тэрэ сагта Баладаанай хүбүүн, Вавилооной хаан Мэродаах-Баладаан Хэзэкияае үбшэн байгаад эдэгэһэн тухайнь дуулаад, элшэнэрээ тэрээндэ бэлэг-сэлэгтэйгээр ба хандалга бэшэгтэйгээр эльгээбэ. 2Хэзэкияа энээндэнь ехэ баярлажа, элшэнэртэ өөрынгөө эрдэни зэндэмэниин һан соо байһан алта мүнгөө, хангалтай уталгаа, үнэтэй сэнтэй тоһо, яар-ябта буу зэбсэгүүдээ болон хадагалдаг газарта байһан бүхы юумэнүүдээ тэдээндэ харуулба. Тиихэдэнь тэдэнэртэ харуулагдангүй үлэһэн нэгэшье юумэн Хэзэкияагай ордон ба хан түрэ соо үлэбэгүй.

3Лүндэншэ Исай Хэзэкияада ерэжэ асууба:

– Эдэ зон хаанаһаа зорижо ерээб? Юун гэжэ хэлэнэб?

– Тэдэ алас холын Вавилоон оронһоо ерээ, – гэжэ Хэзэкияа харюусаба.

4– Ордон соо тэдэ юу үзөөб? – гэжэ лүндэншэн асууба.

– Тэдэнэр минии ордон соохи бүхы юумэ үзөө. Эрдэниин сан соо хадагалаатай бүхы юумэнүүдые тэдээндэ харуулааб, – гэжэ Хэзэкияа харюусаба.

5Тиихэдэнь Исай Хэзэкияа хаанда иигэжэ хэлэбэ:

– Түмэн Сэрэгтэ Эзэнэй айладхаһан үгэ дуула: 6Ордон соо байгаа бүхы юумэн, үбгэ эсэгэнэрэйтнай энэ болотор суглуулһан бүхы зөөри Вавилоон руу абаашагдаха үдэрнүүд заабол ерэхэ. Эндэ юуншье үлэхэгүй. 7Шинии үри һадаһад, удамайшни таһардаһанууд, угыешни залгамжалагшад баряанда абтажа, Вавилооной хаанай ордон соо заһаагаа абхуулһан харуулшад болохо.

8Хэзэкияа Исайда хандан хэлэбэ:

– Мүнөө шинии Эзэнһээ дамжуулан хэлэһэн үгэнүүдшни Һайн мэдээсэл байна.

«Минии амиды мэндэ байгаа сагта эндэ амгалан тайбан, аюулгүй байдал оршохо» гэжэ Хэзэкияа сэдьхэбэ ха юм.
Copyright information for BxrBBL2024