‏ John 12:1-8

(Мт 26:6-13; Мк 14:3-9; Лк 7:37-39)

1Паасхын болохоһоо зургаан хоногой урда Иисүүс Бэтаанида ерэбэ. Лазариин һууһан эгээл тэрэ нютагта Иисүүс анхан ерэжэ, үхөөд байхадань амидыруулаа бэлэй. 2Тэндэхид Иисүүсые хүндэлхэеэ хоол бэлдээд, угтамжа хэбэ. Марфа эдеэ аягалаба, тиин Лазарь Иисүүстэй болон бусад айлшадтай хамта хоол бариба. 3Тэрэ үедэ Мария тон үнэтэй, һайхан хангалтай нард ургамалай тоһо домбо соо асараад, Иисүүсэй хүлые тэрэ тоһоор түрхибэ. Удаань, Иисүүсые угаа ехээр хүндэлдэг байһанаа гэршэлэн, хүлыень толгойнгоо үһөөр аршаба. Тоһоной һайхан үнэр бүхы гэрээр хангалтаба. 4Тиихэдэнь Иисүүсэй шабинарай нэгэниинь – Иуда Искариот (удаань Иисүүсые барижа үгэһэн урбагша):

5– Энэ тоһыень гурбан зуун динаряар худалдаад, юундэ үгытэйшүүлдэ мүнгыень хубаажа үгөөгүй гээшэб? – гэжэ хэлэбэ. 6(Иуда үгытэйшүүлдэ һанаагаа зобоод тиигэжэ хэлээгүй, харин тэрэ хулгайшан байгаа: тэрээндэ даалгагдаһан хамтын мүнгэнһөө олон ушарта өөрынгөө хэрэглэмжэдэ гаргашалдаг байгаа.)

7– Марияе бү һаатуулагты! Намайе хүдөөлүүлхэ үдэртэ зорюулан энэ тоһо хадагалжа байгаа, – гэжэ Иисүүс харюусаба. – 8Үгытэй ядуушуул хододоо таанартай байхал, харин Би таанартай хододоо байхагүйб.
Copyright information for BxrBBL2024