Joh 20:1-18 | BxrBBL2024 | STEP | Субботын хойто үдэрэй эртэ үглөөгүүр, газаа харанхы байхада, Магдалай Мария агы нүхэндэ дүтэлэн ерэхэдээ, тэрэнэй амһарыень хаагаад байһан шулуунайнь хажуу тээшээ болгогдоод байхые обёорон хараба.

‏ John 20:1-18

(Мт 28:1-10; Мк 16:1-8; Лк 24:1-12)

1 Субботын хойто үдэрэй эртэ үглөөгүүр, газаа харанхы байхада, Магдалай Мария агы нүхэндэ дүтэлэн ерэхэдээ, тэрэнэй амһарыень хаагаад байһан шулуунайнь хажуу тээшээ болгогдоод байхые обёорон хараба. 2 Магдалай Мария Симон Пётрто, мүн Иисүүсэй дуратай байһан нүгөөдэ шабидань гүйжэ ошоод:

– Эзэнэй шарилые агы нүхэнһөөнь абаашаһан байна, хайшань абаашаһыень бидэ мэдэнэгүйбди, – гэжэ тэдэндэ дуулгаба.

3 Пётр ба нүгөөдэ шабинь агы нүхэн тээшэ ошобо. 4 Хоюулаа гүйбэшье, нүгөөдэ шабинь Пётрһоо хурдан байһан дээрэһээ, агы нүхэнэй хажууда түрүүн гүйжэ ерээ. 5 Тонгойгоод харахадань, тэндэ Иисүүсые хүдөөлүүлхэдээ орёоһон бүдэнь лэ байба. Теэд агы нүхэ руу тэрэ оробогүй. 6 Хойноһоонь Симон Пётр гүйжэ ерээд, агы соонь ороходоо, бүдэй хэбтэхые хараба. 7 Мүн толгойень бооһон бүд тэндэ байба. Теэд толгойень бооһон бүд бэеыень орёоһон бүдтэй хамта бэшэ, харин байһан байрадаа монсогойлоотой, амяараа хэбтээ. 8 Агы нүхэндэ түрүүн гүйжэ ерэһэн нүгөөдэ шабинь баһа тэндэ ороод, тиимэ юумэ харахадаа, этигэбэ. 9 Теэд Иисүүс үхөөд амидырха гэжэ Нангин Бэшэг соо бэшээтэй байһан зүйлые тэдэ шабинарынь үшөөл ойлгонгүй байгаа. 10 Тэдэ гэртээ бусаба.

Магдалай Мария Иисүүсые хараба

11 Мария агы нүхэнэй хажууда зогсоод уйлаба. Уйлажа байгаад, агы нүхэ руу тонгойжо харахадаа, 12 иимэ юумэ обёорбо: Иисүүсэй бэеын хэбтэһэн газарта Бурханай хоёр Эльгээмэл сагаан хубсаһа үмдэнхэй һууба – нэгэниинь толгой таладань, нүгөөдэнь – хүлзүүр таладань һууба.

13 – Эхэнэр аа, ши юундэ уйланабши? – гэжэ тэдэ хоёрынь асууба.

– Багшымни шарилые агы нүхэн сооһоонь абаашаһан байна, хайшань абаашаһыень би мэдэнэгүйлби, – гэжэ Мария харюусаба.

14 Тиигэжэ хэлээд, гэдэргээ эрьежэ харахадань, урдань Иисүүс зогсожо байба. Теэд Мария Тэрэниие танибагүй.

15 – Эхэнэр аа, ши юундэ уйланабши? Хэниие бэдэрнэбши? – гэбэ Иисүүс.

Энэнь сэсэрлиг таригша байна гэжэ һанаад, Мария тэрээндэ:

– Эзэмни аа, хэрбээ Тэрэнэй шарилые та абаашаа һаа, хаана орхёобта – хэлыт, би Тэрэнииень абаашахамни, – гэбэ.

16 – Мария! – гэбэ Иисүүс.

Мария гэдэргээ эрьен хараад:

– Раббуни! – гэжэ еврей хэлэн дээрэ хашхараад абаба (энэнь «багша» гэһэн удхатай үгэ).

17 – Намайе бү бари! – гэжэ Иисүүс тэрээндэ хэлэбэ. – Би Эсэгэдээ үшөө бусаагүй байнаб. Минии аха дүүнэртэ ошоод, «Би Өөрынгөө, мүн таанарай Эсэгэдэ, Өөрынгөө, мүн таанарай Бурханда бусанаб», – гэжэ хэлэ.

18 Магдалай Мария шабинартань ерээд:

– Би Эзэниие харааб! – гэбэ.

Тиигээд Иисүүсэй хэлэһэн үгэнүүдые тэдэндэ дамжуулан дуулгаба.