‏ Luke 7:18-35

Уһаар Арюудхагша Иоаннай асуудал

18Энэ ушар тухай Иоаннда шабинарынь дуулгаба. 19Иоанн хоёр шабияа дуудажа:

– Ерэхэ ёһотойнь Та гээшэ гүт, али бидэ ондоо хүниие хүлеэхэ ёһотой гүбди гээд һуража ерэгты, – гэжэ тэдэнээ Иисүүстэ эльгээбэ. 20Тэдэнь Иисүүстэ ерээд:

– Бурханһаа заларжа ерэхэ ёһотойнь Та гээшэ гүт, али бидэ ондоо хүниие хүлеэхэ гүбди гээд мэдэжэ ерэхыемнай Уһаар Арюудхагша Иоанн Танда эльгээгээ, – гэжэ хэлэбэ. 21Эгээл энэ үедэ Иисүүс олон хүнүүдые үбшэ хабшанһаань эдэгээбэ, ада шүдхэрнүүдһээнь сүлөөлбэ, олон һохор хүниие хараатай болгобо. 22Иисүүс Иоаннай шабинарта хандажа:

– Һохор хүнүүдэй дахин харадаг болоһые, дохолон хүнүүдэй ябадаг болоһые, арһанай халдабарита үбшэнтэй хүнүүдэй арюудхагдаһые, дүлии хүнүүдэй һонор болоһые, үхэһэн хүнүүдэй үндын бодоһые, үгытэй хүнүүдэй Бурханай хаан түрэ тухай номнол дуулаһые, хараһанаа, мүн дуулаһанаа Иоаннда ошожо хэлэгты. 23Нам тушаа һэжэг түрөөгүй хүн жаргалтай, – гэжэ хэлэбэ.

24Иоаннай шабинарай ябаһан хойно Иисүүс арад зондоо Иоанн тухай хэлэжэ оробо:

– Иоаннда сүл губи руу ошоходоо, ямархан юумэ харахаяа найдаабта? Һалхинда найгалзажа байһан хулһа харахаяа гү? 25Таанар юу үзэхэеэ тиишэ ошообта? Зөөлэн хубсаһа үмдөөд ябаһан хүниие гү? Теэд ялагар салагар, үзэсхэлэн һайханаар хубсалһан хүнүүд хаанай ордонуудтал ажаһуудаг ха юм. 26Таанар юу үзэхэеэ тиишэ ошообта? Лүндэншые гү? Тиимэ даа, тиихэдэ таанад лүндэншэһөө дээгүүр хүниие хараалта гэжэ таанарта хэлэнэб. 27Нангин Бэшэг соо: «Харагты, Шинии ябаха харгы бэлдэхыень Би түрүүндэшни Өөрынгөө Эльгээмэлые ябуулнаб», – гэжэ Бурхан Иоанн тухай хэлэнэ. 28Иоаннһаа агууехэ хүн эхын умайһаа түрөөгүй юм. Зүгөөр Бурханай хаан орондо байгшадай эгээлэй багань Иоаннһаа ехэ юм.

29Иоаннай һургаһан ёһоор уһаар арюудхуулһан бүхы зон, тэрэнэй тоодо алба татаашадшье, Иисүүсэй хэлээшые шагнаад, Бурханиие алдаршуулба. 30Харин Иоаннай һургаһанай ёһоор уһаар арюудхуулхаһаа арсаһан фарисейнүүд болон Хуули заадаг багшанар Бурханай айладхаһан зарлигые дуулаха дурагүй байба.

31Иисүүс үргэлжэлүүлэн хэлэбэ:

– Зай, энэ оршон үеын зониие хэнтэй жэшээлтэйб, юрэдөө, эдэнэр хэдтэй адли гээшэб? 32Эдэнэр газаа һууһан үхибүүдэй: «Бидэнэй жэмбүүрээр наадахада,
таанар хатараагүйт.
Бидэнэй гунигтай дуу дуулахада,
таанар уйлаагүйт», – гэжэ
бэе бэедээ хэлэһэндэл адли юм.

33Иоаннай хилээмэ эдидэггүй, үзэмэй дараһан архи уудаггүй байхадань, таанар тэрэниие «ада шүдхэртэ барюулһан хүн» гэбэт. 34Хүн түрэлхитэнэй Хүбүүнэй ерээд, юумэ эдидэг, үзэмэй дараһан архи балгадаг байхадань, таанар «Харыт, Энэмнай эдимэр, архиншан, алба татаашадай, нүгэл хэгшэдэй нүхэрынь байнал» гэбэт. 35Тиигэбэшье Бурханай сэсэн мэргэниинь үри хүүгэдээрнь баталагдадаг юм.
Copyright information for BxrBBL2024