Mar 6:32-44 | BxrBBL2024 | STEP | Тиигээд тэдэнэр онгосоор тамаржа эзэгүй зэлүүд газарта ошобо.

‏ Mark 6:32-44

32 Тиигээд тэдэнэр онгосоор тамаржа эзэгүй зэлүүд газарта ошобо. 33 Теэд олон зон тэдэнэй тамаржа ябахые хараад, хайшаа ошохыень багсаажа байгаа. Тиимэһээ элдэб хотын зон Иисүүсэй ба шабинарайнь урда гаража нуурай эрьеэр гүйлдэбэ.

34 Иисүүс онгосоһоо буухадаа, тэндэ олон зоной сугларһые хараба, хонишонгүй хонидтол мэтэ байһан тэдэниие хайрлан, олон юумэнүүдтэ һургажа эхилбэ. 35 Үдэшэ болоходо шабинарынь багшадаа ойртоод:

– Мүнөө орой болошоо, энэ эзэгүй газар байна. 36 Тиимэһээ хажуугаархи тосхон, отогуудаар ябажа, эдихэ юумэ худалдажа абахыень эдэ зоноо табиит даа, – гэбэ.

37 – Таанад өөһэдөө эдэндэ эдихэ юумэ үгэгты, – гэжэ Иисүүс харюусаба.

– Эдэ зониие эдеэлүүлхын тула хоёр зуун динари ^{▼▼ Динари – римэй жэжэ мүнгэн, хүлһэншэ хүдэлмэришэнэй нэгэ үдэрэй ажалай салин болодог байгаа.} мүнгөөр хилээмэ худалдажа абахамнай гээшэ гү? – гэжэ шабинарынь гайхаба.

38 – Хэды хилээмэтэй байнабта, хараад ерэгты, – гэбэ Иисүүс. Тэдэнь ошожо хараад:

– Табан монсогор хилээмэтэй, хоёр багахан загаһатай байнабди, – гэжэ дуулгаба. 39 Тиигэхэдэнь Иисүүс эдэ зоноо бүлэг бүлэгөөр хубаагаад, зүлгэ ногоон дээрэ һуулгагты гэжэ шабинартаа захирба. 40 Хүн зон зуу зуугаар, али таби табяар хубааралдан, бүлэгүүд болон һуубад. 41 Тиигээд Иисүүс үнөөхи табан монсогор хилээмэеэ, хоёр загаһаяа абаад, тэнгэри өөдэ шэртэн, Бурханда баяр баясхалан хүргэбэ. Хилээмэеэ хухалан, хүн зондо хүртөөжэ хубаахыень шабинартаа үгэбэ. Удаань хоёр загаһаяа хухалжа, хүн зондо хүртүүлбэ. 42 Хүнүүд булта эдеэлжэ садаа. 43 Тиигээд үлөөдэһыень суглуулхадань, арбан хоёр түрсүүгээр дүүрэн хилээмэнэй, загаһанай үлөөдэһэ сугларба. 44 Хамта дээрээ эдеэлһэн зоной тоодо табан мянга шахуу ганса эрэшүүл байлсаа бшуу.